Search form

GÉNESIS 25

Abraham Cetura huarmipi huahuata charishcamanta

(1 Cr 1.32-33)

1Abrahamca cutinmi shuctac huarmita charirca. Chai huarmica Ceturami carca. 2Chai huarmimi Zimram, Jocsán, Medán, Madián, Isbac Súa huahuacunata charirca. 3Jocsanca Seba, Dedán churicunatami charirca. Dedanca Asurim, Letusim, Leumim churicunatami charirca. 4Madianpac churicunaca: Efa, Efer, Hanoc, Abida Eldaami carca. Tucui paicunami Ceturapac huahuacunaca carca.

5Abrahamca tucui pai charishcatami Isaacman curca. 6Ashtahuanpish caishuc huarmicunapi charishca churicunamanca asha convidanacunallatami curca. Shina cushpami, paipac churi Isaacpac ñaupamanta caruman cacharca. Paicunaca inti llucshina lado caru llactapimi causarca.

Abraham huañushcamanta

7Abrahamca patsac canchis chunga pichca huatatami causarca. 8Abrahamca achca huatacunata causashpa, yallita yuyacyashpami, paipac samaita chingachishpa huañurca. Chashna huañushpami, paipac aillucunahuan tandanacugrirca. 9Pai huañucpica, paipac churi Isaac, Ismaelmi heteocunapuramanta Zoharpac churi Efronpac churipac allpapi tiyac jutcupi enterrarca. Chai jutcuca Mamre chimba ladopi cac Macpela pambapimi carca. 10Cai allpataca Hetpac churicunamanmi Abrahamca randirca. Chaipimi Abrahamtapish, paipac huarmi Saratapish enterrarca. 11Abraham huañushca quipaca, Diosca Abrahampac churi Isaacman bendiciarcami. Isaacca «Ñucata ricushpa causac yacu» cuchupimi causacurca.

Ismaelpac huahua huahuacunamanta

(1 Cr 1.28-31)

12Abrahampac churi Ismaelpac huahua huahuacunaca caicunami. Ismaeltaca Sarata servic Egiptomanta Agarmi charirca. 13Ismaelpac punta huacharishcamanta callarishpa churicunaca caicunami: Nebaiot, Cedar, Adbeel, Mibsam, 14Misma, Duma, Massa, 15Hadar, Tema, Jetur, Nafis, Cedemami carca. 16Caicunami Ismaelpac churicunaca carca. Cai shuticunallahuantacmi uchilla llactacunatapish, carpa huasicunatapish cayac carca. Shinallatac paicunapac aillucunamantami chunga ishcai mandaccuna tiyarca. 17Ismael tucui causashca huatacunaca patsac quimsa chunga canchis huatami carca. Paipish samaita chingachishpa huañushpami, paipac aillucunahuan tandanacugrirca. 18Ismaelpac huahua huahuacunaca Asiria llactamanta rina Egipto chimba ladopi cac Havila llactamanta Shur llactacamanmi causarca. Ismaelca tucui paipac huauquicunapac ñaupapimi huañurca.

Jacobopish, Esaupish huacharishcamanta

19Abrahamca Isaac churitami charirca. 20Isaacca chuscu chunga huatayuc cashpami, Padan-arammanta arameopuramanta Betuelpac ushi Rebecahuan cazararca. Rebecaca arameocunapuramanta Labanpac panimi carca. 21Isaacca paipac huarmi mana huahuata chari pudishcamantami Mandac Diosta mañarca. Chashna mañacpica, Mandac Diosca uyarcami. Chaimantami paipac huarmica huicsayuc tucurca. 22Paipac huahuacuna huicsa ucupi tanganacucpimi Rebecaca: «Cashna cacpica, ¿imapactac causacushayari?» nishpa yuyarca. Chaimantami Mandac Diosta mañangapac rirca. 23Shina mañacpimi, Mandac Diosca:

«Cambac huicsa ucupica,

ishcai llactacunami tiyacun.

Ishcai llactacunami huicsamanta pacha,

chican tucunga.

Shuc llactami shuc llactata atishpa,

ashtahuan sinchi canga.

Punta churimi quipa churita

servishpa causanga» nirca.

24Sajuarina punzha pactacpica, paipac huicsapi ishcai huahuami cashca carca. 25Punta huacharic huahuaca puca millma carata churashca shina, millmayucmi carca. Paitaca Esautami shutichirca. 26Chai quipaca Esaupac chaquipi charirashpami, paipac huauquica llucshirca. Paitaca Jacobotami shutichirca. Isaacca paipac huarmi sajuarina punzhapica, sucta chunga huatayucmi carca.

Punta churi japinata Esaú catushcamanta

27Huahuacunaca huiñarcami. Esauca pambaman llucshishpa, sacha animaltami japinata allita yachacurca. Cutin Jacoboca mana maiman llucshishpa, carpa huasillapimi casilla causarca. 28Isaacca Esautaca pambapi sacha animalta japishpa carac cashcamantami yallita cuyac carca. Cutin mama Rebecaca Jacobotami yallita cuyarca.

29Shuc punzhami Jacoboca sumac pucalla micunata yanushca carca. Cutin Esauca pambamanta shaicushca shamushpami, 30Jacobotaca:

—Chai pucalla sumac micunata carai, mai shaicushcami cani— nirca.

(Chaimantami Esauca Edom shutipish carca).

31Shina nicpimi Jacoboca:

—Can taitamanta punta churi japinata cunanllatac cui— nirca.

32Shina nicpimi Esauca:

—Cunan yarcaihuan huañugricucpica, ¿punta churi japinaca imapactac valingayari?— nirca.

33Shina nicpimi Jacoboca:

—¡Cunan punzhallatac punta churi japinata cungapac ari ni!— nirca.

Chashna nicpimi, punta churi japinata Jacoboman caturca. 34Shina catucpimi, Jacoboca Esaumanca tandatapish, huirahuan camchashca lentejatapish curca. Shina cucpimi, Esauca micushpa, ubiashpa, jatarishpa rircalla. Chashnami punta churi japina cashcata yangalla cashcata yuyashpa saquircalla.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index