Search form

GÉNESIS 37

Joseta paipac huauquicuna catushcamanta

1Jacoboca paipac taita causana Canaán llactapimi causarca. 2Cashnami Jacobopac familiacunaca causarca. Joseca chunga canchis huatayuc cashpami, paipac huauquicunahuan ovejata michic carca. Chashnami huambraca paipac taitapac huarmi Bilhapac, Zilpapac huahuacunahuan michic carca. Joseca paipac huauquicuna mana allita ruhuashcata shuccuna parlanacucta uyashpaca paipac taitamanmi huillac carca.

3Taita Israelca Josetaca ña yuyac cashpa charishcamantami tucui huauquicunata atishpa ashtahuan cuyac carca. Chaimantami paimanca tucuilaya color sumac jahualla churanata ruhuarca. 4Taita Israelpac caishuc churicunata paicunata atishpa, Joseta ashtahuan cuyac cashcamantami Josetaca mana ricunayachishpa, piñashcalla parlac carca.

5Joseca shuc muscuita muscushpami, paipac huauquicunaman parlarca. Chashna parlacpicarin, ashtahuanmi mana ricunayachirca.

6Chai muscushcata pai parlashpaca:

—Cunanca, ñuca muscushcata uyaichic: 7Ñucanchicca trigo chagra chaupipimi trigota huatacushcarcanchic. Chashna huatacucpimi, ñuca huataica jatarirca. Cutin cancunapac huataicunaca ñuca huataipac ñaupapimi muyundita cumurirca— nirca.

8Chashna parlacpimi, Josepac huauquicunaca:

—¿Canchu ñucanchicta mandangapac shayarigringui?— nirca.

Josetaca muscushcamantapish, parlashcamantapish piñashpami, ashtahuan mana ricunayachirca.

9Joseca cutinllatac shuc muscuita mushcushpa, paipac huauquicunaman parlashpaca:

—Cutinmi shuc muscuipica caita ricurcani: Intipish, quillapish, chunga shuc lucerocunapish ñucapac ñaupapimi cumurirca— nirca.

10Joseca pai muscushcataca paipac taitamanpish, huauquicunamanpishmi parlarca. Chashna parlacpimi, paipac taitaca:

—¿Canca imatatac muscurcanguiyari? Shinaca, ¿ñucapish, cambac mamapish, huauquicunapish cambac ñaupapi cumuringapac shamuchunchu ningui?— nirca.

11Paipac huauquicunaca piñashpami, mana ricunayachirca. Cutin taitaca cai muscui imata nisha nishcatami yuyacurcalla.

12Chai quipaca Josepac huauquicunaca Siquem ladopimi taitapac ovejacunata michingapac rirca. 13Taita Israelca Josetaca:

—Cambac huauquicunaca Siquem ladopimi ovejacunata michicun. Shamui, paicunata ricugringui— nirca.

Shina nicpimi paica:

—Caipimi cani— nirca.

14Chashna nicpimi, taita Israelca:

—Cunanca, cambac huauquicunatapish, ovejacunatapish ima shina cashcata ricushpa, ñucaman huillangapac cutimugri— nirca.

Chashna nishpami, taita Israelca paipac churi Josetaca Hebrón pambamantaca Siquemman cacharca. 15Chaiman chayashpa, José chingarishpa puricucpimi, shuc runa tupashpaca:

—¿Imatatac mashcacungui?— nirca.

16Shina nicpimi Joseca:

—Ñuca huauquicunatami mashcacuni, paicuna maipi ovejata michicucta ricushca cashpaca huillaiyari— nirca.

17Chashna nicpimi, chai runaca:

—Caimanta ñami rirca. Ñucaca paicuna: “Dotanman jacuchic” ninacuctami uyarcani— nirca.

