Search form

LEVÍTICO 16

Juchacunata perdonana punzhamanta

1Aaronpac ishcai churicuna paipac ñaupaman yallita cuchuyashpa, huañushca quipami Mandac Diosca Moisestaca: 2«Cambac huauqui Aarontaca ama ima horaspish pañohuan jarcashca huashapi cac mandashcacunata huacaichina Arcata catashca, ñucapaclla ucuman yaicuchun ningui. Chaiman ima horaspish yaicushpaca huañungami. Ñucaca chai catashca jahuapimi puyupi ricurisha. 3Aaronca ñucapaclla chicanyachishca ucumanca juchata pichachun cungapacca shuc becita, tucui rupachingapacca shuc cari ovejatami apashca yaicuna can. 4Ñucapaclla chicanyachishca lino tunicataca churashca, lino chumbihuan huatallishca, lino turbanteta churarishcami chai ucumanca yaicuna can. Cai churanacunami ñucapaclla chicanyachishca churanaca. Chai churanataca armarishpami churaringa.

5Aaronca tandanacushca israelcunamantami ishcai chivotaca, juchata pichachun cungapac, cutin shuc cari ovejataca tucui rupachingapac apamuna can. 6Quipaca Aaronca paipac juchata, paipac familiapac juchata pichachun cungapacmi shuc becita apamunga. 7Chai quipaca ishcai chivotami ñucahuan tupana huasi yaicunapi ñucapac ñaupapi cungapac apamuna can. 8Aaronca chai ishcai chivotaca shuctaca ñucaman cungapac, shuctaca Azazelman cungapacmi suerteta ruhuanga. 9Chai ishcai chivomanta maijanta ñucaman cuna tucucpica, Aaronca israelcunapac juchata pichachunmi ñucaman cuna can. 10Cutin Azazelman cuna tucucpica, causactami Mandac Dios ñucapac ñaupaman apamunga. Chashna apamushpami juchata perdonachun, chai chivopi juchata apachishpa, Azazelman cushpa, shitashca pambapi cacharishpa cachanga.

11Aaronca paipac juchamantapish, paipac familiapac juchamantapish Diosman cungapacmi becita apamuna can. Chashnami becitaca juchata pichachun huañuchinga. 12Chai quipaca ñucapac ñaupapi cac altarmantami nina junda incienso rupachinata, ishcai puñado mishquilla ashnacuc ñuto inciensota apashpa, lienzohuan jarcachishca ñucapaclla chicanyachishca ucuman yaicunga. 13Chaipimi Aaronca Mandac Dios ñucapac ñaupapi cac ninapi inciensota rupachinga. Chashna rupachicpimi, mandashcata huacaichishca Arca tapa jahuata cushnica tapanga. Chashna tapacpimi, Aaronca mana huañunga. 14Chai quipaca Aaronca paipac dedota beci yahuarpi satishpami, Arca tapa jahuapi inti llucshic ladopi, chai tapa ñaupa ladopi canchis cutin chirapanga.

15Chai quipaca israelcuna juchata pichachun cushca ovejata huañuchishca yahuartaca cari becipac yahuarhuan ruhuashca shinallatacmi pañohuan jarcachishca ñucapaclla chicanyachishca ucuman apamushpa, tapa jahuapipish, ñaupa ladopipish chirapanga. 16Chashnami ñucapaclla chicanyachishca ucuta israelcuna ñucata mana cazushpa, juchallishpa mapayachishcata pichanga. Chashnallatacmi Aaronca paicunapac chaupipi cac carpa huasitapish israelcuna juchallishpa mapayachishcata pichanga.

17Aarón ñucapaclla chicanyachishca ucuman yaicushpa, paipac, paipac familiapac, tucui israelcunapac juchacunata pichachun cucucpica, pipish ñucahuan tupana huasiman ama yaicunachu can. 18Chai ucumanta llucshishpaca, Mandac Dios ñucapac ñaupapi cac altarta mapa illacta ruhuangapacmi Aaronca chai altar gachucunatapish, altar muyunditapish cari becipac, chivopac yahuarta japishpa cahuinga. 19Dedota yahuarpi satishpami, chai altar jahuapi canchis cutin chirapanga. Shina ruhuashpami, israelcunapac juchacunata pichashpa, ñucapacllata ruhuanga.

20Aaronca ñucapaclla chicanyachishca ucutapish, ñucahuan tupana huasitapish, altartapish ñucapacllata ruhuashca quipami causac chivota apachun cachanga. 21Chai chivopac uma jahuapi maquita churashpami, tucui israelcuna juchallishcatapish, millaita ruhuashcapish huillanga. Chashnami chivopac uma jahuapi juchacunata churashpa, shitashca pambapi cacharichun, chaipac acllashca runata cachanga. 22Israelcunapac juchata apachishpami, pi mana causana shitashca pambaman apanga. Chai pambapimi chivotaca cacharinga. 23Chai quipami Aaronca ñucahuan tupana huasiman shamushpa, ñucapaclla chicanyachishca lino churanata llucchishpa, chaipi saquinga. 24Ñucahuan tupana huasi ucullapitac armarishpami, paipac churanata churarishpa, canzhaman llucshishpa, paimantapish, tucui israelcunamantapish animalta tucui rupachinga. Chashnami, paipac juchatapish, israelcunapac juchatapish pichachun, 25cushca animalpac huirataca altarpi rupachinga.

26Chivota Azazelman cungapac apac runapish armarishpa, churanata tacshanami can. Chaita ruhuashca quipami carpa huasiman yaicunga.

27Juchata pichachun ñucaman cushca becitapish, chivotapish ñucahuan tupana huasimanta canzhaman apashpa, carandi, huanundi rupachinga. Chai yahuarca ñucapaclla ucupi juchata pichachun cushcami carca. 28Chaicunata rupachicpish armarishpa, churanata tacshanami can. Shina ruhuashpami carpa huasiman yaicunga.

29Caicunaca huiñaita ruhuachun mandashcami canga. Canchis quilla chunga punzhapica cancunapish, shuctac cancunahuan causaccunapish imata mana ruhuashpami llaquirishpa samarina canguichic. 30Cai punzhaca juchata pichachun Mandac Dios ñucaman animalta cushpa huañuchina punzhami canga. Chai punzhapimari ñucapac ñaupapi cancunaca jucha illac saquiringuichic. 31Chai punzhaca samarishpa, tucui shunguhuan llaquirina punzhami canga. Cai mandashcacunaca huiñaita chashnatac ruhuana mandashcami. 32Taitapac randi aceitehuan cahuishca, ñucapaclla chicanyachishca curami juchata pichachun ñucaman animalta cunga. Chai curaca ñucapacta ruhuangapac churarina lino churanatami churaringa. 33Chashna churarishpami ñucapaclla chicanyachishca ucutapish, ñucahuan tupana huasitapish, altartapish mapa illacta ruhuanga. Curacunapac juchatapish, tucui israelcunapac juchatapish pichachun animalta ñucaman cushpa huañuchinga.

34Caicunaca huatanta shuc cutin israelcunapac juchata pichachun animalta cuchun mandashcami. Caitaca huiñaitami ruhuana can» nirca.

Moisesca Mandac Dios mandashca shinallatacmi ruhuarca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index