Search form

LEVÍTICO 14

1Mandac Dios Moisesta rimashpaca: 2«Lepra ungüi alliyashca quipa, mapa illac saquiringapacca caitami ruhuana can: Chai alliyashca runataca curapacmanmi pushana. 3Chaipimi curaca carpa huasimanta canzhaman pushashpa, allita ricunga. Chai lepra ungüi ña alliyacushcata curallatac ricushpaca, 4chuyanlla saquirichunmi, ishcai uchilla micuna zhutata, cedro caspita, puca pañota, hisopo sacha ramata apamuchun mandanga. 5Allpa mangapi callpacuc yacuta churashpami, chaipica ishcai zhutacunamantaca shucta huañuchichun mandanga. 6Chai quipaca chai causacuc zhutata, cedro caspita, puca pañota, hisopo ramata japishpa, chai yacu jahuapi huañuchishca zhuta yahuarpi causac zhutata satinga. 7Chashnami lepra ungüihuan cacpac jahuapi canchis cutincaman chirapashpaca: “Mapa illacmi cangui” ninga. Chai quipaca causacuc zhutataca cacharishpami cachanga.

8Chai quipami churanata chuyayac runaca paipac churanata tacshashpa, acchatapish, tucui ñuto millmacaman ruturishpa, armarishpa, ña chuya saquiringa. Chai quipaca carpa huasicunaman shamushpami, mana ucuman yaicushpa, canchis punzhacaman canzhallapi causanga. 9Canchisniqui punzhapica acchatapish rutushpa, cuerpopi tiyac millmatapish, ñahui quingrai millmatapish rutushpa, churanatapish tacshashpa, paipish armarishpami, mapa illac saquiringa.

10Pusacniqui punzhapica ima mana tucushca ishcai maltón ovejatapish, shuc huatayuc ima mana tucushca huarmi ovejatapish, sucta kilo chaupi ashtahuan alli harinatapish, aceitehuan masashcata, shuc litromanta quimsapi chaupishca shuc parte aceiteta apamuna can. 11Chaicunata apamucpimi, lepramanta chuyayachic curaca Dios-huan tupana huasipi, Diospac ñaupapi cungapac apamushcacunandi churashpa rupachinga. 12Pandarishcamantaca curami shuc ovejata japishpa, litro aceiteta quimsapi chaupishca aceitehuan cuyuchishpa, Mandac Diospac ñaupapi cunga. 13Chai quipami maltón ovejataca juchamanta cushcata, tucui rupachinata rupachinallapitac huañuchinga. Pandarishcamanta Diosman cushcapish, juchamanta cushcapish Diospaclla chicanyachishcami can. Chaimantami animal aichataca cura japina can.

14Cura chai pandarishcamanta cushpa huañuchishca animalpac yahuarta japishpaca, chai chuyayac runapac alli lado ringri puntapi, alli lado maqui mama dedo puntapi, alli lado chaqui mama dedopimi cahuinga. 15Curaca chai litromanta quimsapi chaupishca aceitetapish japishpa, lluqui maqui shungupi tallinga. 16Shina tallishpami curaca paipac lluqui maquipi charicushca aceitepi, paipac alli maqui dedota jucuchishpa, canchis cutincaman Mandac Diospac ñaupapi chirapanga. 17Paipac maquipi charicushca aceite puchutaca chai chuyayac runapac alli lado ringri puntapi, alli lado maqui mama dedopi, alli lado chaqui mama dedopi, pandarishcamanta cushca animalpac yahuarhuan cahuishca jahuapi cahuinga. 18Paipac maquipi puchushca aceitetaca chuyayacpac uma jahuapimi cahuinga. Cura chashna ruhuacpimi, Mandac Diosca chai runapac juchata perdonanga. 19Chai quipami curaca juchamanta Diosman cuna animalta huañuchishpa, chai chuyayac runapac juchamanta cunga. Shina ruhuacpimi, chai runaca mapa illac saquiringa. Chai quipaca tucui rupachingapac cushca animaltapish huañuchingami. 20Chashnami tucui rupachina animaltapish, grano ofrendatapish altar jahuapi rupachinga. Shina ruhuashpami, mapa illac saquiringa.

21Chai leprahuan ungushca runa huaccha cashcamanta chaicunata mana cui pudicpica, chai pandarishcamantaca shuc maltón ovejallatami apamuna can. Chaitaca curallatacmi cuyuchishpa Diosman cunga. Chaihuan cungapacca ishcai kilo yalli alli harinata, litromanta quimsapi chaupishca aceitetami apamuna can. 22Ishcai urpita, mana cashpaca ishcai huahua palomatami, imata cashpapish pai cui pudishcallata apamunga. Chaicunataca shuctaca juchata pichachun, shuctaca tucui rupachingapacmi apamunga. 23Pusacniqui punzhapimi tucui caicunataca mapa illac saquiringapac curaman cuna can. Chaitaca Dios-huan tupana huasi yaicunapimi Mandac Diospac ñaupapi cunga. 24Chaipimi curaca juchata pichachun apamushca maltón ovejatapish, litromanta quimsapi chaupishca aceitetapish cuyuchishpa, Mandac Diosman cunga. 25Pandarishcamanta cuna maltón ovejata huañuchishpami, chai yahuarta japishpa, lepra ungüimanta chuyayac runapac alli lado ringripi, alli lado maqui mama dedopi, alli lado chaqui mama dedopi cahuinga. 26Chai quipaca chai aceiteta ashata japishpami, paipac lluqui maqui shungupi churanga. 27Chaimanta alli maqui dedohuan japishpami canchis cutincaman Mandac Diospac ñaupapi chirapanga. 28Chai charicushca aceitellahuan chuyayac runapac alli lado ringripi, alli lado maqui mama dedopi, alli lado chaqui mama dedopi juchata pichachun cushca animal yahuarhuan cahuishcallapitac cahuinga. 29Chai puchu aceitetaca chai chuyayac runapac umapimi cahuinga. Shina ruhuacpimi, Mandac Diosca juchata perdonanga.

