Search form

LEVÍTICO 20

Mana cazuccunata ima shina llaquichina cashcamanta

1Mandac Dios Moisesta rimashpaca: 2«Israelcunataca: “Maijan israelcunapish, shuctac llactamanta shamushpa Israelpi causac cashpapish paipac huahuata Moloc diosman cucpica, huañuchishcami canga. 3Moloc diosman paipac huahuata cushpa, jucha illac ñuca shutita yangata ruhuashcamanta, ñucapaclla chicanyachishca huasitapish mapayachishcamantaca piñashpami chai runataca israelpuramanta anchuchisha. 4Chai llactapi causaccuna Moloc diosman huahuata cuc runata mana huañuchingaraicu ñahuita huichcac shina tucucpica, 5ñucami paicunahuan piñarishpa, familiandi, chai diosman huahuata cushpa huainayaccunandi israelpuramanta anchuchisha.

6Maijanpish brujocunata, adivinocunata catishpa huainayac runataca piñarishpami israelpuramanta anchuchisha.

7Ñucaca cancunata Mandac jucha illac Diosmi cani. Chaimanta cancunapish ñucapaclla tucushpa, jucha illac caichic. 8Ñuca mandashcacunataca pactachinguichic. Ñucami jucha illacta ruhuashpa, chicanyachic Mandac Dios cani.

9Maijanpish paipac taita mamata imapish tucushca canman nicca huañuchishcami canga. Paica mana allita ruhuashcamantami huañuchishca canga.

10Maijan shucpac huarmihuan huainayacpica, caritapish, huarmitapish huañuchishcami canga.

11Maijanpish paipac taitapac huarmihuan chayarishpaca, paipac taitatami pingaichin. Chaimantami caritapish, huarmitapish huañuchishca canga. Paicunaca mana allita ruhuashcamantami huañuchishca canga.

12Maijanpish paipac nuerahuan chayaricpica, ishcaitacmi huañuchishca canga. Paicunaca mana allita ruhuashcamantami huañuchishca canga.

13Maijanpish caripura chayaricpica, ishcaitatacmi huañuchishca canga. Paicunaca mana allita ruhuashcamantami huañuchishca canga.

14Maijanpish mamahuapish, huahuahuanpish cazarashpaca mancharina juchatami ruhuan. Chaimantaca quimsatacmi causacta rupachishca canga. Chashna ruhuacpimi, cancunapurapi yalli mancharina juchaca mana tiyanga.

15Maijanpish animalpi chayaricca, huañuchishcami canga. Shinallatac chai animaltapish huañuchinami canguichic.

16Maijan huarmi shuc animalhuan chayarinacungapac cuchuyacpica, paipish, animalpish, huañuchishcami canga. Paicunaca mana allita ruhuashcamantami huañuchishca canga.

17Maijanpish taitamanta panihuan, mamamanta panihuan chayarinacushpaca mancharina pingaitami ruhuan. Chaimantaca paicunapac llacta gentecuna ricucucpi, ishcaitac huañuchishcami canga. Quiquin panihuan mancharina pingaita ruhuashpaca paillatacmi juchata aparinga.

18Maijanpish quilla ungüihuan cac huarmihuan chayarishpaca, huarmipac yahuar llucshicushcatami ricun. Cutin huarmipish yahuar llucshicushcatami ricuchin. Chaimanta ishcaitacmi chai llactamanta anchuchishca canga.

19Cambac mamapac ñañahuan, taitapac panihuan ama chayaringuichu. Chashna familiapura chayarishpa mancharina pingaita ruhuashcamantaca ishcaitacmi chai juchamanta llaquichishca canga.

20Maijanpish tiahuan chayarishpaca, quiquin tiotami pingaichin. Chaimanta ishcaitacmi chai juchamantaca mana huahuata charishpa huañunga.

21Maijanpish huauquipac huarmihuan chayarishpaca, mancharina juchata ruhuashpami quiquin huauquita pingaichin. Chashna millaita ruhuashcamantaca ishcaitacmi mana huahuata charinga.

22Ñuca mandashcacunatapish, yachachishcacunatapish pactachinguichic. Chashna ruhuacpimi, cancuna causachun ñuca cushca llactaca mana arcadac shina, llucchishpa cachanga. 23Cancunapac ñaupamanta ñuca llucchishpa cachagricuc gentecuna shinaca, ama causanguichicchu. Paicunataca yalli millaita ruhuashcamantami millanayachishpa, llucchishpa cacharcani. 24Ñucami paicuna causashca llactataca cancuna causachun cusha. Lechepish, mishquipish yacu shina callpacuc sumac allpataca cancuna causachunmi cusha. Cancunata Mandac Diosmi cani. Ñucami shuctac llacta gentecunamanta chicanyachishpa acllarcani.

25Chaimantami cancunapish maijanlla micuna animal cashcata, maijanlla mana micuna animal cashcata, shinallatac volac animalcunatapish maijanlla micuna cashcata, maijanlla mana micuna cashcata chicanyachina canguichic. Ñuca chicanyachishca mana micuna animalcunataca volac animaltapish, pambata aisarishpa puric animaltapish ama micunguichicchu. Chaicunata micushpaca mapayanguichicmi. 26Ñucaca cancunata Mandac jucha illac Diosmi cani. Chaimanta cancunapish, jucha illac caichic. Cancunataca ñucapaclla cachunmi shuctac llacta gentecunamanta chicanyachircani.

27Cari cashpa, huarmi cashpa huañushcapac almahuan parlac, adivino tucucca, ishcaitac rumihuan shitashpa huañuchishcami canga. Paicunaca mana allita ruhuashcamantami huañuchishca canga” ninmi ningui» nirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index