Search form

GÉNESIS 45

Paipac huauquicuna ricsichun José saquishcamanta

1Joseca paipac ladopi caccunapac ñaupapi huacanayaihuan mana jarcari pudishpami, paita serviccunata caparishpaca:

—Ñucapac ñaupamanta tucui canzhaman llucshichic— nirca.

Chashna tucui canzhaman llucshicpimi, Joseca paicunapac huauqui cashcata ricsichirca. 2Chashna ricsichishpami, Joseca caparishpa huacai callarirca. Chaitaca Egipto runacunapish, Faraonpac huasipi causaccunapish uyarcami. 3Joseca paipac huauquicunataca:

—Ñucaca Josemi cani. Ñuca taitaca, ¿causacunracchu?— nirca.

Chashna nicpica, paicunaca upayashpa, imatapish mana ni pudircacunachu. 4Chashna cacpimi Joseca:

—Ñucapacman cuchuyaichic— nirca.

Shina cuchuyacpimi paica:

—Ñucaca cancuna Egiptoman catushca, cancunapac huauqui Josemi cani. 5Cunanca, ama llaquirichicchu. Caiman catushpa cachashcamantapish ama shungupi nanarichicchu. Mana cancunapac munaimantachu cacharcanguichic, ashtahuanpish Diosmi cancuna ama yarcaihuan huañuchun, ñaupachishpa ñucataca cacharca. 6Ña ishcai huatatami jatun yarcai tiyashca. Chairac pichca huatata yarcai tiyangaracmi. Chai huatacunapica yapunapish, cosechanapish ima mana tiyangachu. 7Cancunapish, cancunapac huahua huahuacunapish causaita charichun, shinallatac cancunata cushicuihuan cacharichichunmi, ñucata ñaupachishpa cacharca. 8Shinaca, mana cancunachu ñucataca caiman cacharcanguichic, ashtahuanpish Diosmi Faraonta cunachun, paipac huasipi mandac cachun, shinallatac tucui Egipto llactapi mandac cachun ñucata cacharca. 9Cunanca, ñuca taitapacman utca rishpa, cambac churi Joseca: “Ñucataca Diosmi tucui cai Egipto llactata mandac cachun churarca. Utcashpa ñucapacman shamui. 10Canpish, cambac huahua huahuacunapish, paicunapac huahuacunapish, tucui animalcunata, tucui ima charishcacunata apashpa, Gosén llactapi causangapac shamui. Chaipi causashpami, ñuca ladollapi causangui. 11Caipica canmanpish, cambac familiamanpish ima mana illangachu. Shinallatac animalcunamanpish micuna mana illangachu. Chai llactapica pichca huatata yarcai tiyangaracmi” nishpa huillanguichic. 12Cancunapac ñahuihuan, ñuca huauqui Benjaminpac ñahuihuanmi ñuca cancunahuan imata nicushcataca ricunguichic. 13Egipto llactata allita mandacuctapish, cai llactapi tucui ricushcatapish, ñuca taitaman huillagrichic. Chaimanta utcashpa ñuca taitata pushamugrichic— nirca.

14Shina nishpami, Joseca paipac huauqui Benjaminta ucllarishpa huacarca. Benjaminpish Joseta ucllarishpa huacarcami. 15Joseca tucui huauquicunahuan ucllarishpami huacarca. Chai quipami, Josepac huauquicunaca paihuan parlarca.

16Faraonpac huasipi caccunapish «Josepac huauquicuna shamushcami» nishcatami uyarca. Chaita uyashpami, Faraonpish, paita serviccunapish cushicurca. 17Chaimantami Faraonca Josetaca:

—Cambac huauquicunataca: “Cancunapac animalcunapi apachishpa, Canaanman cutichic. 18Cancunapac taitatapish, familiatapish ñucapacman pushamugrichic. Ñucaca cai Egiptopi tiyac alli allpata acllashpami cusha. Cai allpapi sumac grano pucushcatami micunguichic” nigri. 19Cutin canca: “Paicunapac huahuacunatapish, huarmicunatapish pushamungapac cai Egiptomanta carretacunata apaichic, shinallatac taitatapish caiman pushamuichic. 20Canaanpi ima charishcacunataca ama llaquishpa saquimuichiclla, cai Egipto llactapi tucui alli tiyashcacunaca cancunapacmi canga” nishpa mandai— nirca.

21Chashnami taita Israelpac churicunaca ruhuarca. Joseca Faraón mandashca shinallatacmi carretacunatapish, ñanpi micuna cucayutapish curca. 22Tucui paicunamanmi mushuc churanacunata cushpa, Benjaminmanca quimsa patsac cullquitapish, pichca mushuc churanatapish curca. 23Cutin paipac taita ñanpi micuchunca, chunga burropica Egiptopi tiyashca tucuimanta yalli allicunata apachishpa, cutin shuctac chunga burropica trigotapish, micunatapish apachishpami cacharca. 24Paipac huauquicuna caya minchacaman nishpa ricpimi Joseca:

—Ñanpi ama piñanacunguichicchu— nishpa cacharca.

25Shinami Egiptomanta rishpa, Canaanman chayashpa, paicunapac taitapacman chayarca. 26Taita Jacobopacman chayashpaca:

—Joseca causacushcaracmi, paica tucui Egipto llactatami mandacun— nishpami huillarca.

Shina huillacpica, taita Jacoboca mana crishpami upayashpa saquirirca. 27Jacobomanca José nishca shinallatacmi paicunaca tucui huillarca. Jacoboca paita apachun, José cachashca carretacunata ricushpami, paipac shungupica cushicurca. 28Chaimantami taita Israelca:

—¡Ñuca churi Joseca causacushcaracmi! Cunanca manarac huañushpa ricugrisha, chaillatacmi yachasha nircani— nirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index