Search form

GÉNESIS 33

Jacobo Esauhuan alli tucushcamanta

1Jacobo huichailla ricushpaca, paipac huauqui Esaú chuscu patsac runahuan shamucucta ricushpami, Leatapish, Raqueltapish, ishcai servic huarmicunatapish huahuandi chicanyachishpa churarca. 2Shina chicanyachishpaca, servic huarmicunatami huahuacunandi ñaupapi churarca. Chai quipaca Leatami paipac huahuacunandi churarca. Ashtahuanpish huashamanca Raquelta, paipac huahua Josetami churarca. 3Chashna churashpami, Jacoboca ñaupata rishpa, paipac huauquipacman chayangacaman canchis cutincaman pambapi tuparicta cumurirca. 4Ashtahuanpish Esauca callpa rishpami, cungapi ucllarishpa muchashpa, ishcaitac huacarca. 5Esaú huichailla huarmicunata, huahuacunata ricushpaca:

—¿Paicunaca picunatac?— nirca.

Shina nicpimi Jacoboca:

—Paicunaca canta servic Jacoboman Dios cushca huahuacunami— nirca.

6Chai quipaca servic huarmicuna paicunapac huahuacunandi shamushpami, pambacaman cumurirca. 7Leapish huahuacunandi shamushpami cumurirca. Chai quipaca Josepish, Raquelpish chai shinallatacmi cumurirca. 8Chashna ruhuacpimi Esauca:

—Ñucaca cai tucuitami ricushcani. Cai tucuita tandashpa apamushpaca, ¿imatac ruhuasha ningui?— nirca.

Shina nicpimi Jacoboca:

—Ñuca amopac ñahuipi alli ricuringapacmi cashna apamuni— nirca.

9Shina nicpimi Esauca:

—Ñuca huauquilla, ñucaca yalli yallitami charini, cambac charishcacunaca cambacllatac saquirichun— nirca.

10Shina nicpipish Jacoboca:

—Huauquilla, cambac ñahuita ricushpaca, Diospac ñahuita ricuc shinami cushicuni. Canca mai sumactami chasquishcangui. Chaimanta cambac ñahuipi alli ricurishca cacpica, cai convidanacunata chasquiyari. 11Cai convidanacunata apamushcataca chasquiyari. Diosca ñucamanca achcata cushpami, ñucataca chayucyachirca. Imapish mana illanchu— nirca.

Jacoboca chashnami Esaú chasquingacaman mañacurcalla.

12Shina chasquishpaca:

—Cunanca, caimanta jacuchic, ñucami ñaupashpa risha— nirca.

13Shina nicpimi Jacoboca:

—Ñuca amolla, ñuca huahuacuna llullurac cactaca yachanguimi. Cunanlla huachashca ovejacunatapish, vacacunatapish charinimi. Chai animalcunaca shaicushpa, shuc punzhallapi tucui huañungami. 14Ñuca amolla, ñaupailla, ñucaca ñuca amo causana Seir llactaman chayangacaman huahuacunahuan, animalcunahuan allimanta shamucushallami— nirca.

15Shina nicpimi Esauca:

—Shinashpaca, maijan ñucahuan shamuc runacunata canhuan saquisha— nirca.

Shina nicpimi Jacoboca:

—¿Imapactac chashna ruhuasha ningui? Ñucaca, can amopac ñahuipi alli ricurishca cashpaca cushillami cani— nirca.

16Chashnami chai punzhallatac Esauca ñanta catishpa, Seir llactaman cutirca. 17Cutin Jacoboca Sucotman rishpami, chaipi pai causana huasitapish, animalcuna shayana chucllatapish ruhuarca. Chaimantami chai allpataca Sucotta shutichirca.

18Chai quipaca Jacobo Padan-aram llactamanta shamushpaca, Canaán llactapi cac Siquem llactamanmi cushilla chayarca. Chashnami chai llacta chimba ladopi causai callarirca. 19Chaipimi Siquempac taita Hamorpac huahuacunaman carpa huasita shayachishca allpata patsac cullquipi randirca. 20Chaipimi shuc altarta shayachishpa, EL-Elohe-Israelta shutichirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index