Search form

GÉNESIS 44

Josepac cullqui vasomanta

1Micushca quipami, Joseca paipac mayordomotaca:

—Cai runacunapac tulucunapi mashna apaipacta granota jundachishpa, tucui tulu shimicunapi cullquita churai. 2Quipa huauquipac tulu shimipica ñuca cullqui vasotapish, trigomanta pagashca cullquitapish churai— nishpa mandarca.

Chai mayordomoca José mandashca shinallatacmi ruhuarca. 3Tutamanta ña achicyamucucpica, Josepac huauquicunaca caya minchacaman nishpami, burrocunahuan llucshirca. 4Paicuna chai llactamanta llucshishpa, manarac caruta ricpimi, Joseca paipac mayordomotaca:

—Chai runacunata catishpa ri, paicunata japishpaca: “Cancunaman allita ruhuashca jahuamari ñucata mana allita ruhuanguichic. ¿Ima nishpatac ñuca amopac cullqui vasota shuhuamurcanguichic? 5Ñuca amoca chai vasopimi ubiac carca. Chai vasoca adivinangapacpishmi carca. Chaita shuhuashpami, mana allita ruhuamushcanguichic” ningui— nirca.

6Chashna nicpica, mayordomo cati rishpa japishpaca, José yachachishca shinallatacmi nirca. 7Chashna nicpica paicunaca:

—Ñucanchic mandaclla, ¿ima nishpatac ñucanchictaca cashna juchanchingui? Ñucanchicca, ¿maitatac chaitaca ruhuashunyari? 8Ñucanchic tulu shimicunapi tarishca cullquitapish Canaanmanta apamushpami cutichircanchic. ¿Chashna cashca jahuachu cambac amopac huasimantaca, cullquita, curita shuhuanchicman carca? 9Canta servic ñucanchicpurapi maijan chai vasota charicucca huañunami can. Cutin tucui ñucanchicca canta serviccunami tucushun— nirca.

10Shina nicpimi, chai mayordomotaca:

—Cunanca, cancuna nishca shinallatac maijanpac tulupi chai vaso tariricpica, paica ñucata servingapacmi saquiringa. Cutin cancunaca mana juchanchishcachu canguichic— nirca.

11Shina nicpimi, utcashpa paicunapac tulucunata pambaman uricuchishpa, tucui mashna pascarca. 12Chashna pascacpica, punta huauquipac tulumanta callarishpa, mashcashpami quipa huauquipac tulupi chai vasotaca tarirca. 13Chashna taricpica, munai llaquirishpa, paicunapac churanata lliquishpami, quiquin burrocunapi grano tulucunata apachishpa, chai llactaman cutirca.

14Judaca José huasipi cacpiracmi, paipac huauquicunahuan chayarca. Chashna chayashpami, Josepac ñaupapi pambacaman cumurirca. 15Chaimantami Joseca:

—¿Imatatac ruhuarcanguichic? Ñucaca pacashcatapish yachac cashcataca, ¿manachu yacharcanguichic?— nirca.

16Shina nicpimi Judaca:

—Ñucanchic canta serviccunaca, Diospac ñaupapica mana allitami ruhuashcanchic. Ñucanchic mandaclla, ¿imatatac nishun? ¿Ima shinatac ñucanchicca mana juchayucchu canchic nishunyari? Riqui, ñucanchic mandaclla, canta serviccunami canchic. Ñucanchicpish, vasota apacpish canta serviccunami canchic— nirca.

17Shina nicpimi Joseca:

—¿Maitatac chaitaca ruhuashayari? Maijanmi chai vasota apacllami ñucata servingapac saquiringa. Cancunaca pi mana juchanchishca cushilla taitapac huasiman cutichiclla— nirca.

Judá Benjaminta cacharichun mañashcamanta

18Judá Josepacman cuchuyashpaca:

—Ñuca mandaclla, canca Faraón shinallatacmi cangui. Chaimanta canta servic ñucami, can mandac-huan ashata parlasha nini. Canta servic ñucata ama piñarishpalla caita uyai. 19Can mandacmi canta servic ñucanchictaca: “¿Cancunaca taitata, mana cashpaca shuctac huauquita charinguichicchu?” nishpa tapurcangui. 20Chashna tapucpi, ñucanchicca can mandacmanca: “Shuc yuyac taitatapish, ñucanchic taita yuyac cashpa charishca uchilla huauquitapish charinchicmi. Paipac shuc huauquica ña huañurcami. Paillami mamapac huahuacunapuramantaca saquirirca. Paitami taitaca yallita cuyan” nircanchic. 21Shina nicpi, canta servicca ñucanchictaca: “Paita ricsingapac pushamugrichic” nircanguimi. 22Chaimantami ñucanchicca can mandactaca: “Paica, paipac taitata mana saqui pudinchu. Pai saquicpica, paipac taitaca huañungami” nircanchic. 23Shina nicpi, ñucanchic canta servictaca: “Cancunapac quipa huauquita mana pushamushpaca, ñuca ñahuipi amatac ricuringuichicchu” nircanguimi.

24Chai quipami canta servic ñucanchic taitapacman chayashpaca, can nishca shinallatac tucuita huillarcanchic. 25Ñucanchic taitaca: “Cutinllatac chai llactapi asha granota randigrichic” nishpami cacharca. 26Shina nicpimi ñucanchicca: “Ñucanchic quipa huauqui ñucanchic-huan mana ricpica, mana ri pudinchicchu. Ñucanchic quipa huauquillahuanmi chai mandacpac ñahuipica ricurigri pudinchic” nircanchic. 27Shina nicpi, canta servic ñucanchic taitaca: “Ñuca huarmica ishcai cari huahuallatami charirca. Chaitaca cancunallatac yachanguichicmi. 28Chai ishcaimanta shucca ñuca ñaupamanta rishpami chingarirca. Paitaca ima sacha animalcunami pitinacushca canga yuyanimi. Paitaca mana ashtahuan ricushcanichu. 29Shuctac churitapish ñuca ñaupamanta pushacpi, ñanpi ima llaqui tucucpica, ñuca yurac acchayuc rucuca paimanta llaquirishpa, huañushpa Seolman rishami” nirca.

30Chai churihuanca tucui shunguhuanmi ñuca taitaca cuyanacun. Cunan, canta servic ñucanchic taitapacman cai huambrahuan mana chayacpi, 31paita ñucanchic-huan mana ricushpaca huañungami. Canta servic ñucanchicmantami ñucanchic yurac acchayuc taitaca llaquirishpa, huañushpa Seolman ringa. 32Canta servic ñucami ñuca taitataca: “Cai huambrataca cutichimushatacmi, cai huambrata mana pushamushpaca, ñucami ñuca taitapac ñaupapica huiñaita juchanchishca casha” nishpa apamurcani. 33Chaimanta cunanca, canta servic ñucata cai huambrapac randi servichun saquichic, paitaca caishuc huauquicunahuan richun saqui. 34¿Ima shinatac ñuca taitapacmanca cai huambra illacllaca chayagrishayari? Ñuca taita huambrata mana ricushpa, llaquiricucta ricushpaca, ñucapish llaquirishami— nirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index