Search form

GÉNESIS 41

Faraón muscushca imata nisha nishcata José huillashcamanta

1Ishcai huata quipami, Faraonca shuc muscuita muscurca. Paica Nilo yacu ladopi chayacushcatami muscurca. 2Chai yacumanta canchis huira vacacuna llucshishpa, sacha ucupi micucuctami ricurca. 3Cutin chai vacacunapac quipataca canchis tullu millanayaipac vacacunami yacumanta llucshishpa, chai yacu patapi shayacuc huira vacacunapac ladopi shayarirca. 4Chai tullu vacacunaca chai huira vacacunata micushpa tucuchirca.

Faraonca chai ratomi riccharirca. 5Shina riccharishpaca, cutinllatacmi sueñurca. Chashna sueñushpaca, cutinmi muscurca. Chai muscuipica shuc yurallamanta racu canchis trigo uma llucshicuctami ricurca. 6Chai quipaca ñañuyashca, inti llucshina ladomanta huaira huactashca canchis trigo uma llucshicuctami ricurca. 7Chai ñañuyashca trigo umacunaca caishuc canchis racu grano trigo umacunatami micushpa tucuchirca.

Chai rato Faraón riccharishpaca muscuilla cashcatami yuyarca. 8Tutamanta paipac shungupi chai yuyailla cashpami, Egipto llactapi causac jatun yachaccunata cayachun cacharca. Paicuna shamucpica, tucui muscushcatami huillarca. Shina huillacpipish, chai muscushca imata nisha nicushcataca pi mana huillai pudircachu. 9Chashna pi mana huillacpimi, vinota serviccunata mandacca:

—Cunanmi ñuca mana alli ruhuashcataca yuyarini. 10Can jatun mandac canta serviccunahuan piñarishpa, tandata ruhuaccunata mandac ñucata cuidac soldadocunata mandacpac huasipi prezu churarcangui. 11Chaipimi shuc tutaca tandata ruhuaccunata mandacpish, ñucapish shuc muscuita muscurcanchic. Chai muscuicunaca paipish, ñucapish ima tucunatami huillacushca carca. 12Chaipimi cuidac soldadocunata mandacta servic shuc hebreo huambraca ñucanchic-huan carca. Ñucanchicca paimanmi ñucanchic muscushcata parlarcanchic. Chaipimi ñucanchic ishcaita ima tucuna cashcata huillarca. 13Tucui pai ima shina nishca shinallatacmi pactarca. Ñucaca, ñuca imata ruhuana cashcallamantacmi cutircani. Cutin caishucca huarcushpa sipishcami carca— nirca.

14Chashna nicpimi, Faraonca Joseta cayachun cacharca. Shina cachacpimi, paitaca carcelmanta llucchirca. Chashna huillacpimi, Joseca barbasta anchuchishpa, shuctac churanata churarishpa, Faraonpacman rirca. 15Shina ricpimi, Faraonca Josetaca:

—Ñucami shuc muscuita muscurcani. Chai muscui imata nisha nishcata huillacca pi mana tiyanchu, ashtahuanpish muscushcata uyashpa, imata nisha nicushcata can huillaclla cashcatami uyarcani— nirca.

16Shina nicpimi Joseca:

—Chaitaca Diosmi huillachin. Diosmi can jatun mandac Faraonpac allipac huillanga— nirca.

17Shina nicpimi, Faraonca Josetaca:

—Ñuca muscuipica Nilo yacu patapimi shayacushca carcani. 18Chai yacumantaca canchis huira vacacuna llucshishpami, sacha ucupi micucurca. 19Chai quipaca canchis tullu millanayaipac vacacunami llucshirca. Chashna vacacunataca tucui Egiptopi jaicapi mana ricushcanichu. 20Chai tullu vacacuna shamushpaca, chai punta llucshic huira vacacunatami micushpa tucuchirca. 21Shina micushpapish mana micushca shinallatacmi carca. Chaica ñaupaman cashca shinallatacmi, millanayaipac tullullatac carca. Shina muscushpaca riccharircanimi. 22Cutin sueñushpaca, shuc yurallamanta canchis racu grano jundashca trigo uma llucshicuctami muscurcani. 23Chai quipaca inti llucshina ladomanta huaira huactashca, ñañuyashca canchis trigo uma llucshicuctami muscurcani. 24Chai ñañuyashca trigo umacunami caishuc sumac umacunata micurca. Chai muscushcataca yachaccunaman huillarcanimi. Ashtahuanpish chai muscushca imata nisha nicushcataca mana pi huillarcachu— nirca.