Chashna nicpimi, Joseca huauquicunata catishpa, Dotán ladopi huauquicunahuan tuparca. 18José paicunapacman manarac chayashpa, carupi cacpiracmi, paicunaca huañuchinata yuyarinacurca. 19Chashna yuyarinacushpami, caishuc chaishuc parlanacushpaca:

—¡Riquichic, muscuc huambrami chaita shamucun! 20Cunanca, paipac muscushca pactacta ricungapac huañuchishpa, jutcupi shitashunchic. Shina huañuchishpaca taitamanca: “Ima sacha animalcunami micushca canga” nishunllami— nircacuna.

21Paicuna chashna parlanacucta Rubén uyashpaca, huauquicunapac maquimanta quishpichisha nishpami:

—Ama huañuchishunchic. 22Ñucanchic huauquitaca ama yahuarta jichaichicchu. Cancunapac huauquitaca imata mana ruhuanachu canguichic, ashtahuanpish shitashca pambapi tiyac jutcupi shitaichic— nircapishmi.

Rubenca paipac huauquicunapac maquimanta quishpichishpa, taitapacman cutichingaraicumi, chashnaca nirca. 23José ña paipac huauquicunapacman chayacpica, paipac tucuilaya color sumac jahualla churanata quichushpami, 24paita japishpa, yacu jundachina jutcupi shitarca. Shina cacpipish, jutcupica yacu mana tiyarcachu. 25Chai quipami paicunaca micungapac tiyarirca. Chashna micucushpami, huichailla ricushpaca, achca ismaelitacuna Galaad llactamanta sumac mishquilla ashnacucta, mirrata shinallatac balsamota camellocunapi apachishpa, Egiptoman ricucta ricurca. 26Chaita ricushpami, Judaca paipac huauquicunataca:

—Ñucanchic huauquita huañuchishpa, upalla saquishpaca, ¿imatatac llucchishun? 27Paica ñucanchic huauqui, quiquin yahuarllatacmi. Chaimanta ima millaita mana ruhuashpa, ismaelitacunaman catushpa cachashunchic— nirca.

Shina nicpica, caishuc huauquicunaca allimi nishpami, 28chai catushpa, randishpa puric madianitacuna chaita pasacucpica, Josetaca jutcumanta llucchishpa, ismaelitacunaman ishcai chunga cullquipi catungapac apamurca. Chashna catucpica, Josetaca Egiptomanmi aparca.

29Chai quipami Rubenca chai jutcuman cutishpa, Joseta mana tarishpaca, paipac churanata lliquirirca. 30Chaimanta paipac huauquicunapacman cutishpaca:

—¡Huambraca jutcupica mana ricurinchu! ¿Cunanca imatac tucushayari?— nirca.

31Chaimantami paicunaca shuc uchilla huahua chivota huañuchishpa, chai yahuarhuan Josepac jahualla churanata cahuirca. 32Chai quipaca Josepac tucuilaya color sumac churanatami paipac taitaman ricuchichun cacharca.

Shina cachacpimi:

—Caitami tarinchic. ¿Cambac churipac jahualla churanachu? Paipac cashcata, mana cashcata alli ricsi— nirca.

33Jacoboca paipac churipac churanata ricsishpaca: «¡Ari, caica ñuca churipac churanami! ¡Ima sacha animalmi micushca canga, Josetaca tucuimi pitinacushca!» nirca.

34Chaimantami taita Jacoboca paipac churanata lliquirishpa, sharpa churanata churarishpa, paipac churi José huañushcamantaca tauca punzhacunata llaquilla causacurca. 35Jacobo chashna llaquilla cacpi, paipac churicunapish, ushicunapish cushichishun nircami. Shina cashpapish, mana cushichi pudircacunachu, ashtahuanpish paica: «¡Ñuca churihuan pacta Seolman ringacaman sharpa churanata churarishpa causacushallami!» nishpami huacacurca.

36Madianitacunaca Josetaca Egiptopimi soldadocunata mandac Faraonta servic Potifarman caturca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index