Search form

GÉNESIS 46

Jacobo paipac familiacunandi Egiptopi causagrishcamanta

1Shinami taita Israelca tucui imalla charishcacunata pushashpa, Beersebaman chayarca. Chaipimi paipac taita Isaacpac Diosman animalta cushpa rupachirca. 2Chaipimi Diosca Israelman tuta muscuipi shina ricurishpaca:

—Jacobo, Jacobo— nirca.

Shina nicpimi Jacoboca:

—Caipimi cani— nirca.

3Chashna nicpimi Diosca:

—Ñucaca Diosmi cani, cambac taitapac Diosmi cani. Egipto llactapimi cambac huahua huahuacunamantaca jatun llactata ruhuasha. Chaimanta ama manchashpa, chaiman rilla. 4Ñucami cancunahuanca Egipto llactaman urai risha, shinallatac ñucallatacmi caiman cutichimusha. Can huañucpica, Josemi cambac ladopi canga— nirca.

5Chai quipami Jacoboca Beersebamanta ringapac jatarirca. Paipac churicunami Faraón cachashca carretacunapi taita Jacobotapish, paicunapac huahuacunatapish, huarmicunatapish tiyachishpa pusharcacuna. 6Paicunapac huagracunatapish, Canaán llactapi imalla charishcacunatapish apashpami, Jacoboca paipac huahua huahuacunandi Egiptoman rirca. 7Paipac tucui huahua huahuacunata pushashpa, churicunandi, ushicunandi, nietocunandi, nietacunandimi Egipto llactaman rirca.

8Egipto llactaman yaicuc Israelpac churicunaca: Punta churica Rubenmi carca. 9Rubenpac churicunaca: Hanoc, Falú, Hezrón shinallatac Carmimi carca. 10Simeonpac churicunaca: Jemuel, Jamín, Ohad, Jaquín, Zohar shinallatac cananea huarmipi charishca Saulmi carca.

11Levipac churicunaca: Gersón, Cohat, Merarimi carca.

12Judapac churicunaca: Er, Onán, Sela, Fares, Zarami carca. Shinallatac Er, Onanca Canaán llactapimi huañurca. Farespac churicunaca: Hezrón, Hamulmi carca.

13Isacarpac churicunaca: Tola, Fúa, Job, Simronmi carca.

14Zabulonpac churicunaca: Sered, Elón, Jahleelmi carca.

15Paicunami Padan-aram llactapi causacushpa, Jacobo Lea huarmipi charishca huahuacunaca. Shinallatac Dina ushitapish charircami. Tucui churicunandi, ushicunandica quimsa chunga quimsami carca.

16Gadpac churicunaca: Zifión, Hagui, Ezbón, Suni, Eri, Arodi, Arelimi carca. 17Aserpac churicunaca: Imna, Isúa, Isúi, Beriami carca. Paicunapac panica Serami carca. Beriapac churicunaca: Heber, Malquielmi carca. 18Paicunami Jacobo Zilpa huarmipi charishca huahuacunaca carca. Zilpataca Labanmi paipac ushi Leata servichun curca. Chai huarmipac huahuacunata yupacpica, chunga suctami carca.

19Jacobopac huarmi Raquelpac huahuacunaca: José, Benjaminmi carca.

20Joseca Egiptopi causacushpami, Asenat huarmipi Manasés, Efraín churicunata charirca. Asenatca On llactapi causac Potiferapac ushimi carca.

21Benjaminpac huahuacunaca: Bela, Bequer, Asbel, Gera, Naamán, Ehi, Ros, Mupim, Hupim, Ardmi. 22Paicunami Jacobo Raquel huarmipi charishca huahuacunaca. Tucui paicunaca chunga chuscumi carca.

23Danca Husim churitami charirca.

24Neftalipac churicunaca: Jahzeel, Guni, Jezer, Silemmi carca.

25Labán paipac ushi Raquelman servichun cushca Bilha huarmipi Jacobo charishca huahuacunaca canchismi carca.

26Jacobomanta mirarishca tucui churicunahuanmi Egiptoman rirca. Paipac churicunapac huarmicunata mana yupashca, tucui gentecunaca sucta chunga suctami rirca. 27Egipto llactapi huacharishca Josepac churicunaca ishcaimi carca. Paicunandi tandachicpica, Jacobopac huasi ucupuraca canchis chungami Egiptoman carca.

28Jacoboca Gosén llactapi José tupac shamuchunmi Judata ñaupachishpa cacharca. Paicunaca Gosén llactamanmi chayarca. 29Chaita yachashpami, Joseca paipac carretata allichishpa, Gosén llactapi paipac taita Jacobota tupangapac rirca. Paipac taitapac ñaupapi ricurishpaca, cungapi ucllarishpami, unaicaman huacarca. 30Shina huacacucpimi, taita Israelca Josetaca:

—Can causacushcataca ñuca ñahuihuanmi ricuni, cunanca ña huañunallami cani— nirca.

31Shina nicpimi, Joseca paipac huauquicunatapish, paipac taitapac huasi ucu familiatapish rimashpaca:

—Faraonpacmanmi rini, chaiman chayashpaca: “Canaanpi causac ñuca huauquicunapish, ñuca taitapac huasi ucu familiapishmi ñucahuan causangapac shamushca. 32Paicunaca oveja michiccunami. Chaimantami ovejacunatapish, vacacunatapish, tucui ima charishcacunatapish pushashpa shamushca” nishpami huillasha. 33Faraón cancunata cayashpa: “¿Imatac ruhuashpa causaccunata canguichic?” nicpica, 34cancunaca: “Canta servic ñucanchicca, ñucanchic ñaupa taitacuna shinallatac huambramanta pacha animalcunata michishpa causaccunami canchic” ninguichic. Shinami Gosén llactapi causai pudinguichic. Egipto runacunaca tucui ovejata michiccunataca millanayachishpa piñancunami— nirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index