Search form

LEVÍTICO 17

Diospac carpa huasipi ofrendata rupachinamanta

1Mandac Diosca Moisestaca: 2«Mandac Dios Aarontapish, paipac churicunatapish, tucui israelcunatapish mandashpaca:

3“Israelpuramanta maijan shuc huagrata, shuc maltón ovejata, shuc huarmi chivota carpa huasi ucupi, mana cashpaca canzhapi huañuchishpa, 4ñucahuan tupana huasi yaicunapi ñucaman cungapac mana apamushpa, paicuna causacuc ucullapitac, mana cashpaca canzhapi huañuchishcamantaca juchanchishcami canga. Shinallatac israelpuramanta anchuchishcami canga. 5Israelcunaca mana maipipish animalta huañuchinachu. Mandac Dios-huan tupana huasi yaicunaman apamushpami curaman cuna cana. Paimi ñucahuan alli tucungapac cuna animaltaca huañuchinga. 6Chai animalpac yahuartaca curallatacmi ñucahuan tupana huasi pungu pambapi Mandac Diospac altarpi chirapanga. Huiratapish chai altar jahuallapitacmi rupachinga. Chashna rupachicpimi, Mandac Diosman mishquilla ashnanga. 7Chashnami mana ashtahuan chivoman riccha dioscunaman animalta cunga. Chai dioscunata servishpami huainayarca. Israelcunaca cai mandashcacunatami huiñaita huahua huahuacunapish pactachishpa causana can” ningui.

8Shinallatac: “Maijan israelcunapuramanta, mana cashpaca shuctac llacta runa paicunapurapi causacpuramanta maijan ñucaman animalta tucui rupachisha nishpa, mana cashpaca imatapish ñucaman cusha nishpa, 9ñucahuan tupana huasi yaicunaman mana apamushpaca, israelcunapuramanta anchuchishcami canga.

Yahuarta mana micunamanta

10Israelcunapuramanta, mana cashpaca shuctac llactamanta cancunapurapi causacpuramanta yahuarta micucpica, mana ricunayachishpami israelcunapuramanta anchuchisha. 11Causaiyucca yahuarmantami causan. Yahuartaca ñucami cancunapac juchamanta altar jahuapi chirapachun curcani. Chai yahuarllamantami gentecunaca juchamanta perdonashca canga. 12Chaimantami ñucaca israelcunataca: Maijan israelcunapish, mana cashpaca shuctac llacta runa cancunapurapi causacpish, yahuartaca mana micunachu nircani.

13Israelcunapuramantapish, shuctac llacta runa cancunapurapi causacpuramantapish ima animalta, mana cashpaca volac animalta japishpaca, yahuarta tucui llucchishpa, allpapi pambana. 14Causaiyucca yahuarmantami causan. Chaimantami ñucaca israelcunata: Causaiyuccunaca yahuarmantami causan. Chaimanta ima animal yahuartaca ama micunguichic. Maijanpish yahuarta micucca israelcunapuramanta anchuchishcami canga” nircani.

15Israelpuramantapish, mana cashpaca shuctac llacta runa cancunapurapi causacpuramantapish huañushca animal aichata, mana cashpaca sacha animal huañuchishca aichata micushpaca, armarishpa churanata tacshanami can. Shina ruhuashpapish tutayangacamanmi mapa canga. Chai quipami mapa illac tucunga. 16Ashtahuanpish mana armarishpa, churanatapish mana tacshashpa juchallicca llaquitami apanga» nirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index