Search form

LEVÍTICO 23

Fiestacunata ruhuanamanta

(Num 28.16—29.40)

1Mandac Diosca Moisestaca: 2«Tucui israelcunataca: “Tandanacushpa ñucapaclla chicanyachishca fiestacunata ruhuashpaca, cashnami ruhuana canguichic.

Samana punzhamanta

3Sucta punzhata trabajanguichic. Ashtahuanpish canchisniqui punzhaca samarinami, ñucapaclla chicanyachishca tandanacuitami ruhuana canguichic. Cancuna maipi causacushpapish chai punzhapica samarishpami, Mandac Dios ñucata yuyarina canguichic.

Levadura illac tanda micuna fiestamanta

4Mandac Dios ñucata alli nina, ñucapaclla fiestacunaca caicunami. Chaiman tandanacuchunmi huillana canguichic.

5Callari quilla, chunga chuscu punzha chishica Mandac Dios ñucapac Pascua punzhami canga.

6Chunga pichca punzhaca Mandac Dios ñucata yuyarishpa, levadura illac tandata micuna punzhami canga. Chai tandataca canchis punzhacamanmi micuna canguichic. 7Chai fiesta callari punzhapica ñucapaclla chicanyachishca tandanacuimanmi cayana canguichic. Chai punzhapica ima trabajota ama ruhuanguichicchu. 8Canchis punzhacamanmi Mandac Dios ñucaman cushpa rupachina canguichic. Canchis punzhapica ñucapaclla chicanyachishca tandanacuimi canga. Chai punzhapica ima trabajota ama ruhuanguichicchu” ninmi ningui» nirca.

Cosecha callari fiestamanta

9Mandac Dios Moisesta rimashpaca: 10«Tucui israelcunataca: “Cancuna ñuca cushca llactaman yaicushpa, cosechashpaca shuc gavillata curaman cunguichic. Chai gavillaca punta ñucaman cushcami canga. 11Chai gavillataca samana punzha cayandimi curaca cuyuchishpa, ñucaman cunga. Chashna cucpimi, ñucaca chasquisha. 12Punta pucushca gavillata cui punzhallatacmi shuc huatayuc ima mana tucushca cari ovejata ñucaman cushpa tucui rupachina canguichic. 13Mandac Dios ñucaman mishquilla ashnachunca, chuscu kilo chaupi alli harinata aceitehuan chapushpa cunguichic. Chaica, ñucaman mishquilla ashnachun, rupachishcami canga. Shuc litro chaupi tallina vinotapish cunguichic. 14Punta pucushcata ñucaman manarac cushpaca, tandatapish, trigo camchatapish, trigo umatapish ama micunguichicchu. Cai mandashcacunaca cancunapac huahuacuna maipi cashpapish huiñaita pactachichun mandashcami.

15Samana punzhapi gavillata huichai cuyuchishpa cushca punzhamantaca canchis semanata yupanguichic. 16Canchis samana punzha cayandi punzhacamanca pichca chunga punzhami canga. Chai punzhapica cutin shuc mushuc granotami Mandac Dios ñucaman cuna canguichic. 17Cuyuchishpa ñucaman cungapacca cancunapac huasimanta alli harinata levadurahuan ruhuashca ishcai tandata apamunguichic. Caimi punta pucushca granomanta Mandac Dios ñucaman cushcaca canga. Chaicunaca cada tandami chuscu kilo alli harinamanta ruhuashca canga. 18Chaihuanca shuc huatayuc ima mana tucushca canchis cari ovejatapish, shuc becitapish, ishcai cari ovejatapish cunguichic. Chaicunami grano ofrendahuan, tallina vinohuan ñucaman cushpa, tucui rupachishca canga. Chashna rupachishcami Mandac Dios ñucamanca mishquilla ashnanga.

19Shinallatac juchata pichachunca shuc cari chivota, cutin ñucahuan alli tucungapacca shuc huatayuc ishcai cari ovejata cunguichic. 20Chaitaca punta pucushca granomanta ruhuashca ishcai tandahuanmi curaca cuyuchishpa, Mandac Dios ñucamanca cunga. Chaicunaca ñucapaclla chicanyachishca cashcamantami curapac canga.

21Chai punzhallapitacmi ñucapaclla chicanyachishca tandanacuiman cayana canguichic. Chai punzhapica ima trabajota ama ruhuanguichicchu. Cai mandashcacunaca cancunapac huahua huahuacuna maipi causashpapish huiñaita pactachichun mandashcami can.

22Cancunapac allpapi cosechashpaca ama tucui tandanguichicchu. Pambapi urmashcacunatapish ama pallanguichu. Chai urmashcataca huacchacunaman, shuctac llactata runacunaman saquinguichic. Ñucaca cancunata Mandac Diosmi cani” ninmi ningui» nirca.

