Search form

GÉNESIS 35

Dios Jacobota Bet-el pambapi bendiciashcamanta

1Diosmi Jacobotaca:

—Jatari, Bet-elman huichai rishpa, chaipi saquiri. Chaiman chayashpaca, can Esaumanta miticushpa ricucpi, ricuric Diosman shuc altarta ruhuai— nirca.

2Chaimantami Jacoboca paipac familiacunatapish, paihuan caccunatapish rimashpaca:

—Cancunapurapi tiyac chican dioscunata anchuchichic. Chaimantaca armarishpa mushuc churanata churarichic. 3Bet-elman huichai rishunchic. Chaipimi ñuca llaquilla cashpa, mañashcata uyac, shinallatac ñucahuan puric Diosman shuc altarta ruhuagrini— nirca.

4Shina nicpimi, paicuna charishca chican dioscunatapish, ringripi churashca zarcillocunatapish Jacoboman curca. Chashna cucpimi, Jacoboca Siquem llacta ladopi tiyac encina yura ucupi pacarca. 5Paicuna llucshicpica, Dios chai llactapi causaccunaman, shinallatac chai muyundipi causaccunaman manchaita cucpimi, Jacobopac churicunata llaquichingapac mana catirca.

6Chashnami Jacoboca paihuan cac gentecunandi Canaán llacta Luz nishca Bet-el pambaman chayarca. 7Chaipimi paipac huauquimanta miticushpa ricucpi, Dios ricurirca. Chaimantami chaipi shuc altarta ruhuashpa, chai allpataca El-bet-elta shutichirca. 8Rebecata huiñachic Débora huarmi chaipi huañucpimi, Bet-el chaquipi tiyac encina yura ucupi enterrarca. Chai pambataca Alon-bacuttami shutichirca.

9Jacobo Padan-arammanta cuticucpimi, Dios cutin ricurishpa, paita bendiciarca. 10Chaipimi Diosca:

«Canca Jacobo shutimi cangui.

Quipamanca mana Jacobo

shutichu cangui,

ashtahuanpish Israel

shutimi cangui» nirca.

11Shinallatac Diosca:

«Ñucaca imatapish

ruhuaclla Diosmi cani.

Canca achca huahuayucmi tucungui.

Chai huahua huahuacunamantaca

shuctac llactacunami tucunga,

canmantami jatun mandaccunaca

llucshinga.

12Abrahamman, Isaacman cushca

allpatami canmanpish, cambac

huahuacunamanpish cusha» nirca.

13Dios parlanacushpa, paipac ladomanta ricpica, 14Jacoboca paihuan parlanacushca pambata señalangapacmi rumita shayachirca. Chai jahuapica aceitetapish, vinotapish tallircami. 15Dios paihuan parlashca pambataca Bet-eltami shutichirca.

Raquel huañushcamanta

16Chai quipaca Bet-el llactamanta Efrata llactaman chayangapac asha tiyacpiracmi, Raqueltaca sajuarina nanai japirca. Shinami sinchi nanaihuan sajuarirca. 17Chashna yalli nanaihuan cacpimi comadronaca:

—Ama manchaichu, shuctac cari huahuatami charigringui— nirca.

18Chashna nanaihuan ña huañugricushpami, chai huahuataca Benonita shutichirca. Ashtahuanpish paipac taitaca Benjamín nishpami cayarca. 19Chashnami Raquelca huañurca. Pai huañucpica, Efrata ñan ladopimi enterrarca. Cunanca chai Efrata llactataca Belén nincunami. 20Chaipimi Jacoboca Raquelta enterrashca jahuapica shuc jatun suni rumita churarca. Chai rumica Raquel maipi enterrashcata cunancaman ricunallami.

21Taita Israelca chaimanta llucshishpaca, Migdal-edar torremanta ashtahuan chimbapimi shuc carpa huasita shayachirca. 22Chaipi causacucpimi, Rubenca taita Israelpac caishuc Bilha huarmihuan sueñushca carca. Chaitami taita Israelca yachac chayarca.

Jacobopac churicunamanta

(1 Cr 2.1-2)

Jacobopac churicunaca chunga ishcaimi carca. 23Leapac punta huahuaca Rubenmi carca. Quipa huahuacunaca: Simeón, Leví, Judá, Isacar shinallatac Zabulonmi carca. 24Raquelpac huahuacunaca: José, Benjaminmi carca. 25Raquelta servic Bilhapac huahuacunaca: Dan, Neftalimi carca. 26Leata servic Zilpapac huahuacunaca: Gad, Asermi carca. Caicunami taita Jacobo Padan-aram llactapi charishca huahuacuna carca.

Isaac huañushcamanta

27Jacoboca paipac taita Isaacta ricungapacmi Mamre llactaman rirca. Chai llactaca Arba nishca Hebronmi carca. Chaipimi Abrahampish, Isaacpish causarca. 28Isaacca patsac pusac chunga huatatami charirca. 29Isaacca achca huatacunata causashpa, ña yuyac cashcamanta paipac samai tucuricpi, huañushpaca, paipac ñaupa aillucunahuanmi tandanacugrirca. Paitaca paipac churi Esaú, Jacobomi enterrarca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index