Search form

LEVÍTICO 11

Micuna animalcunamantapish, mana

micuna animalcunamantapish

(Dt 14.3-21)

1Mandac Dios Moisestapish, Aarontapish rimashpaca: 2«Israelcunataca: “Cai pachapi tiyac tucui animalcunamantaca caicunatami micuna canguichic. 3Pallca shilluyuc, libruc animalcunatami micuna canguichic. 4Pallca shilluyuc, mana cashpaca libruc animalcunamantaca caicunatami mana micuna canguichic. Camelloca libruc cashpapish mana pallca shilluyucchu. Chaimanta ama micunguichicchu. 5Conejoca libruc cashpapish mana pallca shilluyucchu. Chaimanta ama micunguichicchu. 6Liebre animalca libruc cashpapish mana pallca shilluyucchu. Chaimanta ama micunguichicchu. 7Cuchica pallca shilluyuc cashpapish mana librucchu. Chaimanta ama micunguichicchu. 8Chai animaltaca ama micunguichicchu, huañushcapipish ama tuparinguichicchu. Mana micunachu.

9Yacupi causac animalcunamantaca alasyuc animalcunatapish, escamayuc animalcunatapish micui pudinguichicmi. Chaicunataca cuchamanta cacpipish, callpac yacumanta cacpipish, micui pudinguichicmi. 10Chaica mana alasyuc, mana escamayuc animalcunataca mama cuchamanta cacpipish, callpacuc yacumanta cacpipish, ama micunguichicchu. Chailaya shuctac animalcunatapish ama micunguichicchu. 11Chaicunaca millana animalcunami, ama micunguichicchu. Huañushca cacpipish, millanami canguichic. 12Yacupi causac tucui mana alasyuc, mana escamayuc animalcunataca millanami canguichic.

13Volac animalcunamantaca caicunallatami millashpa mana micuna canguichic: Angatapish, tulluta paquic angatapish, yacupi causac angatapish, 14ullachutapish, chaipuralla milano angatapish, 15chaipuralla cuervo angatapish, 16avestruztapish, chushictapish, gaviotatapish, chaipuralla gavilantapish, 17pucutapish, somormujotapish, ibistapish, 18calamontapish, pelicanotapish, condortapish, 19cigüeñatapish, chaipuralla garzatapish, abubillatapish, mashutapish ama micunguichicchu.

20Tucui pambata saltashpa puric chuscu chaquiyuc chuspicunatapish millanami canguichic. 21Ashtahuanpish chuscu chaquihuan pambata saltashpa puric, changata pambapi asentashpa puric animalcunamantaca 22chaipuralla langostacunatapish, chaipuralla grillocunatapish, chaipuralla chipucunatapish micui pudinguichicmi. 23Ashtahuanpish pambata saltashpa puric chuscu chaquiyuc animalcunataca millanami canguichic.

24Chai animalcunapi tuparishpaca mapayanguichicmi. Maijanpish chai huañushca animalcunapi tuparicca tutayangacamanmi mapa canga. 25Chai huañushca animalcunata maijanpish apashpaca churanata tacshanami. Shinallatac tutayangacamanmi mapa canga.

26Tucui pallca shilluyuc, mana libruc animalcunaca mana micuna animalcunami. Chai huañushca animalcunapi tuparicca tutayangacamanmi mapa canga. 27Tucui chuscu chaquiyuc animalcunamantaca tucui shilluhuan sarushpa puric animalcunatami mana micuna canguichic. Maijanpish chai huañushca animalcunapi tuparicca tutayangacamanmi mapa canga. 28Maijanpish chai huañushca animalta apashpaca, paipac churanata tacshanami. Shinallatac tutayangacamanmi mapa canga. Chai animalcunataca mapa cashcata yuyanguichic.

29Pambata aisarishpa puric animalcunamantaca caicunatami mana micuna canguichic: Chucurillutapish, ucuchatapish, chaipuralla sapotapish, 30huagurtapish, cocodrilotapish, lagartotapish, palutapish, camaleontapishmi mana micuna canguichic. 31Pambata aisarishpa puric animalcunamantaca tucui chaicunami mana micuna animalcuna. Maijanpish chai huañushca animalcunapi tuparicca tutayangacamanmi mapa canga. 32Chai huañushca animal imapi tuparishpaca mapayachinmi. Chaica, caspimanta ruhuashca cashpapish, churana cashpapish, caramanta cashpapish, cushtal cashpapish, trabajana herramienta cashpapish mapayangami. Chaicunataca yacupimi satina canguichic. Shinallatac tutayangacamanmi mapa canga. Chai quipami chuya saquiringa. 33Chai huañushca animal aicha allpa mangapi urmashpaca chai ucupi tiyactapish mapayachingami. Chaimantami chai mangataca paquina canguichic. 34Chai mangapi tiyac yacu ima micunapi tallirishpaca mapayachingami. Shinallatac ima ubiana chai mangapi tiyacpish mapayangami.

35Chai huañushca animal imapi urmashpaca mapayachinmi. Chashnami jatun hornotapish, uchilla hornotapish mapayachinga. Chaimanta chaicunataca paquishpa ñutuchinami canguichic. Tucui chaicunaca mapami, shinallatac mapami canga.

36Callpac yacupi, mana cashpaca jundu yacupi urmashpaca mana mapayachinchu. Shina cashpapish, chai huañushca animalpi imapish tuparishpaca mapayangami.

37Chai huañushca animal ña tarpunalla muyupi urmashpaca, mana mapayachinchu. 38Ashtahuanpish huañushca animal nuyuchishca muyupi urmashpaca mapayachunmi.

39Micuna animal huañushcapi, maijan tuparicca tutayangacamanmi mapa canga. 40Maijanpish huañushca animalta micucca paipac churanata tacshanami. Shinallatac tutayangacamanmi mapa canga. Maijanpish huañushca animalta aparishpaca, paipac churanata tacshanami. Shina ruhuashpapish tutayangacamanmi mapa canga.

41Pambata aisarishpa puric animalcunataca millanami canguichic. Ama micunguichicchu. 42Pambata aisarishpa, mana cashpaca chuscu chaquihuan, mana cashpaca tauca chaquihuan puric animalcunataca ama micunguichicchu. Pambata aisarishpa, mana cashpaca llucashpa puric animalcunaca mapami. 43Pambata aisarishpa puric maijan animalpi tuparishpa ama mapayanguichicchu. Chaicunata micushpa, pacta millana tucunguichicman. 44Ñucaca cancunata Mandac, jucha illac Diosmi cani. Chaimanta cancunapish jucha illac caichic. Pambata aisarishpa puric animalcunata micushpa ama mapayanguichicchu. 45Ñucaca cancunata Mandac Diosmi cani. Cancunapac Dios cangapacmi Egipto llactamanta huichai llucchimurcani. Chaimantami cancunapish jucha illac cana canguichic” ningui.

46Tucui cai mandashcacunaca cai pachapi causac animalcunamantapish, volac animalcunamantapish, pamba animalcunamantapish, pambata aisarishpa purin animalcunamantapish, 47maijanlla mapa cashcata, maijanlla mana mapa cashcata, maijanllata micuna cashcata, maijancunata mana micuna cashcata yachachunmi cashca» nirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index