Search form

LEVÍTICO 27

Diosman cushcacunaca paipaclla cashcamanta

1Mandac Diosca Moisesta rimashpaca: 2«Mandac Diosca israelcunataca: “Ñucata servingapac ari nishca runataca shuc runa mashna valic cashcata pagashpami cacharichina can. 3Chaica, ñucapac carpa huasipi tiyac siclos cullqui valishca shinami pagana can. Ishcai chunga huatamanta sucta chunga huatata charic runamantaca pichca chunga siclos cullquitami pagana can. 4Huarmimantaca quimsa chunga cullquitami pagana can.

5Pichca huatamanta ishcai chunga huatata chariccamanca ishcai chunga siclos cullquita pagana can. Huarmimantaca chunga siclos cullquitami pagana. 6Cutin shuc quillamanta pichca huatata charic huahuamantaca pichca siclos cullquitami pagana can. Huarmimantaca quimsa siclos cullquitami pagana can.

7Sucta chunga huatata charicmanta huichaimanca chunga pichca siclos cullquitami pagana can. Huarmimantaca chunga siclos cullquitami pagana can.

8Ashtahuanpish huaccha cashcamanta mana pagai pudicpica, curapacmanmi apana can. Chaipimi curaca mashnata pagai pudishcata pagachinga.

9Mandac Dios ñucaman shuc animalta cusha nishcaca ñucapaclla chicanyachishcami saquiringa. 10Chai animaltaca mana alli animalhuanca mana cambianachu. Alli animalpac randi, mana alli animaltapish mana cunachu. Chashna cambiacpica, ishcaitacmi Diospaclla saquiringa.

11Mana micuna animal cashcamanta Mandac Dios ñucaman mana cuipaclla cacpica, curapacmanmi apana can. 12Curami alli cacta, mana alli cacta ricushpa, mashna valishcata huillanga. Mashna valishcata huillacpica, chai huillashca shinallatacmi saquiringa. 13Chai animalmanta cullquita cusha nishpaca, chai animal mashna valishca cada chunga cullquimanta ishcai cullqui yallihuanmi pagana can.

14Maijan cashpapish Mandac Dios ñucaman shuc huasita cucpica, chai huasica ñucapaclla chicanyachishcami saquiringa. Chai huasitaca curami alli cacta, mana alli cacta ricushpa, mashna valishcata huillanga. Mashna valishcata huillacpica, chai huillashca shinallatacmi saquiringa. 15Shina cacpipish, chai huasita cucllatac saquichisha nishpaca, chai huasi mashna valishca cada chungamanta ishcai cullqui yallihuanmi pagana can. Chashna ruhuacpica, chai huasica paipacllatacmi saquiringa.

16Maijanpish paipac allpamanta asha allpata Mandac Dios ñucapaclla cachun cucpica, chai allpa chunga almud cebada muyu yaicuipac cacpica, pichca chunga siclos cullquimi valin ningami. 17Allpata cacharina huatapi Mandac Dios ñucaman chicanyachishpa cucpica, chai valillatacmi saquiringa. 18Allpata cacharina huatapi mana cushpa, quipa huatapi cucpica, curami cacharina huatacaman mashna huata tiyacta yupashpa, chai huatacunallamanta mashna valishcata huillanga.

19Allpayucllatac saquichisha nishpaca, chai allpa valishca cada chunga cullquimanta ishcai cullqui yallihuanmi pagana can. 20Maijanpish chai allpamanta mana pagai pudicpi, shucman catucpica, ña mana ashtahuan chai allpataca cutichi pudingachu. 21Allpata cacharina huatapi mana pi japicpica, chai allpaca Diospacllami tucunga. Chaitaca curami japinga.

22Maijanpish mana herencia allpata, ashtahuanpish randishca allpata Mandac Dios ñucaman cucpica, 23curami cacharina huatacaman mashna valina cashcata paihuan parlanacushpa huillanga. Chai allpaca Mandac Dios ñucapaclla cashcamantaca chai punzhallatacmi pagana can 24Allpata cacharina huatapica chai allpaca punta catucllamantacmi cutina can.

25Tucui imatapish ñucahuan tupana huasipi tiyac cullqui mashna valishcapimi valichina can. (Chai cullquica ishcai chunga gerasmi valin).

26Tucui punta huacharishcaca Mandac Dios ñucapacmi. Chaimantami huagrapish, ovejapish ñucapaclla cachun mana chicanyachi pudinga. 27Ashtahuanpish punta huacharishca animal mana alli cacpica, mashna valina cashcataca ricushpami, preciota churanga. Chaipac jahuapica cada chunga cullquimanta ishcai cullqui yallihuanmi pagana can. Chai animal mashnata valishcata mana pagai pudishpaca, mashna valina cashcallapitac catuchunlla.

28Maijanpish imata Mandac Dios ñucapac cachun chicanyachishcataca mana catui pudinchu. Shinallatac cullquita cushpapish mana chaihuan saquiri pudinchu. Chashnami gentetapish, animaltapish, allpatapish, ima charishcatapish mana catui pudin. Ñucapaclla chicanyachishcaca ñucapacmi can. 29Ñucaman cusha nishca runataca cullquita cushpa mana cacharichi pudinchu. Ashtahuanpish paica huañunatacmi can.

30Chagrapi pucushca granopish, yurapi pucushcapish chungamanta shucca Mandac Dios ñucapacmi. Chaica ñucapaclla chicanyachishcami can. 31Maijanpish chungamanta shucta mana cushpa saquichisha nishpaca, mashna valishca cada chungamanta ishcai cullqui yallihuanmi pagana can. 32Huagrapish, ovejapish chungamanta shucca Mandac Dios ñucapac taunahuan ricuchishpa yupashcaca ñucapacmi can. 33Chaicunataca alli cashcatapish, mana alli cashcatapish mana ricunachu. Allihuan, mana allihuan mana cambianachu. Chashna cambiacpica, ishcaitacmi Mandac Dios ñucapaclla saquiringa. Chai animaltaca pagashpapish mana saquichi pudinchu” ninmi ningui» nirca.

34Diosca tucui cai mandashcacunatami israelcunaman yachachichun, Sinaí urcupi Moisesman huillarca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index