Search form

GÉNESIS 38

Judamantapish, Tamarmantapish

1Chai huatacunami Judaca huauquicunamanta raquirishpa, Adulammanta Hira runapac huasipi causangapac rirca. 2Chaipi cashpami, Judaca cananeopuramanta Suapac ushihuan cazarashpa, chai huarmipi chayarirca. 3Chai huarmica huicsayuc tucushpami, shuc cari huahuata charirca. Chai huahuataca Ertami shutichirca. 4Cutin huicsayuc tucushpami, shuc cari huahuata charirca. Chai huahuataca Onantami shutichirca. 5Cutinllatac huicsayuc tucushpami, shuc cari huahuata charirca. Chai huahuataca Selatami shutichirca. Chai huahuataca Quezibpi cashpami charirca.

6Judaca paipac punta churi Ertaca Tamarhuanmi cazarachirca. 7Judapac punta churi Erca Mandac Diospac ñaupapica mana alli causarcachu. Chaimantami Erpac causaita quichurca. 8Chaimantami Judaca paipac quipa churi Onantaca:

—Cambac huañuc huauquipac huarmihuan cazarashpa, paipi chayari. Chashna charishpami, cambac huauquiman huahua huahuacunata cungui— nirca.

9Onanca paimanta charishca huahuacunaca mana paipac huahua shina tucuna cashcatami yacharca. Chaimantami ima horas paipac huauquipac huarmipi chayarishpaca, mana huahuata charingapac canzhallapi tucuchic carca. 10Onán chashna ruhuashcaca Mandac Diosmanca mana allichu carca. Chaimantami Onanpac causaitapish quichurca. 11Judaca paipac nuera Tamartaca:

—Ñuca churi Sela huiñangacaman ama cazarashpa, cambac taitahuan causagri— nirca.

Ashtahuanpish Judaca: «Caishuc huauquicuna shinallatac Selapish, huañungami» yuyashpami chashnaca nirca.

Chashna nicpimi, Tamarca paipac taitapacman rishpa, chaipi causarca.

12Tauca huatacuna quipami Suapac ushi Judapac huarmica huañurca. Judaca huarmi huañushcamanta sharpa churanata llucchishpami, Timnatpi causac paipac ovejata rutucuccunapacman Adulammanta paipac ricsishca Hira runahuan huichai rirca. 13Tamarmanca: «Cambac suegroca ovejacunata rutuchingapacmi Timnatman huichai rin» nishpami huillarca. 14Chaita uyashpami, viuda churanata llucchishpa, ñahuitapish pañohuan jarcarishpa, Enaimman yaicuna Temnanman rina ñan cuchupi tiyarigrirca. Sela jatun cacpipish, paihuan mana cazarachishcamantami chashnaca ruhuarca.

15Judaca chai huarmi pañohuan ñahui jarcarishca cashcamantami cullquimanta huainayac huarmimi yuyarca. 16Chaimantami Judaca chai huarmipacman cuchuyangapac ñanmanta anchurirca. Shina anchurishpami, mana paipac nuera cashcata yachashpa:

—Canpi chayarichun saquiyari— nirca.

Shina nicpimi, chai huarmica:

—Can chayarishpaca, ¿imatatac cugringuiyari?— nirca.

17Shina nicpimi Judaca:

—Chivo manadamanta shuc chivota acllashpami cachasha— nirca.

Shina nicpimi, chai huarmica:

—Chaita cungacamanca prendata saquinami cangui— nirca.

18Shina nicpimi Judaca:

—¿Imatatac saquichun ningui?— nirca.

Shina nicpimi, chai huarmica:

—Cambac sello sortejasta huatashcandi, shinallatac taunatapish saqui— nirca.

Shina nicpi, Judaca tucui pai nishcacunata cushpa, chai huarmipi chayarirca. Chaimantami chai huarmica huicsayuc tucurca. 19Chai quipaca chai huarmica jatarishpa rircallami. Chashna rishpami, ñahui taparina pañota anchuchishpa, viuda churanata cutinllatac churarirca.

20Judaca chai huarmiman pai saquimushca prendata apamuchunmi, paipac ricsishca Adulam runata chivo manadamanta shuc chivota saquichun cacharca. Shina rishpapish, chai huarmitaca mana tarircachu. 21Chaimantami chai llactapi causaccunataca:

—¿Maipitac Enaim ñan cuchullapi causac cullquimanta huainayac huarmica?— nirca.

Shina nicpimi paicunaca:

—Caipica pi huainayac huarmi mana tiyanchu— nirca.

22Shina nicpi, chai runa Judapacman cutishpaca:

—Mana pi huarmihuan tupanichu. Shinallatac chaipi causac runacunaca: “Caipica pi huainayac huarmi mana tiyanchu” nincunami— nirca.

23Shina nicpimi Judaca:

—Shinashpaca ama pi ñucanchicta pingaichichunca, chai japishcacunahuan saquirichun. Ñucaca cai chivota cacharcanimi, shinapish canca mana tarishcanguichu— nirca.

24Quimsa quilla quipami Judamanca:

—Cambac nuera Tamarca maijan carihuanchari chayarishpa, huicsayuc tucushcami— nishpami huillarca.

Shina huillacpimi Judaca:

—¡Chaimanta llucchishpa, rupachichic!— nirca.

25Ashtahuanpish chaimanta llucchicucpimi, Tamarca paipac suegromanca: «Caicunata saquic runapactami huicsayuc cani» nishpa, sello sortejastapish, racu puchcatapish, taunatapish ricuchishpa:

—¿Caicunaca pipactac?— nirca.

26Shina nicpimi, Judá chaicunata ricsishpaca:

—Ñucaca Sela huambra jatun cacpipish, mana curcanichu. Chaimantaca paica allitami ruhuashca— nirca.

Shina nishpami, mana ashtahuan chai huarmipi chayarirca.

27Tamar sajuarina punzha chayacpica, paipac huicsapica ishcai huahuami cashcarca. 28Sajuarina punzhapica shuc huahuami maquita llucchirca. Chaimantami comadronaca shuc puca puchcahuan maquipi huatashpaca: «Paimi punta llucshic» nirca. 29Shina cacpipish, chai huahuapac maquica cutin chingaricpimi, caishuc huauquirac llucshirca. Chaimantami comadronaca: «Can ñanta pascashcamantaca Fares shutimi cangui» nirca. 30Chai quipami chai puca puchcahuan maquipi huatashca huahuaca huacharirca. Chai huahuataca Zeratami shutichirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index