Search form

LEVÍTICO 12

Sajuarishca quipa chuyayanamanta

1Mandac Diosca Moisestaca: 2«Israelcunataca: “Shuc huarmi huicsayuc tucushpa, cari huahuata sajuarishpaca, quilla ungüihuan mapayashca shinallatacmi canchis punzhacaman mapa canga. 3Huahuataca pusac punzhapimi circuncisionta ruhuachina can. 4Mamaca sajuarina yahuar shamushcamantaca quimsa chunga quimsa punzhacamanmi imapish Diospacllata mana japirina can, Diospaclla ucumanpish mana yaicuna can. 5Huarmi huahuata sajuarishpaca, quilla ungüihuan mapayashca shinallatacmi ishcai semanacaman mapa canga. Sucta chunga sucta punzhacamanmi imapish Diospacllata mana tuparina can, Diospaclla ucumanpish mana yaicuna can.

6Chuyayana punzhacuna pactacpica, cari huahuamanta, mana cashpaca huarmi huahuamanta cashpapish shuc huatayuc cari ovejatami Diosman cushpa tucui rupachina can. Juchata pichachun Diosman cungapacca huahua palomata, mana cashpaca urpitami apamuna can. Chaitaca Dios-huan tupana huasi yaicunaman apamushpami, curaman cuna can. 7Chaicunataca curami Mandac Diospac ñaupapi rupachinga. Chashnami chai huarmi yahuar ungüihuan mapayashcamantaca chuyayana.

Caicunatami shuc huarmi cari huahuata, huarmi huahuata sajuarishca quipa ruhuana can. 8Shuc maltón ovejata mana charishpaca, ishcai huahua palomata, ishcai urpitami apamuna can. Shuctaca Diosman cushpa tucuita rupachingapac, shuctaca huarmipac juchata pichachun cungapacmi apamuna can. Curaca chai huarmipac juchata pichachun Diosman cushpa rupachinga. Chaita ruhuacpimi, mapa illac saquiringa” ningui» nirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index