Search form

GÉNESIS 47

1José Faraonman huillangapac chayashpaca:

—Ñuca taitami ñuca huauquicunandi paicunapac ovejacunatapish, vacacunatapish, tucui ima charishcacunapish apashpa, Canaán llactamanta shamushca. Cunanca Gosén llactapimi— nirca.

2Chaita nishca quipaca pichca huauquicunatami Faraonman ricsichingapac pushamurca. 3Shina chayacpimi, Faraonca Josepac huauquicunata:

—¿Cancunaca imatac ruhuashpa causaccunata canguichic?— nirca.

Shina nicpimi paicunaca:

—Canta servic ñucanchicca, ñucanchic ñaupa taitacuna shinallatac ovejacunata michiccunami canchic. 4Ñucanchicca Canaán llactapi yalli yarcai tiyacpi, shinallatac ovejacunamanpish micuna mana tiyacpimi, cai llactapi causanata mañac shamurcanchic. Chaimanta canta servic ñucanchictaca Gosén llactapi causachun saquiyari— nishpa mañarcacuna.

5Shina nicpimi, Faraonca Josetaca:

—Cambac taitapish, cambac huauquicunapish canhuanmi causangapac shamushca. 6Egipto llactaca cambac maquipimi. Cambac taitatapish, cambac huauquicunatapish Gosén llactapi ashtahuan alli allpapi causachun churai. Paicunapuramanta maijan alli yuyaiyuc cacpica, ñuca animalcunata ricuchun churangui— nirca.

7Joseca paipac taita Jacobotapish Faraonman ricsichingapac pusharcami. Chashna ricsichicpimi, Jacoboca Faraonta bendiciarca. 8Chai quipami Faraonca Jacobotaca:

—¿Mashna huatayuctac cangui?— nirca.

9Shina tapucpimi Jacoboca:

—Caipi, chaipi purishpa causashca huatacunaca patsac quimsa chunga huatami can. Ñucapac causai huatacunaca asha mana alli huatacunami cashca. Ñuca ñaupa taitacuna causashca shina, unai huatacunataca mana causashachu— nirca.

10Chai quipami Jacoboca Faraonta bendiciashpa, paipac ñaupamanta llucshirca. 11Chashnami Joseca paipac taitamanpish, huauquicunamanpish Faraón mandashca shina, Egipto llactapi tiyac Ramesés llactapi tucuimanta yalli alli allpata curca. 12Shinallatac Joseca paipac taitamanpish, huauquicunamanpish, tucui paipac familiamanpish mashna huahuacunata ricushpa, micunataca pacta pactami curca.

13Tucui llactacunapi ima grano mana tiyarcachu. Egipto llactapipish, Canaán llactapipish yalli yarcaimi tiyarca. Gentecunaca ña huañunallami carca. 14Joseca Egipto llactapi, Canaán llactapi tucui tiyashca cullquitami granota catushpa japirca. Joseca granomanta cullquita japishpaca, Faraonpac huasipimi tandashpa huacaichirca. 15Egipto llactapipish, Canaán llactapipish cullqui tucuricpica, Egipto runacunaca Josepacman shamushpaca:

—Granota ñucanchicman carai, ñucanchicca granotapish, cullquitapish mana charinchicchu, yarcaihuan huañugrinchicmari. ¿Cullqui illashcallamantaca imatac cambac ñaupapi huañushunyari?— nirca.

16Shina nicpimi Joseca:

—Ña cancuna cullquita mana charishpaca, animalcunata apamuichic. Cancunapac animalcunamantaca micunata cushallami— nirca.

17José chashna nicpica, Egipto runacunaca paicunapac caballocunatapish, ovejacunatapish, vacacunatapish, burrocunatapish Joseman curcami. Chashna cucpica, Joseca shuc huatapacmi micunata curca. 18Chai huata tucurishca quipa huatapish cutinllatacmi Josetaca:

—Amito, ñucanchicca mana llullanchicchu, cullquipish, animalcunapish canman cungapacca, ña mana tiyanchu, tucuimi canman curcanchic. Ñucanchiclla, shinallatac ñucanchic allpacunallami cambac ñaupapica saquirishcanchic. 19¿Imamantatac cambac ñaupapi ñucanchicca huañushun? ¿Imamantatac ñucanchic allpacunapish shitashca saquiringa? Chaimanta ñucanchicman granota cungapac ñucanchictapish, ñucanchic allpacunatapish japilla. Shina japicpica, ñucanchicca Faraonta servishunmi, shinallatac allpacunapish paipacmi canga. Cai allpacuna ama shitashca saquirichun, ñucanchic muyu shina causashpa catingapac micunata carai— nirca.

20Chaimantami Joseca tucui Egiptopi tiyac allpacunataca jatun mandacman randirca. Yallita yarcai tiyacpimi, Egipto runacunaca micunata randingapac paicunapac allpacunata caturca. Allpacunaca tucuimi Faraonpac tucurca. 21Chaimantami Faraonca Egipto llactapi tucui causaccunata servicta ruhuarca. 22Curacunapac allpacunallatami Joseca mana randirca. Faraón paicunaman granota cushpa causashcamantami curacunaca allpacunataca mana caturca— nirca.

23Chai quipami Joseca chai llactapi causaccunataca:

—Cunanca, cancunatapish, cancunapac allpacunatapishmi Faraonman randircani. Cunanca, muyuta allpacunapi tarpungapac japichic. 24Chai pucushca granomantaca chungamanta ishcai tuluta Faraonman cunguichic. Shinallatac cancuna tarpungapacpish, cancunapac huahuacunamanpish, huasi ucupi causaccunamanpish carangapac pusac tulucunata huacaichinguichic— nirca.

25José chashna nicpica paicunaca:

—¡Ñucanchicmanca causaitami cushcangui! Ñucanchicta mandacpac ñahuipica allimi ricurishcanchic. Cunanca, Faraonta servishpa causashunllami— nircacuna.

26Chashnami Joseca tucui Egipto llactapi pucushca granotaca chunga tulumanta ishcaita Faraonman cuchun mandashpa saquirca. Chai mandashcacunaca cunan punzhacamanmi tiyan. Shina cacpipish, curacunapac allpaca mana Faraonpac tucurcachu.

27Chashnami Israel runacunaca Egipto llactapi tiyac Gosén llactapi yallita mirarishpa, allpata japishpa causarca. 28Jacoboca Egiptopi chunga canchis huatata causashpaca, ñami patsac chuscu chunga canchis huatayuc tucurca.

29Taita Israel chashna ña yuyac cashpa, pai huañuna punzha ña chayamucpi, paipac churi Joseta cayachishpaca:

—Cambac ñahuipi ñuca alli ricurishca cacpi, can ñucata cuyashpaca, cambac maquita ñucapac changa jahuapi churashpa, ñuca mañashcata pactachingapac ari ni. Ñuca huañucpica, amatac cai Egiptopi enterranguichu. 30Ñuca huañucpica, ñuca taitacuna maipi enterrashcapi enterrangapac ñuca cuerpotaca cai Egiptomanta llucchishpa apanguichic. Chashna apashpaca paicunata enterrashca allpallapitac enterrangui— nirca.

Shina nicpimi Joseca:

—Ari, can nishca shinallatacmi ruhuasha— nirca.

31Shina nicpimi, taita Israelca Josetaca:

—Shinaca chaita pactachingapac ari ni— nirca.

Shina nicpimi Joseca:

—Pactachishatacmi— nishpa ari nirca.

José chashna nicpimi, taita Israelca Diosta pagui ningapac cama saunapi cumurirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index