Search form

LEVÍTICO 4

Juchamanta cuna ofrendamanta

1Mandac Diosca Moisestaca: 2«Israelcunataca: “Maijanpish mana yachashcamanta Mandac Dios ñuca ama ruhuanguichu nishpa mandashcacunamanta maijan shucta mana pactachishpa, juchallicca caitami ruhuana can:

3Aceitehuan cahuishca cura juchallishpa, tucui israelcunata juchayucta ruhuashpaca, ima mana tucushca becitami chai juchata pichachun Mandac Diosman cuna can. 4Chai becitaca Dios-huan tupana huasi yaicunapi Mandac Diospac ñaupapimi maquita becipac umapi churashpa huañuchinga. 5Aceitehuan cahuishca curallatacmi chai beci yahuarta japishpa, Dios-huan tupana huasiman apanga. 6Chai yahuarpi dedota satishpami, Diospaclla chicanyachishca ucuta jarcachishca pañopi canchis cutin Mandac Diospac ñaupapi chirapanga. 7Curallatacmi asha yahuarta japishpa, Dios-huan tupana huasi ucupi tiyac mishquilla ashnacuc incienso rupachina altar gachucunapi cahuinga. Puchushca yahuartaca Dios-huan tupana huasi yaicunapi tiyac tucui rupachina altar chaquipi tallinga. 8Juchata pichana becimantaca chunzhulli huiratapish, chaita tapashca huiratapish, 9ishcai riñontapish, chaita tapashca huiratapish, lomopi huiratapish rupachinami can. Chai riñoncunallahuantacmi yana shungupi huiratapish llucchinga. 10Dios-huan alli tucungapac huañuchishca becimanta llucchishca shinallatacmi curaca becimanta huirata llucchishpa, tucuita rupachina altar jahuapi rupachinga. 11Cutin beci caratapish, umatapish, chaquicunatapish, chunzhullitapish, huanutapish, 12carpa huasimanta carupi, uchupata shitana chuyanlla pambapimi yanta jahuapi churashpa rupachinga.

13Tandanacushca israelcuna mana yachashcamanta Mandac Dios ama ruhuachun nishcacunata ruhuashpaca, tucui gentecuna mana yachacpipish, juchayucmi tucun. 14Chai jucha yacharicpica, shuc becitami Dios-huan tupana huasi yaicunaman apamuna can. 15Chaitaca israelcunata pushac yuyaccunami chai becipac umapi maquita churashpa, Mandac Diospac ñaupapi huañuchinga. 16Chaimantaca aceitehuan cahuishca curami beci yahuarta ashata japishpa, Dios-huan tupana huasiman apanga. 17Chai yahuarpi dedota satishpami, canchis cutincaman Diospaclla ucuta jarcashca pañopi, Mandac Diospac ñaupapi chirapanga. 18Chai yahuarllatatacmi Dios-huan tupana huasipi cac Mandac Diospac ñaupapi tiyac altar gachucunapi chirapanga. Cutin puchutaca Dios-huan tupana huasi yaicunapi Diosman cushpa, tucui rupachina altar chaquipimi tallinga. 19Becimanta tucui huirata llucchishpami, altar jahuapi rupachinga. 20Juchamanta cushca becita shinallatacmi chai becitapish rupachinga. Chashna ruhuacpimi, Mandac Diosca paicunapac juchacunataca perdonanga. 21Chai quipaca punta becita rupachishca shinallatacmi carpa huasimanta canzhaman llucchishpa rupachinga. Chaica tandanacushca israelcunapac juchata pichachun cushca ofrendami canga.

22Israelcunata maijan pushac mana yachashcamanta Dios ama ruhuachun nishpa mandashcacunata ruhuashpaca juchayucmi tucun. 23Chashna juchallishcata yachac chayashpaca, ima mana tucushca chivotami cuna can. 24Chai chivopac umapi maquita churashpami, tucuita rupachina altar jahuapi, Mandac Diospac ñaupapi huañuchinga. Chaica juchamanta cushcami canga. 25Chai juchamanta cushpa huañuchishca yahuartaca curami maqui dedohuan apashpa, Diosman cushpa, tucuita rupachina altar gachucunapi cahuinga. Chai puchu yahuartaca chai altar chaquipimi tallinga. 26Curaca Dios-huan alli tucungapac huañuchishca animalpac huirata shinallatacmi juchamanta cushpa animal huiratapish altar jahuapi rupachinga. Chashna ruhuacpimi, juchacunataca Diosca perdonanga.

27Maijanpish mana yachashcamanta Mandac Dios ama ruhuachun nishpa mandashcacunata ruhuashpaca juchayucmi tucun. 28Chashna juchallishcata yachac chayashpaca, ima mana tucushca huarmi chivotami Diosman cuna can. 29Chai chivopac umapi maquita churashpami, tucuita rupachinallapitac huañuchinga. 30Chaimantaca curami chai yahuarpi dedota satishpa, Diosman cushpa rupachina altar gachucunapi cahuinga. Cutin puchushca yahuartaca chai altar chaquipimi tallinga. 31Dios-huan alli tucungapac cushca animalmanta llucchic shinallatacmi tucui chai animalpac huirata llucchinga. Chai huirataca curami Mandac Diosman mishquilla ashnachun, altar jahuapi rupachinga. Chashna rupachicpimi, Diosca juchacunata perdonanga.

32Maijanpish juchamanta cungapacca ima mana tucushca malta ovejatami cuna can. 33Chai ovejapac umapi maquita churashpami, tucuita rupachina altarpi huañuchinga. 34Curami chai animalpac yahuarpi dedota satishpa, Diosman cushpa rupachina altar gachucunapi cahuinga. Chai puchushca yahuartaca chai altar chaquipimi tallinga. 35Chaitapish Dios-huan alli tucungapac cushca animalmanta huirata llucchishca shinallatacmi curaca llucchishpa, rupachina altarpi rupachinga. Chashna rupachicpimi, Mandac Diosca juchataca perdonanga.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index