Search form

GÉNESIS 36

Esaupac huahua huahuacunamanta

(1 Cr 1.34-54)

1Edom nishca Esaupac huahua huahuacunaca caicunami. 2Esauca Canaán llactapi causac huarmicunahuanmi cazararca. Shuc huarmica heteopuramanta Elonpac ushi Adami carca. Cutin caishucca heveocunapuramanta Sibeonpac churi Aná runapac ushi Aholibamami carca. 3Chaishucca Ismaelpac ushi Nebaiotpac pani Basematmi carca. 4Adaca Elifaz huahuatami Esaupacta charirca. Basematca Reuel huahuatami charirca. 5Aholibamaca Jeús, Jaalam, Coré huahuacunatami charirca. Chaicunami Esaú Canaán llactapi causacushpa charishca huahuacuna carca.

6Esauca paipac huarmicunatapish, churicunatapish, ushicunatapish, tucui paihuan causaccunatapish, Canaán llactapi causacushpa, tucui imalla charishcacunatapish, animalcunatapish apashpami paipac huauqui Jacobomanta caruyashpa, shuctac llactapi causangapac rirca. 7Esaupish, Jacobopish mai chayuccuna cashcamantami michina pambacunapish ña mana pactarca. Chaimantami chai llactallapitac ishcaitac mana causai pudirca. 8Shina cacpimi, Edom nishca Esauca Seir urcupi causagrirca.

9Seir urcupi causac ñaupa taita Esaupac huahua huahua edomitacunaca caicunami. 10Esaú paipac huarmi Adapi charishca churica Elifazmi carca. Cutin Basematpi charishca churica Reuelmi carca. 11Elifazpac huahuacunaca: Temán, Omar, Zefo, Gatam, Cenazmi carca. 12Timnaca Esaupac churi Elifazpac caishuc huarmimi carca. Chai huarmimi Elifazpactaca Amalec huahuata charirca. Caicunami Esaú Adapi charishca churipac huahuacuna. 13Reuelpac huahuacunaca: Nahat, Zera, Sama, Mizami carca. Caicunaca Esaupac huarmi Basematpac nietocunami. 14Esaupac huarmi Oholibamapac cari huahuacunaca: Jeús, Jalam, Coremi carca. Oholibamaca Aná runapac ushi, Zibeonpac nietomi carca.

15Esaupac huahua huahuacunapuramanta mandaccunaca caicunami. Esaupac punta churi Elifazpac huahuacunaca: Temán, Omar, Zefo, Cenaz, 16Coré, Gatam, Amalecmi carca. Paicunaca Edom llactapi Elifazpac aillucunapuramanta mandaccunami carca. Caicunaca Ada huarmipac huahua huahuacunami carca. 17Esaupac churi Reuelpac churicunaca: mandac Nahat, Zera, Sama, Mizami carca. Paicunami Reuelpac aillucunapuramanta Edom llactallapi mandaccuna carca. Paicunaca Esaupac huarmi Basematpac huahua huahuacunami carca.

18Shinallatac Aná runapac ushi Aholibamapi Esaú charishca churicunaca: Mandac Jeús, Jaalam, Coremi carca. Paicunami Anapac ushi Esaupac huarmi Aholibama charishca mandaccuna carca. 19Paicunami Edom nishca Esaupac churicunamanta mandaccunaca carca. 20Chai llactapi causac horeopuramanta Seirpac churicunaca: Lotán, Sobal, Zibeón, Aná, 21Disón, Ezer, Disanmi carca. Paicunami Edom llactapi causac horeocunapuramanta Seirpac churicunata mandac carca. 22Lotanpac churicunaca: Hori, Hemanmi carca. Timna huarmica Lotanpac panimi carca. 23Sobalpac churicunaca: Alván, Manahat, Ebal, Sefo, Onammi carca. 24Zibeonpac churicunaca: Ayía, Anami carca. Cai Aná runami paipac taita Zibeonpac burrocunata michicushpa, shitashca pambapi yacu tucyacucta tarirca. 25Aná runaca Disón churitapish, Aholibama ushitapish charircami. 26Disonpac churicunaca: Hemdán, Esbán, Itrán, Queranmi carca. 27Ezerpac churicunaca: Bilhán, Zaaván, Acanmi carca. 28Disanpac churicunaca: Uz, Aranmi carca.

29Horeocunata mandaccunaca: Lotán, Sobal, Zibeón, Aná, 30Disón, Ezer, Disanmi carca. Seir llactapi causac horeocunataca Disón, Ezer, Disanmi chican chican aillucunata mandashpa causacurca.

31Edom llactapi israelcuna manarac mandacta charicpica, cai jatun mandaccunami mandacurca: 32Edom llactataca Beorpac churi Belami mandacurca. Pai mandana puebloca Dinabami carca. 33Bela huañucpica, Bosramanta Zerapac churi Jobabmi paipac randi mandacurca. 34Jobab huañucpica, Temán llactamanta Husammi mandacurca. 35Husam huañucpica, Bedadpac churi Hadadmi mandacurca. Paimi Moab pambapi macanacushpa, madianitacunataca atirca. Pai mandashpa causana llactaca Avitmi carca. 36Hadad huañucpica, Masrecamanta Samlami paipac randi mandacurca. 37Samla huañucpica, Eufrates yacu ladopi tiyac Rehobotmanta Saulmi paipac randi mandacurca. 38Saúl huañucpica, Acborpac churi Baal-hananmi paipac randi mandacurca. 39Acborpac churi Baal-hanán huañucpica, Hadarmi paipac randi mandacurca. Pai mandana llactaca Paumi carca. Paipac huarmica Matredpac ushi Mehetabelmi carca. Matred huarmica Mezaabpac ushimi carca.

40Esaupac huahua huahuacunapuramanta mandaccunapac shuticunapish, paicuna causashca llactacunapac shuticunapish, paicunapac shuticunapish caicunami: Timna, Alva, Jetet, 41Oholibama, Ela, Pinón, 42Cenaz, Temán, Mibzar, 43Magdiel, Irammi carca. Paicunami Edom llactataca japishpa mandarcacuna. Edomitacunapac taitaca Edom nishca Esaumi carca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index