Search form

LEVÍTICO 13

Lepra ungüihuan cacpi, imata ruhuanamanta

1Mandac Dios Moisestapish, Aarontapish rimashpaca: 2«Maijanpac cuerpo punguishpa, tucya tucucpi, ñuto grano ricuricpi, yuracyashca ricuricpica, Aarón curapacman, mana cashpaca maijan paipac churi curapacmanmi apana can. 3Curami chai sisuta ricunga. Chaipi millma yuracyashca, cara ucucaman sisushca cashpaca, lepra ungüimi canga. Chaimantami curaca: “Caica mapa ungüimi” ninga.

4Chai ungushcapac cuerpo yuracyashca cashpapish sisu mana ucucaman cacpi, millmapish mana yuracyashca cacpica, chai ungushca runataca curallatacmi canchis punzhacaman huichcashpa churanga. 5Canchis punzha tucucpica, curallatacmi ima shina cashcata allita ricunga. Chai ungüi chashnallatac cacpica, chai runataca cutin canchis punzhacamanmi huichcashpa churanga. 6Canchis punzha tucucpica, cutinllatacmi chai runataca ricunga. Chai sisushca mana ashtahuan mirarishca, mana yanayashca cacpica, curallatacmi: “Mana mapa ungüichu” ninga. Chai ungushca runaca paipac churanata tacshashpami, mapa illac saquiringa.

7Mapa illac cangapac, curaman ricuchishca quipa cutinllatac chai yanayashpa sisu mirashca cacpica, cutinllatacmi curaman ricuchina can. 8Chai runapi sisu ungüi mirarishcata cura ricushpaca: “Caica mapa ungüimi” ninga. Chaica lepra ungüimi canga.

9Maijan lepra ungüihuan cacpica, curapacmanmi apana can. 10Curami chai ungushca runataca ricunga. Cuerpo punguillishca cacpi, chaipi millmapish yuracyashca cacpi, shinallatac ucucaman sisushca cacpica, curallatacmi: 11“Caica mana jambipac lepra ungüimi” ninga. Paica mapami. Chaimanta ña mana huichcangachu.

12Ashtahuanpish chai ungushca runa umamanta chaquicaman caracharishca cacpica, curapish ricui pudingami. 13Chashna cacpica, curallatacmi chai ungushcata allita ricunga. Tucui chai ungüi yuracyashca cacpica curallatacmi: “Mapa illacmi” ninga. 14Ashtahuanpish ima punzha chai runapac cuerpopi ucucaman sisu ricuricpica: “Mapami cangui” ninga. 15Curami chai llullu aicha cara ucuman sisushcata alli ricushpaca: “Mapa ungüimi” ninga. Llullu aicha ricurishpaca, lepra ungüimi canga.

16Ashtahuanpish llullu aicha yuracyashca ricuricpica, chai ungushca runataca curapacmanmi apana can. 17Curami paitaca alli ricunga. Chai aicha cutin yuracyashca cacpica, curallatacmi: “Mapa illacmi cangui” ninga. Paica mapa illacmi saquiringa.

18Maijanpac cuerpopi sisu ungüi ña alliyashpa, 19pungui pushtupi yuracyashca, mana cashpaca yurac puca tucushca ricuricpica, curamanmi ricuchina can. 20Chaitaca curallatacmi allita ricunga. Shina ricucpica, llullu aichacaman sisu, chai sisupi millma yuracyashca cacpica, curallatacmi: “Mapa ungüimi” ninga. Chai punguica lepra ungüimi. 21Sisu ungüita cura allita ricushpa, chai sisupi mana millma yuracyashca cacpi, llullu aichacaman sisushca cacpi, ashtahuan yanayashpa alliyacucpica, curami canchis punzhacaman huichcashpa churanga. 22Sisu ungüi cuerpopi mirarishpa caticucpica, curallatacmi: “Caica mapa ungüimi” ninga. Chaica leprami canga. 23Ashtahuanpish chai sisu yuracyashpa, mana mirarishca cacpica, curallatacmi: “Mapa illacmi cangui” ninga.

