Search form

LEVÍTICO 7

1Pandarishcamantaca cashnami Diosmanca ofrendata cuna can. Chai ofrendaca Diospaclla chicanyachishcami.

2Tucui rupachina animalta huañuchinallapitacmi pandarishcamanta cushca animaltapish huañuchina can. Chai yahuartaca altar jahua muyundipimi chirapana can. 3Chai animalpac huiratapish, chupatapish, chunzhulli tapashca huiratapish, 4ishcai riñonta tapashca huiratapish, lomopi tiyac huiratapishmi, yana shungu tapashca huirahuan rupachinga. 5Chaitaca curami Mandac Diosman cushpa, altarpi rupachinga. Caimi pandarishcamanta Diosman cunaca. 6Chai ofrendaca Diospaclla chicanyachishcami. Chaimantami curacunalla Diospaclla chicanyachishca pushtupi micuna can.

7Juchamanta animalta cushpa rupachic shinallatacmi pandarishcamantapish ruhuana can. Chaicunata ruhuangapacca shuclla mandashcami tiyan. Chai ofrendataca rupachic curami japinga. 8Maijan rupachichun cushca animal carataca rupachic curami japinga. 9Grano ofrendaca hornopi cusashcapish, sartenpi, mana cashpaca callanapi cusashcapish rupachic curapacllatacmi canga. 10Grano ofrendataca aceitehuan chapushca cacpipish, mana cashpaca chaquishca cacpipish, Aaronpac churicunami pacta pacta japinga.

11Mandac Dios-huan alli tucungapacca cashnami ofrendata cuna: 12Mandac Diosta pagui nishpa, ofrendata cushpaca, aceitehuan masashca levadura illac tortatapish, aceitepi satishca levadura illac galletatapish harinahuan aceitehuan chapushpami cuna can. 13Diosta pagui ningapacpish, paihuan alli tucungapacpish levadurahuan ruhuashca tortahuanmi cuna can. 14Mandac Diosman cushca tucui ofrendacunamantami ashata chicanyachina can. Chaitaca Dios-huan alli tucungapac chirapac curami japinga. 15Dios-huan alli tucungapac cushca aichataca cayandi punzhapac mana puchuchishpami, chai cushca punzhallatac micuna can. 16Cushami nishcamanta, mana cashpaca quiquin munaimanta cushcatapish chai punzhami micuna can. Shina cacpipish, puchutaca cayandi punzhapish micunallami. 17Shina cashpapish, quimsa punzha tucucpica, rupachinami can. 18Dios-huan alli tucungapac cushca animal aichata quimsa punzhacaman huacaichishpa micucpica, pai cushcataca Diosca mana chasquingachu, mana yuyaringachu. Chai aichataca mana micunachu, chaita micucca juchayucmi tucun.

19Chai aicha tuparishcataca mana micushpa, tucui rupachinami can.

Diosman cushca aichataca mana mapayashcacunallami micuna can. 20Dios-huan alli tucungapac cushca ofrendaca Mandac Diospaclla chicanyachishcami. Chai aichata maijanpish mapayashca cashpapish micucca israelcunapuramanta anchuchishcami canga. 21Maijanpish mapa animalpi, mana cashpaca ima shuctac mapapi tuparishpa, mapayashca runa Mandac Dios-huan alli tucungapac cushca animal aichata micucca israelcunapuramanta anchuchishcami canga» nirca.

22Mandac Diosca Moisestaca:

23«Israelcunataca: “Huagra huiratapish, cari oveja huiratapish, chivo huiratapish ama micunguichicchu. 24Huañushca animalpac huirata, sacha animal polvoshca animal huirataca imapish shuctac ruhuangapacmi japina canguichic. Ashtahuanpish mana micunachu canguichic. 25Maijanpish Mandac Diosman cushca animalpac huirata micucca israelcunapuramanta anchuchishcami canga. 26Chaimanta cancuna maipi causashpapish volac animal yahuarta, sacha animal yahuartaca ama micunguichicchu. 27Maijanpish animal yahuarta micucca israelcunapuramanta anchuchishcami canga” ninmi ningui» nirca.

Curacuna japina micunamanta

28Mandac Diosca Moisestaca: 29«Israelcunataca: “Mandac Dios ñucahuan alli tucungapac animalta rupachishpa cungapacca Mandac Diospac ñaupamanmi apamuna can. 30Chaitaca quiquin maquihuanmi Mandac Diosman cushpa, rupachingapac apamunga. Chashnami cuyuchishpa cuchun pecho aichatapish, chaipi tiyac huiratapish Diospac ñaupaman apamunga. 31Chai huirataca curami altar jahuapi rupachinga. Cutin pecho aichataca Aaronpac churicunami japinga. 32Dios-huan alli tucungapac cushca animalpac alli lado changa aichataca curami japinga. 33Alli lado changa aichataca Dios-huan alli tucungapac animal huirata, yahuarta cuc curami japinga. 34Israelcuna ñucahuan alli tucungapac cushca animal pecho aichatapish, alzashpa cushca animalpac changa aichatapish ñucami chasquini. Chaitami Aaronmanpish, paipac churicunamanpish curcani. Cai mandashcacunaca israelcuna huiñaita pactachichun cushcami” ninmi ningui» nirca.

35Mandac Diosman cushpa, rupachishcataca caicunatami Aaronpish, paipac churicunapish japina can. Caitaca Mandac Diospac cura cangapac chicanyachishca punzhamanta pachami japina carca. 36Israelcuna Diosman cushca aichataca Mandac Diospac cura cachunmi, aceitehuan cahuishca punzhamanta pacha paicunaman cuchun mandarca. Paicunapac huahua huahuacunapish chashnallatac ruhuachunmi mandarca.

37Cai mandashcacunami Mandac Diosman animalta cushpa, tucui rupachina, grano ofrendata cuna, juchamanta animalta cushpa huañuchina, pandarishcamanta animalta cushpa huañuchina, Diospaclla chicanyachishca cangapac cuna, shinallatac Dios-huan alli tucungapac cushcacunata ima shina ruhuanacuna can. 38Tucui cai mandashcacunataca Sinaí urcupimi Mandac Diosca Moisesman huillarca. Israelcuna shitashca pambapi Diosman cuchunmi chashna mandarca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index