Search form

LEVÍTICO 21

Curacuna jucha illac causanamanta

1Mandac Diosca Moisestaca: «Aaronpac churi curacunataca: “Cancunapac llactapi huañushcapi tuparishpa ama mapayanguichicchu. 2Chaica, cancunapac familiamanta taita, mama, huauqui, churi, ushi, 3huasipi tiyac carihuan manarac chayarishca soltera huañucpica tuparinallami. 4Maijan familia huañushcapi tuparishpa mana mapayanachu can.

5Acchatapish mana pitirinachu, barbastapish mana anchuchinachu, mana cuerpota chugririnachu. 6Paicunaca ñucaman cushpa rupachiccunami. Chaimantami ñucapac shutita mana mapayachingapac, ñucapaclla chicanyarishca, jucha illac cana can.

7Paicunaca ñucapaclla curacunami. Chaimanta cullquimanta huainayac huarmihuanpish, cusamanta raquirishca huarmihuanpish, shuc cari chayarishca solterahuanpish mana cazaranachu can. 8Paicunaca ñucaman micunata cuccunami. Chaimanta paicunataca Mandac Dios ñucapaclla cashca, jucha illac cashcata yuyanguichic. Ñucaca jucha illacmi cani. Chaimanta paicunapish jucha illacmi cana can. Ñucami jucha illacta ruhuacpish cani.

9Curapac ushi cullquimanta huainayashpaca, paipac taitatami mapayachin. Chaimantaca paitaca causactami rupachina can.

10Cancunapuramanta aceitehuan cahuishca, shinallatac ñucapaclla chicanyachishca churanata churarishca mandac cura cashpaca, mana acchata cacharishcachu purina can. Churanatapish mana lliquirinachu can. 11Huañushca siricuc ucumanpish mana yaicunachu can. Chai huañushca paipac taita mama cacpipish, mana mapayanachu can. 12Aceitehuan cahuishca, ñucapaclla caccunaca ñucapaclla chicanyachishca ucumantaca llucshishpa, mana mapayachinachu can. Ñucami Mandac Dios cani.

13Curaca carihuan manarac chayarishca solterahuan cazarana can. 14Viudahuanpish, cusamanta raquirishca huarmihuanpish, maijan japirishca huarmihuanpish, cullquimanta huainayac huarmihuanpish mana cazaranachu, ashtahuanpish quiquin llactamanta cac, carihuan manarac chayarishca solterahuanmi cazarana can. 15Chashna cazaracpimi, llactapi causac cancunapac huahua huahuacunaca mana mapayanga. Ñucaca cancunata ñucapacllata ruhuashpa, chicanyachic Mandac Diosmi cani” ningui» nirca.

16Mandac Diosca Moisestaca: 17«Aarontaca: “Cambac huahua huahuapuramanta maijan lisiado runaca ñucaman ofrendata cungapac mana cuchuyanachu can. 18Lisiado runaca manatac cuchuyanchu can. Ñahui mana ricuccunapish, huishtucunapish, ima pitishcacunapish, lisiado huacharishcacunapish ñucapacmanca manatac chayarinachu can. 19Chaqui maqui paquishcacunapish, 20curcucunapish, uchilla runacunapish, ñahuipi yurac tiyarishca runacunapish, shicshi, mana cashpaca lepra ungüihuan cac runacunapish, ruru ungushca runacunapish ñucapacman mana cuchuyanachu can. 21Aaronpac aillupuramanta maijan lisiado runaca ofrendata cushpa, rupachingapac mana ñucapacman mana cuchuyanachu can. Lisiado runaca manatac ñucapacman cuchuyanachu can. 22Shina cashpapish, ñucapaclla chicanyachishcamanta ashtahuan chicanyachishcataca micui pudinmi. 23Ashtahuanpish paica lisiadomi. Chaimanta ñucapaclla chicanyachishca ucuta jarcachishcataca mana pasai pudinchu. Altarmanpish mana cuchuyai pudinchu. Shinami ñucapaclla chicanyachishca ucutaca mana mapayachinga. Ñucaca Mandac Diosmi cani. Ñucami ñucapaclla cachun chicanyachic cani” ningui» nirca.

24Moisesca chashnami Aaronmanpish, paipac churicunamanpish, israelcunamanpish huillarca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index