Search form

LEVÍTICO 25

Allpata samachina huatamanta

1Mandac Dios Sinaí urcupi Moisesta rimashpaca: 2«Israelcunataca: “Ñuca cusha nishca llactaman cancuna yaicushpaca, Mandac Dios ñucata alli ningapacmi allpataca samachina canguichic. 3Sucta huatatami tarpuna canguichic. Sucta huatatami uvas ramatapish pitina, shinallatac uvasta pallana canguichic. 4Ashtahuanpish canchisniqui huatapica, Mandac Dios ñucata alli ningapacmi imata mana tarpushpa, uvas chagratapish mana allichishpa, allpata samachina canguichic. 5Shinallatac cosechashca quipa iñal chagratapish, ama cosechanguichicchu. Paillatac huiñashca uvas chagratapish ama allichinguichicchu, ama cosechanguichicchu. Chai huataca allpata samachina huatami can. 6Allpaca samana huatacunapish canman, canta servic caricunamanpish, servic huarmicunamanpish, cullquimanta trabajaccunamanpish, caru llacta cancunahuan causac runacunamanpish pucungami. 7Cambac animalcunamanpish, cai allpapi tiyac sacha animalcunamanpish micuna tiyangami.

8Canchis cutin canchis huatata yupanguichic. Shina canchis cutin canchista yupacpica, chuscu chunga canchis huatami tucunga. 9Juchata pichana canchis quilla, chunga punzhapi tucui llactapi trompetapi tocashpa uyachinguichic. 10Pichca chunga huata tucucpica, ñucapaclla cachun chicanyachinguichic. Chai huataca huatashca shinamanta cacharina huatami canga. Chaimanta tucui Israel llactapi huillanguichic. Chai huatapica tucuimi quiquin allpaman, shinallatac quiquin familiacunapacman cutinga. 11Pichca chunga huataca huatashca shinamanta cacharirina huatami. Chai huatapica ama tarpunguichicchu, iñal huiñashca trigotapish ama cosechanguichicchu. Iñal huiñashca uvastapish ama pallanguichicchu. 12Ashtahuanpish chai huataca huatashca shina causacushcamanta llucchina huata cashcamanta ñucapaclla chicanyachishcami canga. Chaimanta allpapi paillatac pucushca granollatami micuna canguichic.

13Huatashca shina causacushcamanta llucchina huatapica tucui cancunami quiquin allpaman cutina canguichic.

14Cancunapac ricsishcaman allpata catushpa, mana cashpaca randishpaca ama umanguichicchu. 15Cacharirishpa cushicuna huatamanta mashna huata cashcata yupashpa paganguichic. Shinallatac catucpish, mashna huatahuan tarpuna cashcata yupashpami catuna can. 16Achca huata tarpuna siricpica, achcallatatacmi pagana can. Ashalla huatacuna tarpuna siricpica, ashallatatacmi pagana can. Mashna huatata cosechana cashcata ricushpami catuna can.

17Cancunapuramanta maijan cashpapish ama umanguichicchu. Chaipac randica, Mandac Dios ñucata manchaichic. Ñucaca cancunata Mandac Diosmi cani. 18Ñuca mandashcacunata cazushpa, ñuca nishcacunata pactachinguichic. Chaita ruhuashpaca, imata mana manchashpami, chai llactapica causanguichic. 19Chai llactapica allpapish sumaimana granotami pucunga. Shina pucucpica, huicsa pacta micushpami, mana manchashpa causanguichic.

20Canchis huata tucucpi, imata mana tarpushpa, imata mana cosechashpaca: ‘¿Imatatac micushunyari’ ninguichicchari? 21Ñucaca suctaniqui huatapi tarpushca chagratami ashtahuan alli pucuchisha. Chaimantami quimsa huatapac micunata charinguichic. 22Pusacniqui huatapi granota tarpucushpapish iscunniqui huatapi cosechangacamanmi chai granota micunguichic.

23Allpaca ñucapacmi. Chaimanta ama tucui causaipac catunguichicchu. Cancunaca shuctac llactamanta shamushpa pozac shinallami canguichic. 24Chaimanta maijanpac allpata randishpaca chai catucllatac randichunmi saquina canguichic.

25Cancunapuramanta maijan huaccha cashcamanta allpata catucpica, paipac cuchulla familiami randicman cullquita cutichishpa, chai allpataca saquichina can. 26Chai catuc runapac cuchulla familia cullquita mana charicpica, paillatacmi cullquita tandashpa, allpata saquichina can. 27Chai allpata catushca huatamanta yupashpa, tarpuna mashna huatacuna sirishcata yupashpami cutichina can. Shina cutichishpami, cutinllatac chai allpataca saquichinga. 28Ashtahuanpish allpata cutichingapac mashna valishcata cungapac mana charicpica, chai allpaca huatashca shinamanta cacharirina huatacamanmi chai randicpacllatac canga. Chai huata pactacpimi, chai allpaca paillamantac cutinga.

