Search form

LEVÍTICO 6

1Mandac Dios Moisesta rimashpaca: 2«Maijanpish shuc runapac imata cuidacushpa, mana cashpaca mingai tucushpa charicushcata mana cutichishpa, shuhuashpaca Mandac Diospac ñaupapimi juchayuc tucun. 3Imata tarishpa, mana cutichishpapish, llullashpa ari nishpapish, maijan juchayuc runa shinallatacmi juchayuc tucun. 4Chaimanta imata mingashcatapish, mañashcatapish, mingai tucushcatapish, imata tarishcatapish, 5llullashpa ari nishpa mana cutichishcatapish cutichinami can. Chaicunataca juchata pichachun animalta Diosman cuna punzhapimi pichcahuan yallita cutichina can. 6Chai juchataca pichachunca, ima mana tucushca cari ovejatami Mandac Dios ñucaman cuna can. Curami chai oveja mashna valishcata ricushpa, juchata pichachun ñucaman cunga. 7Curami chai runapac juchata pichachun Mandac Dios ñucaman cushpa, ñucapac ñaupapi rupachinga. Chashnami chai juchaca perdonashca canga» nirca.

Animalcunata ima shina rupachinamanta

8Mandac Dios Moisesta rimashpaca: 9«Aaronmanpish, paipac churicunamanpish ima shina tucui rupachinata huillai. Tucuita rupachina animalca pacaringacamanmi tucui tuta altar jahuapi rupana can. Ninapish tucui tutami rupashpa, pacarina can. 10Chai quipami curaca lino churanata churarishpa, ucutaca calzoncillota churarina can. Chashnami tucui rupashca quipaca uchupata altar jahuamanta anchuchishpa, altar ladopi churanga. 11Chai quipaca churanata llucchishpa, shuctac churanata churarishpami, uchupataca carpa huasimanta caruman apashpa, chuyanlla pambapi shitanga. 12Ninaca altar jahuapica manatac huañunachu can. Cada tutamantami curaca yantata churashpa catinga. Chaimi tucuita rupachina animaltaca rupachinga. Chaipimi ñucahuan alli tucungapac cushca animal huiratapish rupachinga. 13Ninaca altar jahuapica mana huañushpami japiricungalla.

Grano ofrendata cunamanta

14Grano ofrendataca cashnami cuna can. Cai ofrendataca Aaronpac churicunami altar ñaupaman apashpa, Mandac Diospac ñaupapi cunga. 15Curami chai ofrendamanta asha harinata maquipi japishpa, aceitehuan, inciensohuan altar jahuapi churashpa, yuyarina cachun rupachinga. Chaimi Mandac Diosmanca mishquilla ashnanga. 16Chai puchuca Aaronmi paipac churicunandi micunga. Chaitaca levadura illactami Dios-huan tupana huasi canzha pambaman rishpa, Diospaclla chicanyachishca pushtupi micunga. 17Chaicunataca mana levadurahuan chapushpa cusanachu. Pandarishpa, juchallishcamanta Mandac Diosman cushcacunaca Diospaclla chicanyachishcami. Paicunallami chaicunataca micuna can. 18Shinallatac chaicunataca Aaronpac churicunami micuna can. Diosman cushpa rupachishcataca Aaronpac huahua huahuacuna huiñaita micuchun mandashcami. Shinallatac chaicunapi tuparicca Diospacllami tucunga» nirca.

Curacuna cuna grano ofrendamanta

19Mandac Dios Moisesta rimashpaca: 20«Aaronpish, paipac churicunapish paicunata aceitehuan cahuishca punzhapica, ishcai kilo alli harinatami chaupitaca tutamanta, chaupitaca chishita cuna can. Chaitaca huiñaitami cuna can. 21Chaitaca aceitehuanmi sartenpi cusashpa, chaupishpa cuna can. Chaimi Mandac Dios ñucamanca mishquilla ashnanga. 22Aaronpac randi aceitehuan cahuishca curami chai ofrendataca tucui rupachinga. Caitaca huiñai huiñaita ruhuachun mandashcami. 23Cura cushca ofrendataca tucuimi rupachina. Chaitaca mana micunachu» nirca.

24Mandac Dios Moisesta rimashpaca: 25«Aaronmanpish, paipac churicunamanpish juchata pichachun ima shina ofrendata cuna cashcata huillai. Tucuita rupachina altarllapitacmi juchata pichachun cushca ofrendatapish Mandac Dios ñucapac ñaupapi huañuchina can. Chaica Diospaclla chicanyachishcami. 26Chaitaca juchamanta Diosman cushpa, rupachic curallatacmi Dios-huan tupana huasi canzha pambapi, Diospaclla chicanyachishca pushtupi micunga. 27Imapish chaipi tuparicca Diospacllami tucunga. Shinallatac churanapi yahuar cahuiricpica, Diospaclla chicanyachishca pushtupimi tacshana can. 28Chai ofrenda aichata allpa mangapi yanushpaca, chai mangata paquinami can. Cutin bronce mangapi yanushca cashpaca, chai mangataca alli cacushpami jahuana can. 29Chai ofrendacunaca Diospaclla chicanyachishcami. Chaimantami chai aichataca tucui curacunalla micunga. 30Juchamanta Dios-huan tupana huasi ucupi tiyac altarman apashca yahuartaca mana micunachu. Chaitaca tucuimi rupachina can.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index