30Chai quipaca curallatacmi urpita cashpa, huahua palomata cashpa imatapish cui pudishcallata apamushcata Diosman cunga. 31Chai ishcai animalcunataca shuctaca juchata pichachun, shuctaca tucui rupachingapac apamuna can. Caicunataca harina chaputa cushca jahuapimi cunga. Shina cucpimi, Mandac Diosca paipac juchacunata perdonanga» nirca.

32Caicunami lepra ungüihuan cashpa, Diosman mana cui pudiccunaman yachachishca can.

Huasipi lepra ungüi tiyacpi, imata ruhuanamanta

33Mandac Dios Moisestapish, Aarontapish rimashpaca: 34«Cancuna ña Canaán llactaman chayashpa, ñuca cushca llactapi causacucpi, maijanpac huasipi lepra ungüita ñuca churacpi, chai ungüi ricuricpica, 35chai huasiyucca curapacman rishpami: “Ñuca huasi pirca quingraipica mapa lepra ungüimi ricuric yuyachin” ringa. 36Shina huillacpimi, curaca chai huasita ricungapac chayashpaca, manarac ucuman ricungapac yaicushpa, ungüi ama mirarishpa catichun, chaipi imalla tiyaccunata canzhaman llucchichun mandanga. Tucui llucchicpica, chai ungüi cashcata, mana chai ungüi cashcatami ricungapac yaicunga. 37Chai huasi pirca quingraipi verdiyashca, pucayashca mapa ungüi pirca ucucaman cacpica, 38curaca huasimanta canzhaman llucshishpami, canchis punzhacaman chai huasita huichcashpa saquinga. 39Canchis punzha tucucpi, cura cutimushpami chai huasi pirca quingraipi ungüi mirarishcata ricushpaca, 40ungüilla cac rumicunata anchuchishpa, llactamanta llucchishpa, mapa shitanapi shitachun mandanga. 41Huasi ucu pirca quingraitapish jahuallata aspichishpami, chai allpataca llacta chaupimanta llucchishpa, mapa shitanapi shitachinga. 42Rumicunata llucchishpaca, shuctac rumicunatami churanga. Pirca quingraita aspishcataca turuhuan llutanga.

43Chai rumita llucchishca huasha, aspishpa mushuc turuhuan llutashca quipapish cutinllatac ungüi ricuricpica, 44curallatacmi cutinllatac ungüi mirarishcata ricungapac yaicunga. Pai yaicucpi, chai ungüi mirarishcallatac cacpica, chai huasica lepra ungüilla, mapa huasimi canga. 45Chai huasipi lepra ungüi cashcamantaca chai huasitaca tucuimi urmachinga. Chai huasi urmachishca rumicunatapish, caspicunatapish, allpatapish llacta chaupimanta llucchishpami, mapa shitanapi shitanga. 46Cura huichcachishca quipa chai huasiman maijanpish yaicucca tutayangacamanmi mapa canga. 47Maijanpish chai huasipi sueñushpa, shinallatac micushpaca paipac churanata tacshachun.

48Lepra ungüilla cac huasita turuhuan llutashca quipa cura ricugricpi, chai ungüi ña mana ashtahuan mirarishca cacpica curaca: “Cai huasica ña mana mapachu” ninga. 49Shina nishpami, huasita chuyayachingapacca ishcai uchilla zhutata, cedro caspita, puca telata, hisopo ramata japinga. 50Ishcai zhutacunamanta shuctaca allpa mangapi callpac yacuta churashpami, chaipi huañuchinga. 51Chaimantaca causacuc zhutata, cedro caspita, hisopo ramata, puca pañota, yacu jahuapi huañuchishca zhutapac yahuarpi satishpa, chai huasitaca canchis cutincaman chirapanga. 52Chai ungüilla huasitaca zhuta yahuarhuan, callpac yacuhuan, causac zhutahuan, cedro caspihuan, hisopo ramahuanmi mapa illacta ruhuanga. 53Quipaca causac zhutata llactamanta canzhaman llucchishpami cacharinga. Shina ruhuacpimi, chai huasica mapa illac saquiringa» nirca.

54Caicunami shicshi ungüimanta, lepra ungüimanta imata ruhuana mandashcaca. 55Huasi quingraipi cacpi, churanapi cacpi, 56maijanpac cuerpopi pungui ricuricpi, caracharishpa yuracyashca ricuricpica, 57chai ungüi mapa cacta, mana mapa cacta yachangapacca, tucui cai mandashcacunatami ruhuana can. Caicunami lepra ungüihuan cacpi, imata ruhuana mandashcaca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index