Search form

LEVÍTICO 15

Yurac yacu cachariricuc caricuna

imata ruhuanamanta

1Mandac Dios Moisestapish, Aarontapish rimashpaca: 2«Israelcunataca: “Maijan cari yurac yacu cacharirishpaca mapami tucunga. 3Yurac yacu cachariricuc runaca pai charishca aichamanta yurac yacu cacharirishcamanta, mana cashpaca yurac yacu jarcarishcamantapishmi mapa tucun. 4Yurac yacu cachariricuc runa siririshca camapish, imapi pai tiyarishcapish mapami tucun. 5Pai siririshca camapi maijanpish tuparicca armarishpa, churanatapish tacshanami can. Shina ruhuashpapish, tutayangacamanmi mapa canga. 6Chai runa tiyarishcapi maijan tiyaricpish armarishpa, churanata tacshanami can. Shina ruhuashpapish tutayangacamanmi mapa canga. 7Maijanpish yurac yacu cachariricuc runapac cuerpopi tuparicca armarishpa, churanata tacshanami can. Shina ruhuashpapish tutayangacamanmi mapa canga.

8Yurac yacu cachariricuc runa, mapa illac runapi tocacpica, chai runaca armarishpa, churanata tacshanami can. Shina ruhuashpapish tutayangacamanmi mapa canga. 9Yurac yacu cachariricuc runa parejashca animalpi montacpica, parejoca mapami canga 10Maijanpish chai runa tiyarishcapi tiyaricca tutayangacamanmi mapa canga. Maijanpish chai runa tiyarinata apacca armarishpa, churanata tacshanami can. Shina ruhuashpapish tutayangacamanmi mapa canga. 11Yurac yacu cachariricuc runa mana maquita jahuashpa, maijanpi tuparicpica, armarishpa churanata tacshanami can. Shina ruhuashpapish tutayangacamanmi mapa canga.

12Yurac yacu cacharirishca runa allpa mangapi tuparicpica, chai mangataca paquinami can. Shinallatac caspi manga cacpica jahuanami can.

13Chai runa yurac yacu cachariricuc runa mapa illac tucushpaca, canchis punzhatami yupana can. Chai quipami callpacuc yacupi armarishpa, churanatapish tacshana can. Chashnami mapa illac tucunga. 14Pusac punzhapica ishcai urpita, mana cashpaca ishcai huahua palomatami Dios-huan tupana huasi yaicunaman apamushpa, Mandac Diospac ñaupapi curaman cuna can. 15Curami shuctaca juchamanta cushpa, shuctaca tucui rupachinga. Chashnami yurac yacu cachariricuc runataca Mandac Diospac ñaupapi curaca chuyanllata ruhuanga.

16Yurac yacu cachariricuc runaca tucui cuerpotami armarina can. Shina armarishpapish tutayangacamanmi mapa canga. 17Caripac yurac yacu churanapi, mana cashpaca carpapi urmacpica, tacshanami can. Shina ruhuashpapish tutayangacamanmi mapa canga.

18Shuc cari huarmihuan sueñucucpi, caripac yurac yacu cachariricpica, ishcaitami armarina can. Shina armarishpapish tutayangacamanmi mapa canga.

Quilla ungüihuan cac huarmicunata mandashcamanta

19Shuc huarmi quilla ungüihuan cashpaca, canchis punzhacamanmi mapa canga. Maijanpish chai huarmipi tuparicca tutayangacamanmi mapa canga. 20Shinallatac chai huarmi imapi tiyarishpa, mana cashpaca siririshpaca mapatami ruhuanga. 21Maijanpish chai huarmi siririshca camapi tuparicca armarishpa, churanata tacshanami can. Shina ruhuashpapish tutayangacamanmi mapa canga. 22Maijanpish chai huarmi tiyarishcapi tiyaricca armarishpa, churanata tacshanami can. Shina ruhuashpapish tutayangacamanmi mapa canga. 23Chai huarmi sueñushca camapi, mana cashpaca tiyarishcapi tuparicca tutayangacamanmi mapa canga.

24Maijanpish chai huarmihuan sueñushpaca, canchis punzhacamanmi mapa canga. Paicuna sueñushca camapish mapami canga.

25Shuc huarmipac quilla ungüi yalli punzhacunata shamucpi, shinallatac yallita yahuar shamucpica, tucui chai punzhacunatami chai unguna cashca punzhacunapi shinallatac mapa canga. 26Yahuar cachariricuc huarmi sueñushca camaca quilla ungüihuan cashpa sueñushca shinallatacmi mapa canga. Imapi tiyarishcapish mapallatacmi canga. 27Maijanpish chai camapi, mana cashpaca tiyarinapi tuparicca mapami canga. Chaimanta armarishpa, churanata tacshanami can. Shina ruhuashpapish tutayangacamanmi mapa canga.

28Yahuar shamuna pararicpica, canchis punzhatami yupana can. Chai quipaca mapa illacmi saquiringa. 29Pusac punzhapica ishcai urpita, mana cashpaca ishcai huahua palomatami Dios-huan tupana huasi yaicunaman apamushpa, Mandac Diospac ñaupapi curaman cuna can. 30Chaicunatami curaca shuctaca juchamanta cushpa, cutin shuctaca tucui rupachinga. Mandac Diospac ñaupapi chashna ruhuacpimi, yahuar cacharirishca huarmica mapa illac saquiringa.

31Chai shina ruhuacpimi, israelcunaca paicunapac chaupipi cac ñucahuan tupana huasimanca ima mapa illac shamungacuna. Paicunaca mapamanta chuyayana cashca shina, mana chuyayashpa ñucahuan tupana huasita mapayachishpa, ama huañuchunmi chashna yachachina canguichic” ningui» nirca.

32Cai mandashcacunaca shuc cari yurac yacu cacharirishpa mapayashcamanta, 33shuc huarmi quilla ungüihuan mapayashcamanta, caripish, huarmipish mapayashcamanta, quilla ungüihuan cac huarmihuan cari sueñushpa mapayashcamanta ima shina chuyayanata yachachishcami.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index