Search form

LEVÍTICO 18

Maijanllahuan mana chayarinamanta

1Mandac Dios Moisesta rimashpaca: 2«Israelcunataca: “Ñucami cancunata Mandac Dios cani. 3Cancuna causashca Egiptopi causaccuna shina, shinallatac cancuna causagricushca Canaán llactapi causaccuna shina, ama ruhuanguichicchu. Ama paicunapac mandashcacunata catinguichicchu. 4Ñuca mandashcacunata, ñuca yachachishcacunata cazushpa, pactachishpa causanguichic. Ñucami cancunata Mandac Diosca cani. 5Ñuca yachachishcacunata, mandashcacunata pactachinguichic. Tucui caicunata pactachishcamantami causanguichic. Ñucami Mandac Diosca cani.

6Maijan caripish quiquin familia huarmihuanca ama chayarichun. Ñucami Mandac Diosca cani.

7Cambac mamahuan chayarishpa, ama cambac taitata pingaichinguichu, paica cambac quiquin mamami, chaimanta ama chayaringuichu.

8Ama taitapac quipa huarmihuan chayarishpa, taitata pingaichinguichu.

9Ama taitapac, mana cashpaca cambac mamapac huahuahuan chayaringuichu. Quiquin huasipi huacharishca cacpipish, shuctac huasipi huacharishca cacpipish, ama chayaringuichu.

10Ama churipac ushihuan, ushipac huahuahuan chayaringuichu. Cambac yahuarpurami.

11Ama taitapac quipa huarmipac ushihuan chayaringuichu. Paica cambac lapani shinallatacmi.

12Ama taitapac panihuan chayaringuichu. Paica taitapac familiami.

13Ama mamapac ñañahuan chayaringuichu. Paica mamapac familiami.

14Ama taitapac huauquipac huarmihuan chayaringuichu. Paica cambac tiami.

15Ama churipac huarmihuan chayaringuichu. Paica cambac nuerami.

16Ama huauquipac huarmihuan chayaringuichu. Shina ruhuashpaca, cambac huauquitami pingaichingui. Paica cambac cuñadami.

17Mamahuanpish, paipac huarmi huahuahuanpish, shinallatac paipac nietahuanpish ama chayaringuichu. Chashna quiquinpura chayarinacushpaca, yalli llaquitami ruhuangui.

18Huarmi manarac huañucpi, paipac ñañahuanca ama chayaringuichu. Shina chayarishpaca piñanacunguichicmi.

19Ama quilla ungüihuan cac huarmihuan chayaringuichu.

20Ama shucpac huarmihuan chayaringuichu. Paihuan chayarishpaca mapayanguimi.

21Ama cambac cari huahuataca Moloc shuti ruhuashcalla diosman cushpa rupachinguichu. Chashna ruhuashpaca, cambac Diostami yangapi churangui. Ñucami Mandac Diosca cani.

22Huarmihuan chayaric shina, ama caripura chayaringuichicchu. Shina ruhuashpaca, yalli millaitami ruhuangui.

23Ama animalcunahuan chayaringuichu. Huarmipish ama imapish cari animalhuan chayaringuichu. Shina ruhuashpaca, yalli millaitami ruhuangui.

24Caicunata ruhuashpa, imapipish ama mapayanguichu. Cancunapac ñaupamanta llucchishpa cachashca gentecunaca caicunata ruhuashpami, llactata mapayachirca. 25Paicuna causacuc llactapish yallitami mapa tucurca. Chaimantami ñuca chai llactata llaquichingapac shamucpica, allpapish arcadac shina llucchishpa shitarca. 26Cancunaca ñuca mandashcacunata, ñuca yachachishcacunatami pactachina canguichic. Israelcunapish, shuctac llactamanta shamushpa cancunahuan causaccunapish cai gentecuna shina, millaitaca ama ruhuanguichicchu. 27Cancuna manarac cai llactaman yaicucpi, caipi causaccunaca yalli millaitami causarca. Chaimantami cai llactaca mapayarca. 28Pacta cancunatapish punta cai llactapi causaccunata arcadashpa shitac shina, millaita ruhuashcamantaca shitanman. 29Cancunapuramanta maijan cai tucui millaicunata ruhuacpica, israelcunapuramanta anchuchishcami canga. 30Cancunaca ñuca nishcata yuyarirashpa pactachinguichic. Pacta cancuna manarac cai llactaman shamucpi, causaccuna shina millaita ruhuashpa mapayanguichicman. Ñucami cancunata Mandac Diosca cani” ninmi ningui» nirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index