24Maijan ninapi rupashpa, chai pushtupi yurac puca tucushca ricuricpica, 25curallatacmi alli ricunga. Sisushca pushtupi millmapish yuracyashca, carapish ucuman sisushca cacpica, lepra ungüimi canga. Lepra ungüita charishcamantami curallatac: “Mapa ungüimi” ninga. 26Ashtahuanpish cura allita ricushpa, rupashca pushtupi alli tucushca, millmapish mana yuracyashca cacpi, carapish mana ucuman sumirishca cacpica, canchis punzhacamanmi curaca huichcashpa churanga. 27Canchis punzha tucucpica, curami cutinllatac alli ricunga. Sisu ashtahuan mirarishca cacpica, curallatacmi: “Caica mapa ungüimi” ninga. Chaica lepra ungüimi canga. 28Sisu ungüi mana mirarishpa, alli tucushpa, carapish yuracyashpa caticushpaca rupashcami canga. Chaica alli tucungami. Shina cacpica, curami paitaca: “Mapa illacmi cangui” ninga. Chaica, rupashca alliyashca señal-llami saquiringa.

Acchapi, barbaspi sisu ungüi ricuricpi,

imata ruhuanamanta

29Caripac, mana cashpaca huarmipac umapi, mana cashpaca barbaspi sisu ungüi llucshicpica, 30curallatacmi allita ricunga. Chai ungüi llullu aichacaman cacpi, chaipi tiyac millmapish quilluyashpa ñañuyashca cacpica, curallatacmi: “Mapa ungüimi” ninga. Chai ungüica umapi cashpa, barbaspi cashpa, shicshi lepra ungüimi canga. 31Chai ungüita cura allita ricushpa, chai sisu mana ucucaman cacpi, quilluyashca accha mana ricuricpica, chai unguctaca canchis punzhacamanmi huichcashpa churanga. 32Canchis punzha tucucpica, curami unguctaca alli ricunga. Chashna ricucpica, sisu ungüi mana mirashpa, acchapish mana quilluyashca ricuricpi, chai ungüi mana ucucaman cacpica, 33chai pushtuta mana pitishpami, ladocunata pitichinga. Shina ruhuashpaca shicshi ungüihuan cashcamantami canchis punzhacaman huichcashpa churanga. 34Canchis punzha tucucpica, chai ungüitaca curami alli ricunga. Sisu mana mirarishpa, ucucaman mana cacpica, chai runataca “mapa illacmi cangui” ninga. Chai ungushcaca churanata tacshashpami, mapa illac saquiringa. 35Mapa illac tucushca quipa, chai shicshi ungüi cuerpopi mirarishca cacpica, 36curami cutinllatac alli ricunga. Chai ungüi cuerpopi mirarishca cacpica, quilluyashca acchataca ña mana mashcanachu, ashtahuanpish paica mapami canga. 37Ashtahuanpish shicshi ungüi mana mirarishpa, chai pushtupi yana accha huiñashca cacpica, chai shicshi ungüica alliyashcami canga. Chaimanta mapa illacmi canga. Paitaca curami: “Mapa illacmi cangui” ninga.

38Maijan caripac, huarmipac cuerpopi yuracyashca sisu ricuricpica, 39curami alli ricunga. Paipac cuerpopi yuracyashca pushtucunapi asha yanayashca ricuricpica, pucalla granocunallami llucshishca canga. Chai ungushcaca mapa illacmi canga.

