Search form

GÉNESIS 50

1Taita Jacobo huañucpica, Joseca paipac taitata ucllarishpami, huacashpa mucharca. 2Quipaca paita serviccunatami paipac taita Israelpac cuerpo ama ismuchun, jambichun mandarca. Chashna mandacpica jambircacunami. 3Jambinaca ima shina ruhuana cashca shinallatacmi chuscu chunga punzhapi jambinata tucurirca.

Egipto runacunaca taita Israel huañushcamantaca canchis chunga punzhacamanmi sharpa churanahuan carca. 4Duelo cana punzhacuna tucuricpi, Joseca Faraonpac huasipi causaccunataca:

—Ñuca cancunapac ñahuipi alli ricurishca cacpica, Faraontaca: 5“Ñuca taita huañugricushpaca: ‘Canaán llactapi ñuca allichishca enterrana jutcupi enterrangui’ nishpa, ñucataca Diospac shutipi ari nichirca. Cunanca ñuca taitata enterragrichun cachai. Ña enterrashpaca cutishallami” ninmi nishpa cui— nirca.

6Shina nicpimi Faraonca:

—Cambac taita ari nichishca shinallatac paita enterrangapac rilla— nirca.

7José paipac taitata enterrangapac ricpica, Faraonta serviccunapish, Faraonpac huasipi mandaccunapish, Egipto llactapi mandaccunapish, 8Josepac familiacunapish, huauquicunapish, Jacobopac familiacunapish paihuanmi rirca. Gosén llactapica huahuacuna, shinallatac animalcunallami saquirirca. 9Chashnami achca gentecuna caballopi, carretacunapi rirca. 10Jordán yacu chimba ladopi cac Atad nishca trillana pambaman chayashpaca tucuilla tandanacushpami, llaquilla huacarca. Joseca paipac taita huañushcamantami canchis punzhacaman churashca llaquilla carca.

11Chaimantami Canaán llactapi causaccuna ricushpaca: «Chai Atad nishca trillana pambapimi Egipto runacuna llaquilla huacacun» nirca. Chaimantami chai pambataca Abel-mizraimta shutichirca. Chaica, Jordán yacu chimba ladopimi carca.

12Jacobopac churicunaca paipac taita imata nishca shinallatacmi ruhuarca. 13Canaán llactaman apashpami, Macpela pambapi tiyac jutcupi enterrarca. Chai allpataca Abrahammi paicuna enterraringapac heteocunapuramanta Efronman randishca carca. Chai allpaca Mamremanta inti llucshina ladomanmi saquirin. 14Paipac taita Jacobota enterrashpaca, Joseca paipac huauquicunandi, shinallatac tucui paihuan ric gentecunandimi Egiptoman cutirca.

José huañushcamanta

15Josepac huauquicunaca paicunapac taita huañucpica:

—Joseca, ñucanchic tucui mana allita ruhuashpa, paita llaquichishcamantaca ñucanchictapish llaquichingami —ninacurcami.

16Chaimantami paicuna Joseman tapuchun cachashpaca:

—Cambac taita manarac huañushpaca: 17“Cambac huauquicuna canta llaquichishpa juchallishcataca perdonachun” ningui. Cantaca llaquichircatacmi. Cunanca, cambac taitapac Diosta serviccuna mana allita ruhuashcata perdonai ningui— nirca.

Chashna nicpica, Joseca huacarcami. 18Cutin Josepac huauquicunapish paipacman chayashpa, paipac ñaupapi pambacaman cumurishpaca:

—Cunanca, canta servingapacmi caipi canchic— nirca.

19Chashna nicpimi Joseca:

—Ama manchaichicchu. Ñuca cancunata llaquichingapacca, ¿Dioschu cani, imtacyari? 20Cancunaca ñucata llaquichinatami yuyarcanguichic. Ashtahuanpish Diosmi ñucanchicpac allipac chashnaca ruhuachirca. Chaitaca cunanmi ricucunchic. Paica achca gentecunaman causaita cungapacmi chashnaca ruhuarca. 21Chaimanta ama manchaichicchu, ñucami cancunamanpish, cancunapac huahuacunamanpish micunata carasha— nirca.

José paipac huauquicunata chashna sumacta rimacpimi, paicunapac shungupish cushicurca.

22Joseca Egiptomi paipac taitapac familiahuan causarca. Joseca patsac chunga huatatami causarca. 23Chaimantami Efrainpac churicuna quimsa miraicaman mirashcata ricsirca. Chashnallatac Manasespac churi Maquirpac huahuacunapish paipac maquipimi huiñarca.

24Chai quipaca Joseca paipac huauquicunataca:

—Ñucaca ñallami huañusha. Shina cacpipish, Dios shamushpami, cai llactamanta llucchishpa Abrahamman, Isaacman, Jacoboman cungapac ari nishca allpaman pushanga— nirca.

25Joseca taita Israelpac churicunataca:

—Dios shamushpaca, cancunataca pushangatacmi. Chashna pushacpica, ñuca tullucunatapish apanguichic— nishpami, Diospac shutipi ari nichirca.

26Joseca patsac chunga huatayuc cashpami, Egiptopi huañurca. Paipac cuerpotaca ama ismuchunmi jambicunahuan jambishpa, ataudpi churarca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index