Search form

LEVÍTICO 2

Mandac Diosman cuna grano ofredamanta

1Maijanpish grano ofrendata Mandac Diosman cushpaca, ashtahuan alli harinapi aceitetapish, inciensotapish churashpami apamuna can. 2Chaitaca Aaronpac churi curacunamanmi cunga. Chaitaca curami maqui junda alli harinahuan, aceitehuan, inciensohuan chapushpa, yuyarina cachun, altar jahuapi rupachinga. Chaimi Mandac Diosmanca mishquilla ashnanga. 3Chai rupachishca puchu harinaca Diospacllami. Chaimantami Aaronman, paipac churicunaman cuna can.

4Hornopi cusashca grano ofrendata Diosman cungapacca, alli harinahuan, aceitehuan ruhuashca, levadura illac tortata, mana cashpaca levadura illac galletatami aceitehuan cahuishpa, apamuna can.

5Sartenpi cusashca grano ofrendata Diosman cungapacca alli harinahuan, aceitehuan ruhuashca, levadura illac tandatami apamuna can. 6Chaicunataca chaupishpami, chai jahuapi aceiteta tallishpa, cuna can. Chaica grano ofrendami can.

7Callanapi cusashca ofrendata Diosman cungapacca, alli harinahuan, aceitehuan ruhuashcatami apamuna can. 8Chashna allichishpaca, Diospac ñaupaman apamushpami, curaman cuna can. Chaitaca curami altarman apanga. 9Curallatacmi ashata japishpa, Mandac Diosman cushpa, yuyarina cachun, altar jahuapi rupachinga. Chaimi Mandac Diosmanca mishquilla ashnanga. 10Rupachishca puchushca harinaca Diospacllami. Chaimantami Aaronman, paipac churicunaman cuna can.

11Mandac Diosman cusashca grano ofrendaca levadura illactami cana can. Mandac Diosmanca imatapish mana levadurahuan, mana abeja mishquihuanchu cana can. 12Punta pucushca grano ofrendataca levadurahuan, abeja mishquihuanpish cui pudinmi. Shina cashpapish chaicunataca Mandac Diosman mishquilla ashnachunca, mana altar jahuapi churanachu can.

13Tucui grano ofrendatami cachihuan cuna can. Dios cancunahuan ari nishcata ricuchic cachitaca pacta ofrendapi churanata cungaringuiman.

14Punta pucushca grano ofrendata cushpaca, pucushca trigo umatapish, llullu espiga cutashcatapish ninapi camchashpami cuna can. 15Chaipica aceiteta, inciensota churashpami cuna can. Chaimi grano ofrendaca can. 16Curaca yuyarina cachunmi, chai cutashcataca aceitehuan chapushpa, inciensohuan altarpi rupachinga. Chaica Mandac Diosman cushpa rupachishcami canga.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index