Search form

GÉNESIS 7

Dios yacu juizhuta cachashcamanta

1Mandac Diosca Noetaca: «Cai tucui gentecunamantaca canllami allita ruhuashpa causashcangui. Chaimanta canpish, tucui familiacunapish huambuc huasiman yaicuichic. 2Shinallatac micuna animalcunataca canchis carita, canchis huarmita yaicuchingui. Cutin mana micuna animalcunataca shuc carita, shuc huarmita yaicuchingui. 3Shinallatac jahuata volac animalcunatapish canchis carita, canchis huarmita chaipurallata yaicuchingui. Chashna ruhuacpimi, cai pachapica mirarishpa causanga. 4Canchis punzha quipaca chuscu chunga punzhata, chuscu chunga tutatami yallita tamyachigrini. Chashna tamyachishpami, tucui cai pachapi ñuca ruhuashca causaita chariccunata tucuchisha» nirca.

5Shina nicpica, Noeca Mandac Dios nishca shinami tucuita ruhuarca.

6Cai pachapi yacu juizhu tiyacpica, Noeca sucta patsac huatayucmi carca. 7Noeca yacu juizhupi mana huañungapacmi paipac huarmindi, huahuacunandi, nueracunandi huambuc huasiman yaicurca. 8Shinallatac Noeca Diosman cuna animalcunatapish, mana Diosman cuna animalcunatapish, volac animalcunatapish, pambata aisarishpa puric animalcunatapish, 9ishcai ishcaitami shuc carita, shuc huarmita Dios mandashca shina huambuc huasiman yaicuchirca.

10Canchis punzha tucucpimi, yacu juizhuca cai pachapica callarirca. 11Noeca sucta patsac huatayuc cacpi, chai huata callarishca ishcai quilla, chunga canchisniqui punzhapimi allpa ucumantapish yacuca timbushpa llucshirca. Jahua pachamantapish yacu punguta pascac shinami tamyai callarirca. 12Chuscu chunga punzha, chuscu chunga tutami cai allpapica tamyacurca. 13Tamyai callari punzhallatacmi Noeca Sem, Cam, Jafet churicunandi, paipac huarmindi, quimsa nueracunandi huambuc huasiman yaicurca. 14Paicunapish, sacha animalcunapish, charina animalcunapish, pambata aisarishpa puric animalcunapish, volac animalcunapish chaipurallami yaicurca. 15Noehuanca tucui causaita charic animalcunami ishcai ishcai huambuc huasiman yaicurca. 16Dios nishca shinami Noehuanca shucca cari, shucca huarmi animalcuna yaicurca. Chai quipaca Diosllatacmi huambuc huasi pungutaca huichcarca.

17Yacu juizhuca chuscu chunga punzhatami carca. Yacu ña jundamushpaca, huambuc huasiman chayashpami, chai huasita huambuchishpa catirca. 18Shinami yacuca ashtahuan jundarishpa, tucui allpata ucuyachishpa catirca. Cutin huambuc huasica huambushpami catirca. 19Yacuca tucui cai pachapi jundashpami, ashtahuan jatun urcucunacaman tucui ucuyachirca. 20Yacuca jatun urcumanta canchis metro yallimi jundarca. 21Chashna tamyashpa, tucui cai pachapi yacu jundacpimi, gentecunapish, volac animalcunapish, charina animalcunapish, sacha animalcunapish, pambata aisarishpa puric animalcunapish tucui huañurca. 22Samaita aisashpa allpapi causaccunaca tucuimi huañurca. 23Shinami gentecunapish, sacha animalcunapish, pambata aisarishpa puric animalcunapish, jahuata volac animalcunapish huañurca. Shina cacpipish, huambuc huasiman Noehuan yaicuccunaca mana huañurcachu. 24Yacuca patsac pichca chunga punzhacamanmi cai pacha junda tiyacurcalla.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index