40Maijanpac huasha lado accha urmacpica, lluchu umami saquiringa. Shina cashpapish mapa illacmi canga. 41Mana cashpaca frente ladomanta urmacpica, lluchu frentemi saquiringa. Shina cashpapish mapa illacmi canga. 42Ashtahuanpish huasha ladomanta cashpa, frentemanta accha urmashca pushtupi yuracyashpa, pucayashpa sisu ricurishpaca lepra ungüimi canga. 43Shina cacpica, paitaca curallatacmi alli ricunga. Huashaman cashpa, frenteman cashpa, uma carapi lepra ungüilayalla yurac puca sisu punguishca cashpaca, 44lepra ungüihuanmi canga. Chaimanta paica mapami canga. Umapi lepra ungüita charishcamantaca curallatacmi: “Mapa ungüi” ninga.

45Lepra ungüihuan cashpaca, churanapish lliqui, umatapish mana taparishpa shimillata taparishpami: “Mapami cani, mapami cani” nishpa, caparishpa puringa. 46Ungüihuan cashca punzhacunaca sisu mapami canga. Shina mapa cashcamantami carpa huasimanta llucshishpa, pailla carupi causanga.

47Millmamanta ruhuashca, mana cashpaca linomanta ruhuashca churanapi lepra ungüi mapayashca ricuricpi, 48mana cashpaca lino puchca aullishcapi, millma puchca ahuashcapi, carapi, mana cashpaca caramanta ruhuashcapi chai ungüi ricuricpi, 49shinallatac tucui chai ruhuashcacunapi chai verdiyashca, pucayashca ricuricpica, lepra ungüimi canga. Chaitaca curapacmanmi ricuchina can. 50Curami alli ricushpa, chai ungüihuan mapayashcataca canchis punzhacaman huichcashpa churanga. 51Canchis punzha tucucpica, chai mapayashcataca curallatacmi alli ricunga. Chai ungüi ima churanapi, lino puchca aullishcapi, millma puchca ahuashcapi, mana cashpaca carapi, mana cashpaca imapish caramanta ruhuashcacunapi ashtahuan mirarishca cacpica, chaica lepra ungüimi canga. Chaicunaca mapami canga. 52Ima churanapi, lino puchca aullishcapi, mana cashpaca millma puchca ahuashcapi, mana cashpaca caramanta ruhuashcacunapi mapa lepra ungüi cashcamantaca tucuimi ninapi rupachina can.

53Shina cacpipish, cura alli ricucpi, chai mapa ungüi ima churanapi, ahuashca puchcapi, aullishcapi, imapish caramanta ruhuashcacunapi mana mirarishca cacpica, 54chai mapayashcata tacshashpami, canchis punzhata cutin huichcashpa churanga. 55Chai mapa ungüi tiyashcacunata tacshashpa huichcashcataca canchis punzhapimi curallatac alli ricunga. Mapa ungüi mana ashtahuan mirarishca cacpi, mana shuctaclaya tucushpa, chashnallatac cacpica, ninapimi rupachina. Imapish charishcacuna ucu ladoman cashpa, jahua ladoman cashpa tiñirishca cacpica, ismuchic mapami canga. 56Ima charishcacunata tacshashca quipa cura cutin ricushpa, chai ungüi yanayashpa mapayashca ricuricpica, chai churanata, mana cashpaca carata, lino puchca aullishcata, mana cashpaca millma puchca ahuashcata, maipi yanayashca pushtullatami pitina can. 57Churanapi, ahuashcapi, mana cashpaca imapish caramanta ruhuashcapi, chai ungüi mirarishpa ricuricpica, tucuitami rupachina can. 58Ashtahuanpish churanapi, mana cashpaca ahuashcapi, mana cashpaca imapish caramanta ruhuashcapi cac mapa ungüi tacshacpi, tucui anchuricpica, cutinmi tacshana can. Chai quipaca mapamanta chuyayashcami saquiringa» nirca.

59Caicunaca lepra ungüi millma puchcamanta, lino puchcamanta ruhuashca churanapi, aullishcapi, ahuashcapi, caramanta ruhuashca churanapi ricuricpi, chaicunata alli ricushpa, mapa illac cacta, mana mapa illac cacta huillachun mandashcacunami.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index