Search form

LEVÍTICO 24

Lamparacunata japichinamanta

(Ex 27.20-21)

1Mandac Diosca Moisestaca: 2«Tutapish, punzhapish achicyachichun lamparacunapi churangapac olivosllamanta ruhuashca alli aceiteta apamuchun israelcunata mandai. 3Chaitaca ñucahuan tandanacuna huasi ucupi cac ñucapaclla jarcachishca pushtupi ñucapac ñaupapi tutapish, punzhapish japirichunca, Aaronmi allichinga. Cai mandashcacunaca cancunapac huahua huahuacuna maipi causashpapish huiñaita pactachichun mandashcami can. 4Mandac Dios ñucapac ñaupapi punzhanta achicyachichunca, alli curi candelerocunatami filapi churana can.

Mandac Diospac ñaupapi churana tandacunamanta

5Alli harinamanta chunga ishcai tandata ruhuangui. Cada tandami chuscu kilo chaupi harinata charina can. 6Mandac Dios ñucapac ñaupapi cac curi miza jahuapi ishcai filata ruhuashpa, suctata cada filapi churangui. 7Chai filacunapica imahuan mana chapushca alli inciensota churangui. Chai tandacunami yuyaringapac ñucaman cushpa, rupachishca canga. 8Chai tandacunataca tucui samana punzhami israelcunapac shutipi, ñucahuan ari nishcata pactachingapac churanga. 9Mandac Dios ñucaman cushpa tandacunaca ñucapaclla chicanyachishcami. Chaimantami Aaronpish, paipac churicunapish ñucapaclla chicanyachishca pushtupi micunga. Cai mandashcaca huiñaita pactachichun mandashcami can» nirca.

Diosta camiccunata llaquichinamanta

10Chai punzhapica Israel huarmimanta huacharishca Egipto runapac churimi israelcunapurapi causacurca. Paimi shuc punzhaca carpa huasi cuchupi shuc Israel runahuan piñanacurca. 11Chai Israel huarmipac cari huahuami Diospac shutita rimashpa nirca. Chaimantami Moisespacman aparca. Paipac mamaca Dan aillumanta Dibripac ushi Selomitmi carca. 12Paita japishpaca, Mandac Dios imata ningacamanmi carcelpi churarca. 13Chaimantami Mandac Diosca Moisestaca: 14«Tucui camishpa rimashcata uyaccuna paipac uma jahuapi maquita churachun, chai runata carpa huasimanta canzhaman llucchi. Chai quipaca tucui israelcuna tandanacushpa, rumihuan shitashpa huañuchichun. 15Cutin israelcunataca: “Maijanpish Diospac shutita camishpa rimacca chashna llaquillatatacmi apanga. 16Maijanpish Diospac shutita mana alli nishpa rimactaca Israel cacpipish, mana Israel cacpipish rumihuan shitashpa huañuchinami can.

17Maijanpish huañuchictaca paitapish huañuchishca cachun. 18Maijanpish shucpac animalta huañuchishpaca animalyucman chashnallatatac cutichichun.

19Maijanta lisiachictaca paitapish lisiachichun. 20Macashpa imata paquictaca paitapish chashnallatac ruhuachun. Ñahuita surcuctaca paitapish ñahuita surcuchun, quiruta surcuctaca paitapish quiruta surcuchun. Maijanpish ima shina llaquichictaca chashnallatac llaquichichun.

21Maijanpish shuc animalta huañuchishpaca, animal-llatatac cutichichun. Maijanpish genteta huañuchictaca paitapish huañuchichun.

22Chai mandashcallatacmi israelcunapacpish, shuctac llacta gentecunapacpish canga. Ñucami cancunata Mandac Dios cani” ningui» nirca.

23Moisés tucui caicunata israelcunaman huillacpica, Diospac shutita mana alli nishpa rimactaca carpa huasimanta canzhaman llucchishpami, rumihuan shitashpa huañuchirca. Israelcunaca Mandac Dios ima shinami Moisesman nishca shinallatacmi ruhuarca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index