Search form

GÉNESIS 43

Benjaminta huauquicuna Egiptoman pushashcamanta

1Canaanpica yalli yarcaimi catirca. 2Egiptomanta apamushca grano ña tucuricpimi, Jacoboca paipac churicunataca:

—Cutinllatac Egiptoman cutishpa, asha granota ñucanchicman randimugrichic— nirca.

3Shina nicpimi Judaca:

—Chai mandacca cutin cutinmi: “Cancunapac huauquita mana pushamushpaca, ñuca ñahuipi amatac ricuringuichicchu” nirca. 4Ñucanchic huauquita ñucanchic-huan cachacpica, rishpa granota randigrishunllami. 5Ashtahuanpish ñucanchic-huan mana cachacpica, mana rishunchu. Chaica, chai llactata mandacca: “Cancunapac huauquita mana pushamushpaca, ñuca ñahuipi amatac ricuringuichicchu” nircami— nirca.

6Shina nicpimi, taita Israelca:

—¿Ima nishpatac shuctac huauquita charishcata chai mandacman huillashpa, ñucataca mai llaquichinguichic?— nirca.

7Shina nicpimi paicunaca:

—Chai mandacca ñucanchicmantapish, ñucanchic familiamantapish tapushpaca: «¿Cancunapac taitaca causacunracchu? ¿Shuctac huauquita charinguichicchu?» nishpa tapurca. Shina tapucpica, pai tapushca shinallatacmi huillarcanchic. Ñucanchicca: «Cancunapac huauquita pushamunguichic» nigricushcataca, ¿ima shinatac yachanchicman carca?— nirca.

8Judaca paipac taita Israeltaca:

—Canpish, ñucanchicpish, ñucanchic uchilla huahuacunapish ama yarcaihuan huañungapacca, huambrata ñucanchic-huan cachailla. Shina cachacpica, jatarishpa rishunllami. 9Ñucami paitaca cutichimusha. Mana cutichimucpica, ñucata juchanchingui. Mana cutichimushpa, cambac ñaupapi mana churashpaca, ñucami huiñaita cambac juchanchishca casha. 10Caipi mana yallita unaiyashpaca, ñami ishcai cutin rishpa, cutinchicman carcanchic— nirca.

11Shina nicpimi, taita Israelca:

—Shina cana cacpica, chashna ruhuaichiclla. Chai mandacman convidangapac cai allpapi imalla tiyashca ashtahuan allicunata cancunapac tulupi churashpa apaichic. Asha bálsamo jambitapish, asha mishquitapish, mishquilla ashnacuctapish, mirra jambitapish, tuctitapish, almendracunatapish apaichic. 12Cullquitaca cutimushca cullquimanta chaupihuan yallita apaichic. Tulu shimipi cutishca cullquica pacta pandarishca canman. Chaita cutichingapac apaichic. 13Shinallatac cancunapac huauquita pushashpa, chai mandacpacman richic. 14Imatapish ruhuaclla Diosllatac chai mandacpac ñaupapi cancunata llaquishpa huacaichichun. Caishuc huauquitapish, Benjamintapish cacharichun, ashtahuanpish ñuca churicuna illaclla saquirina cacpica, saquirishachari— nirca.

15Shina nicpimi, paicunaca convidanacunatapish, chaupihuan yalli cullquitapish apashpa, Benjamintapish pushashpa, Egiptoman urai rircacuna. Chashna rishpami, Josepacman chayarca. 16Joseca Benjaminta paicunahuan cacta ricushpami, paipac mayordomotaca:

—Cai runacunata ñuca huasiman pushai, shinallatac shuc vacata huañuchishpa, micunata yanui. Cunan chaupi punzhaca paicunaca ñucahuanmi micunga— nirca.

17Chai mayordomoca José nishca shinallatac ruhuashpami, chai runacunataca Josepac huasiman pusharca. 18Shina Josepac huasiman pushacpimi, paicunaca mancharishpa:

—Punta shamuipi ñucanchic tulucunapi cullquita cutichishpa apashcamantami ñucanchictaca tucllahuan shina japishpa, burrocunandi paita servichun pushamushca yuyachin— ninacurca.

19Chaimantami paicunaca chai huasi yaicunaman cuchuyashpa, Josepac mayordomohuan 20parlashpaca:

—Ñucanchic mandaclla, punta cutinca ñucanchicca granota randingapactacmi shamurcanchic. 21Ñucanchic samanaman chayashpa, tulucunata pascacpica, ñucanchic cullquica tucuimi tiyacushca carca. Chaitami cunanca cutichingapac shamunchic. 22Ashtahuan granota randingapacpish cullquita apamurcanchicmi. Shina cashpapish, chai punta shamuipi ñucanchic tulucunapi cullquita pi churashcataca mana yachanchicchu— nirca.

23Shina nicpimi, chai mayordomoca:

—Ama manchaichicchu, cushilla chai cullquihuanca saquirichiclla. Cancunapac, shinallatac cancunapac taitapac Diosllatacmi cancunapac tulupi cullquita churashpa cushca. Ñucaca cancuna cushca cullquitaca chasquircanimi— nirca.

Chashna nishpami, Simeonta llucchishpa, paicunaman curca. 24Shinami chai mayordomoca paicunata Josepac huasiman pushashpa, yacuta curca. Chashna cucpica, chaquicunata jahuarircami. Shinallatac burrocunamanpish micunata cararcami. 25José chaupi punzha chaipi micungapac shamuna cashcata yachashpami, pai shamungacamanca paicuna convidanacunata cungapac allichirca.

26José huasiman chayamucpica, paicuna apamushca convidanacunata apamushpami, paipac ñaupapi pambacaman cumurirca. 27Chashna cumuricpica, Joseca paicuna ima shina cashcata tapushpaca:

—¿Cancuna parlashca yuyac taitaca causacunracchu? ¿Allillachu causacun?— nishpa tapurca.

28Shina tapucpimi paicunaca:

—Canta servic ñucanchic taitaca allillami, causacunracmi— nirca.

Shina nishpami, cungurishpa cumurircacuna. 29Joseca huichailla ricushpaca, paipac mamapac huahua Benjaminta ricushpaca:

—¿Paichu cancuna parlacushca quipa huauquica? nishpami, ñuca huahualla, Dios canta bendiciachun— nirca.

30Joseca paipac huauquita ricushpa, cushicuihuan huacanayai japicpimi, utcashpa paipac ucuman yaicushpa, chaipi huacacurca. 31Ña huacanayai pasaricpimi, ñahuita jahuarishpa canzhaman llucshishpaca:

—Cunanca micunata caraichiclla— nirca.

32Chashna nicpimi, Josemanca chican mizapi, cutin Jacobopac churicunamanca chican mizapi cararca. Utcapi Josehuan micuc Egipto runacunamanpish chican mizapimi cararca. Egipto runacunaca hebreocunahuan micunataca millanayachicmi carca. Chaimantami paicunahuan tandanacushpaca mana micuc carca. 33Jacobopac churicunataca punta churimanta callarishpami, quipa churitaca Josepac ñaupapi tiyachirca. Shina tiyachicpi, chai runacunaca caishuc chaishuc mancharinacushpa, ñahuipura ricunacurca. 34Joseca paipac platomanta micunata japishpami, paicunaman curca. Shina cushpapish, Benjaminmanca caishuc huauquicunamanta pichca cutin yallihuanmi curca. Chashnami Josehuan micushpa, ubiashpa cushicurca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index