Search form

GÉNESIS 29

Jacobo Raquelmantapish, Leamantapish Labanta

servishcamanta

1Jacobo rishpaca, inti llucshina ladopi causaccunapac llactamanmi chayarca. 2Chaipacmi shuc yacu jundutapish, chai jundu cuchullapi quimsa manada ovejacuna siricuctapish ricurca. Chai jundupimi animalcunaca yacuta ubiac carca. Chai yacu jundu jahuapica shuc jatun rumimi carca. 3Chaipi tucui ovejacuna tandaricpimi, michiccunaca chai tapashca rumita anchuchishpa, yacuta ubiachishpa, cutinllatac tapac carca. 4Jacoboca chai michiccunataca:

—Huauquicuna, ¿maimantatac canguichic?— nirca.

Shina nicpimi paicunaca:

—Haranmantami canchic— nirca.

5Shina nicpimi Jacoboca:

—¿Manachu Nacorpac churi Labanta ricsinguichic?— nirca.

Shina nicpimi paicunaca:

—Ari ricsinchicmi— nirca.

6Shina nicpimi Jacoboca:

—Paica, ¿allillachu?— nirca.

Shina nicpimi paicunaca:

—Ari, Labanca allillami causacun. Riqui, chaitami paipac ushi Raquelca ovejacunahuan shamucun— nirca.

7Shina nicpimi Jacoboca:

—Manarac animalcunata tandachina horaschu, chairac punzharacmi, yacuta ubiachishpa, cutinllatac michingapac richic— nirca.

8Shina nicpimi paicunaca:

—Mana chashna ruhuai pudinchicchu, ashtahuanpish tucui manada ovejacuna tandaringacaman, shinallatac yacu jundu tapashca rumita anchuchingacamanca mana ovejacunaman yacuta ubiachi pudinchicchu— nirca.

9Paicunahuan Jacobo chashna parlanacucucllapitacmi Raquelca paipac taitapac ovejacunahuan chayarca. Paica oveja michicmi carca. 10Jacoboca paipac tio Labanpac ovejacunata Raquel pushamucucta ricushcahuanmi, chai yacu jundu tapashca rumita anchuchishpa, paipac mamapac turi Labanpac ovejacunaman yacuta ubiachirca. 11Shinallatac Jacobo Raquelta muchashpa, sinchita huacashpaca: 12“Ñucaca Rebecapac huahua, shinallatac Labanpac sobrinomi cani” nirca. Shina nicpimi, Raquelca callpashpa, paipac taitaman huillangapac rirca.

13Labanca paipac panipac cari huahua shamushcata uyashpaca, callpashpami tupangapac rirca. Jacobohuan tupashpa, ucllarishpa muchashpami, huasiman pusharirca. Chaipimi Jacoboca tucui ima tucushcata parlarca. 14Shina parlacpimi, Labanca: “¡Canca ñuca yahuarpurallatacmi cangui!” nirca.

Jacoboca shuc quillatami Labanhuanca causarca.

15Chaimantami Labanca:

—Canca ñuca familiapura cashpapish mana yangachu trabajana cangui. Can trabajashcamantaca, ¿mashnatatac pagachun ningui?— nirca.

16Labanca ishcai ushitami charirca. Punta ushica Lea, cutin quipa ushica Raquelmi carca. 17Leaca llaquilla ñahui solterami carca. Cutin Raquelca sumac solterami carca. 18Jacoboca Raquelta yallita munashcamantami:

—Cambac quipa ushi Raquelmantami canchis huatata trabajagrini— nirca.

19Shina nicpimi Labanca:

—Chican runaman cunapac randica, canman cunami ashtahuan alli. Shinashpaca ñucahuan saquirilla— nirca.

20Shinami Jacoboca Raquelmantaca canchis huatata trabajangapac saquirirca. Shina cacpipish, Raquelta yallita cuyashcamantaca ashalla huatacuna shinami Jacobomanca ricurirca. 21Canchis huata tucucpica, Jacoboca Labantaca:

—Raquelmanta trabajana huatacunaca ñami tucurin, cunanca paihuan cazarashpa causangapac cuilla— nirca.

22Shina nicpimi, Labanca tucui vecinocunata cayashpa, bodata ruhuarca. 23Ashtahuanpish ña tutayacpica, Labanca Lea solteratami Jacobohuan sueñuchun apamurca. Shina apamucpica, Jacoboca chayarircami. 24Labanca paipac serviccunapuramanta Zilpa huarmitapish Leata servichun curcami. 25Tutamanta Jacobo jatarishpa ricucpica, Leami cashca carca. Chaimantami Jacoboca Labantaca:

—¿Imatatac ruhuarcangui? ¿Manachu Raquelmanta trabajarcani? ¿Imamantatac ñucataca umarcangui?— nirca.

26Shina nicpimi Labanca:

—Cai llactapica punta ushi manarac cazaracpica, quipa ushica mana cazaranachu can. 27Shinaca Leapac semana bodatarac pactachi, quipataca Raqueltapish cushallami. Paimantapish cutinmi canchis huatata trabajana cangui— nirca.

28Shina nicpica, Jacoboca ari nishpami, semana bodata pactachirca. Chai quipaca Labanca Raqueltami Jacobomanca paipac huarmi cachun curca. 29Chashnallatac Labanca paipac serviccunapuramanta Bilha huarmitami Raquelta servichun curca. 30Jacoboca Raquelpipish chayarircami. Shina chayarishpaca, Leata atishpami Raquelta ashtahuan cuyarca. Shinami cutin canchis huatata Labanman trabajarca.

Jacobopac huahuacunamanta

31Mandac Diosca Jacobo Leata mana munacucta ricushpami, Leataca huahuata charicta ruhuarca. Cutin Raqueltaca huahuata mana charic pudictami ruhuarca. 32Leaca huicsayuc tucushpami, shuc cari huahuata charirca. Chaimantami Leaca: «Mandac Diosca ñuca llaquilla cactami ricushca, chaimantami ñuca cusaca cuyanga» nishpami Rubenta shutichirca.

33Cutinllatacmi Leaca shuc cari huahuata charirca. Chaimantami Leaca: «Ñucata mana valichicucta ricushpami, Mandac Diosca cai huahuatapish cushca» nishpami Simeonta shutichirca.

34Cutinllatacmi shuctac cari huahuata charirca. Chaimantami Leaca: «Cunanca quimsa huahuatami ñuca cusaman cushcani. Chaimantami ashtahuan ñuca cusaca ñucapi chayaringa» nishpami, Levita shutichirca.

35Leaca cutinllatacmi shuctac cari huahuata charirca. Chaimantami Leaca: «Cunanca Mandac Diostami alli nigrini» nishpami, Judata shutichirca. Ña quipamanca huahuata charinata saquircami.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index