Trompetapi tocana fiestamanta

23Mandac Diosca Moisestaca: 24«Israelcunataca: “Canchis quilla callari samana punta punzhapica ñucapaclla chicanyachishca tandanacuita ruhuanguichic. Chai punzhapica trompetapi tocashpa, ñucata yuyaringuichic. 25Chai punzhapica ima trabajota ama ruhuanguichicchu. Mandac Dios ñucaman ofrendata rupachinguichic” ninimi ningui» nirca.

Juchata perdonana punzhamanta

26Mandac Dios Moisesta rimashpaca: 27«Canchis quilla, chunga punzhaca juchata pichana punzhami canga. Chai punzhaca ñucapaclla chicanyachishca tandanacuita ruhuanguichic. Chai punzhapica cumurishpami, Mandac Dios ñucaman ofrendata cushpa, rupachina canguichic. 28Chai punzhaca juchata pichana punzhami. Chaimanta chai punzhapica ama trabajanguichicchu. Chai punzhapica cancunata Mandac Dios ñucapac ñaupapi cancunapac juchata pichachun ñucaman ofrendata cuna punzhami. 29Maijanpish chai punzhapi mana ayunacca israelpuramanta anchuchishcami canga. 30Maijanpish chai punzhapi ima trabajota ruhuactaca ñucallatacmi israelpuramanta chingachisha. 31Chaimanta chai punzhapica ama trabajanguichicchu. Cai mandashcacunaca cancunapac huahua huahuacuna maipi causashpapish huiñaita pactachichun mandashcami. 32Chai punzhaca samarishpa, Mandac Dios ñucata yuyarina punzhami can. Chaimanta canchis quilla iscun punzha chishimanta cayandi chishicaman ayunanguichic» nirca.

Chucllata ruhuana fiestamanta

33Mandac Diosca Moisestaca: 34«Israelcunataca: “Cai canchis quillallapitac chunga pichca punzhapica chucllacunata ruhuashpami canchis punzhacaman Mandac Dios ñucapaclla fiestata ruhuana canguichic. 35Chai callari punzhapica Mandac Dios ñucapaclla chicanyachishca tandanacuna punzhami canga. Chai punzhapica ima trabajota ama ruhuanguichicchu. 36Canchis punzhatami Mandac Dios ñucaman cushpa rupachina canguichic. Pusacniqui punzhapica ñucapaclla tandanacuita ruhuashpami ñucaman cushpa rupachina canguichic. Chai punzhapica ima sinchi trabajota ama ruhuanguichicchu.

37Chaicunami Mandac Dios ñucapac fiesta punzhacunaca. Cai punzhacunapica Mandac Dios ñucaman cushpa rupachingapac, animalta ñucaman cushpa tucui rupachingapac, grano ofrendata cungapac, animalta huañuchishpa cungapac shinallatac vinota tallishpa cungapacmi ñucapaclla chicanyachishca tandanacuita ruhuana canguichic. Chaicunataca chai punzhallapitac ruhuanguichic. 38Samana punzhapi Mandac Dios ñucaman cushca jahuapish, cushami nishcamanta cushca jahuapish, quiquin munaimanta cushca jahuapishmi chashna cuna canguichic.

39Chai canchis quillallapitac, chunga pichca punzhapi cancunapac allpapi pucushca granota ña tucui cosechashca quipaca Mandac Dios ñucamanmi canchis punzhata fiestata ruhuana canguichic. Chai fiesta callari punzhapish, tucuri pusac punzhapish samarinami canguichic. 40Chai callari punzhapica tucuimanta yalli alli yuracuna pucushca granotapish, palmera ramacunatapish, pangasapa ramacunatapish, yacu cuchupi tiyac sauce ramacunatapish japishpami, canchis punzhata Mandac Dios ñucapac ñaupapi cushicuna canguichic. 41Cada huatami canchis quilla canchis punzhapi Mandac Dios ñucaman fiestata ruhuana canguichic. Cai mandashcacunaca cancunapac huahua huahuacuna maipi causashpapish huiñaita pactachichun mandashcami can. 42Chai llactallapitac huacharishca israelcunaca canchis punzhatami chucllacunapi causanga. 43Egipto llactamanta cancunata ñuca llucchimushpa, chucllacunallapi causachun churashcata cancunapac huahua huahuacuna yachachunmi, chashna ruhuana canguichic. Ñucami cancunata Mandac Dios cani” ninmi ningui» nirca.

44Chashnami Moisesca Mandac Diosman jatun fiestacunata ruhuanata israelcunaman huillarca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index