25Shina nicpimi, Joseca Faraontaca:

—Can muscushcaca shucllami can. Diosmi can Faraonman imata ruhuagricushcata huillashca. 26Canchis sumac vacacunaca canchis huatatami nisha nin. Canchis racu trigo umapish canchis huatatami nisha nin. Cai ishcai muscushcaca shucllatami nisha nin. 27Quipata llucshic canchis millanayaipac tullu vacacunaca canchis huatatami nisha nin. Inti llucshina ladomanta huaira huactashca, ñañuyachishca canchis trigo umaca canchis huata jatun yarcai tiyanatami nisha nin. 28Dios can Faraonman caicunata huillashpaca, imata ruhuagricushcatami huillan. 29Riqui, shamuc huatapica cai Egipto tucui allpapica achca granomi pucunga. 30Quipa canchis huatacunapi ima mana pucucpimi, yallimana yarcaimi tiyanga. Chashna ima grano mana pucucpimi, ñaupaman tucui Egipto allpapi achca pucushcataca mana yuyaringacuna. Chai yarcaimi tucui llactapi causaccunata llaquichishpa tucuchinga. 31Chashna yalli yarcai tiyacpimi, ñaupaman achca pucushcapish mana pucushca shinallatac canga. 32Diosca ruhuagricushpatacmi can Faraonman ishcai cutin muscuchishca, chaitaca utcami ruhuanga.

33Chaimanta can Faraonca alli yachac, tucuita entendic runata cai Egipto allpacunata ricuchun churai. 34Can Faraonca cai Egipto llactapi pucushca granota chunga cushtalmanta ishcai cushtalta cai canchis huatacunapi tandachichun mandai. 35Paicunami cai achca pucuc huatapica tandachishpa, can Faraonpac maquipi huacaichinga. Chashna llactacunapi huacaichicpimi, quipaman micunaca tiyanga. 36Chashna micunata huacaichicpimi, cai Egipto llactapi canchis huatacunata yarcai tiyacpica, micunata charinga. Chashna tiyacpimi, cai llactapi causaccunaca mana yarcaihuan huañunga— nirca.

José Egipto llactapi mandac tucushcamanta

37José nishcaca Faraonmanpish, serviccunamanpish allimi carca. 38Chaimantami Faraonca paita serviccunataca:

—¿Diospac Espirituhuan cac cai shina runataca maipi tarishunchu?— nirca.

39Shina nishpami, Faraonca Josetaca:

—Tucui caicunataca Diosmi canmanca yachachishca, can shina yachac yuyaisapa runaca maipi mana tiyanchu. 40Canmi ñuca huasitapish mandangui. Tucui llactacunapi causaccunami cantaca cazunga. Ñucallami jatun mandac cashcamanta canta yalli casha. 41Ñucami tucui Egipto llactata mandachun churani— nirca.

42Chai quipami, Faraonca paipac maquimanta sortejasta llucchishpa, Josepac maqui dedopi churachirca. Shinallatac sumac lino churanata churachishpami, cungapica sumac curi cadenata churachirca. 43Quipaca Faraonca paipac shuctac carretapi Joseta huichicuchishpami: «¡Josepac ñaupapica cungurichicyari!» nishpa caparirca. Shinami Josetaca tucui Egipto llactata mandachun churarca.

44Chai quipami Faraonca Josetaca:

—Ñucami Faraón cani. Chaimanta tucui cai Egipto llactapica can mana mandacpica, pipish imata mana ruhuangacunachu— nirca.

45Chashna nishpaca Faraonca Josetaca Zafnat-paneatami shutichirca. Shinallatac On llactapi causac Potifera curapac ushi Asenathuanmi cazarachirca. Chaimantami Joseca tucui Egipto llactata mandac tucurca.

46José Egipto llactata jatun mandac Faraonta servinata callarishpaca, quimsa chunga huatatami charirca. Mandac Faraonpac ñaupamanta José rishpaca, tucui Egipto allpacunatami ricushpa purirca. 47Chai canchis alli huatapica yallimi granoca Egipto llactapica pucurca. 48Chai canchis huatapi grano pucushcatami tandachishpa, tucui cuchulla llactacunapi huacaichirca. 49Joseca trigotaca mama cucha tiyu shinatami tandachirca. Yalli achca grano cacpimi, mana yupai pudishpa huacaichircalla.

50Manarac yarcai huatacuna chayamucpimi, Joseca ishcai churicunata charirca. Chai churicunataca On llactapi causac Potifarpac ushimi sajuarirca. 51Chai punta churitaca: «Diosmi ñuca llaquicunatapish, ñuca taitapac huasi ucupuracunatapish cungachishca» nishpami, Manasesta shutichirca. 52Quipa churitaca: “Diosmi ñuca llaquita apashca llactapi churicunayucta ruhuashca” nishpami, Efrainta shutichirca.

53Shinami Egipto llactapi canchis huatacuna alli grano pucuna huataca tucurirca. 54Quipaca José huillashca shinallatacmi canchis huata yalli yarcaica tucui llactacunapi callarirca. Ashtahuanpish Egipto llactapica achca granomi tiyarca. 55Tucui Egipto llactapi causaccunata yarcai japicpica, Faraonmanmi micunata cui ningapac rircacuna. Shina ricpimi, Faraonca tucui Egiptopi causaccunataca: «Josepacman rishpa, pai ima nishcata ruhuaichic» nirca.

56Tucui Egipto llactapimi yarcaica tiyarca. Chaimantami Joseca granota huacaichishcata pascashpa, Egipto llactapi causaccunaman catui callarirca. Egipto llactapi ashtahuan yarcai caticpimi, chashnaca ruhuarca. 57Tucui llactacunapi ashtahuan yarcai tiyacpimi, micunata Joseman randingapac Egipto llactaman shamurca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index