29Maijanpish muyundita pircashca llactapi tiyac huasita catushpaca, catushca manarac huata tucucpimi, chai huasita randicman cullquita cutichishpa, huasita saquichina can. 30Ashtahuanpish huatacaman huasita catuc runa randic runaman cullquita mana cutichi pudicpica, chai huasica randicpac, shinallatac paipac huahua huahuacunapacmi huiñaipac saquiringa. Cacharirina huata pactacpipish, chai huasitaca mana cutinachu can. 31Ashtahuanpish muyundita mana pircashca uchilla llacta huasita catushcaca allpata catushca shinallami. Chai huasitaca cullquita cutichishpa japinata pudinmi. Shinallatac cacharirina huatapipish chai huasitaca japinata pudinmi.

32Levitacunaca paicunapac llactapi catushca huasitaca ima horaspish cullquita cutichishpa saquichi pudinmi. 33Israelcunapurapica levitacunaca huasita charinmi. Chaimanta maijan levitacuna paicunapac huasita randishpaca, cacharina huatapimi catucllamantac cutichishpa, chai huasimanta llucshina can. 34Ashtahuanpish levitacuna causana llacta muyundi michina allpaca huiñaipacmi paicunapac canga. Chaimantami chai allpataca mana catuna can.

35Cancunapuramanta maijanpish huaccha tucushpa, mana causai pudishpa, canman mañacpica, paita ayudangui. Paica shuctac llactamanta shamushca shinami canhuanca causan. 36Imata mañachishpaca, interestapish, interesmanta yallitapish ama cobranguichu. Chaipac randica, cancunapac Dios ñucata manchangui. Shinallatac chai runatapish canhuan causachun saquingui. 37Cullquita mañachishpapish ama interesta cobranguichu. Ima micunata catushpapish ama yallipi catunguichu. 38Ñucaca cancunata Mandac Diosmi cani. Canaán llactata cungapac, shinallatac cancunata Dios cangapacmi cancunataca Egipto llactamanta llucchircani.

39Cancunapuramanta maijanpish cancunahuan causacushpa, huaccha tucushpa, canman caturicpica, ama randishca servicta shina trabajachinguichu. 40Paica shuc trabajac runa shina, shinallatac shuctac llactamanta shamushca runa shinami canhuanca causana can. Paica cacharirina huatacamanmi chashna servinga. 41Chai huata pactashca quipaca cambac huasita saquishpami, huahuacunata pushashpa, paipac familiapacman rishpa, paipac taitacunapac allpapi causanga. 42Paicunaca ñucata serviccunami. Ñucaca Egipto llactamantami paicunataca llucchimurcani. Chaimantami huatashca shina causachunca, mana catushca cana can. 43Chaimanta paicunataca ama sinchita mandashpa charinguichu, ashtahuanpish cambac Dios ñucata manchangui.

44Cancuna servic carita, servic huarmita charishun nishpaca, cuchulla llactacunapi randinguichic. 45Shuctac llactamanta shamushpa cancunahuan causaccunapac huahuacunata, chashnallatac paicunapac familia cancunapurapi huacharishca huahuacunatami randina canguichic. Paicunatami cancunapac cachun randi pudinguichic. 46Cancuna huañushpaca paicunataca herencia shinata huahuacunaman saqui pudinguichicmi. Chashnami paicunaca huahuacunata huiñaita servishpa causanga. Shina cacpipish, israelcunapuramanta cancunata servicpica, ama sinchita mandashpa llaquichinguichicchu.

47Caru llactamanta shamushpa, cambac llactapi causac runa chayuc tucucpi, cutin paipac cuchullapi causac israelcuna huaccha tucushpa, pai caru llactamanta cac runaman, mana cashpaca maijanpish paipac familiacunaman caturicpica, 48randic runaman cullquita cutichishpa, cacharichi pudinguichicmi. Caitaca maijanpish paipac huauquillatacmi cacharichi pudin. 49Mana cashpaca paipac tio, primo, chashnallatac maijanpish paipac cuchulla familiacunami cacharichi pudin. Mana cashpaca paillatac cullquita cutichi pudishpaca, paillatacmi cacharirina can. 50Randic runahuanmi caturishca huatamanta cacharirina huatacaman mashna huata tiyashcata yupana can. Mashnapi caturishcatapish, caturishca punzhamanta mashna huata servishcatapish yupashpami, shuc runa trabajashcamanta mashnata japic cashcata ricushpa cutichina can. 51Achca huatacuna servina tiyacpica, tucui chai huatacunamantami catushca cullquillatatac cutichina can. 52Ashtahuanpish cacharirina huatapac ashalla huatacuna siricpica, paihuan yupashpa, chai huatacunallamanta mashnata cutichina cashcata cutichina can. 53Paitaca ama sinchita mandashpa charinguichu, ashtahuanpish cullquimanta trabajac runa shinata charingui.

54Chai huatacunapi cullquita mana cutichi pudishpa, mana llucshishpaca cacharirina huatapimi paipac huahuacunandi llucchina can. 55Israelcunaca ñucata serviccunami. Paicunataca ñucallatac servichunmi Egipto llactamanta llucchimurcani. Ñucaca cancunata Mandac Diosmi cani.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index