Search form

LEVÍTICO 9

Aarón Diosta servi callarishcamanta

1Pusac punzhapimi Moisesca Aarontapish, paipac churicunatapish, israelcunata pushac yuyaccunatapish 2cayashpami, Moisesca Aarontaca: «Juchata pichachun Diosman cungapacca shuc becita, tucuita rupachingapacca ima mana tucushca cari ovejata apamungui. Chaicunataca Diospac ñaupaman apamushpa cungui. 3Cutin israelcunataca: “Juchata pichachun Diosman cungapacca shuc cari chivota, tucui rupachingapacca shuc huatayuc becita, cari ovejata apamuichic. 4Dios-huan alli tucungapacca shuc huagrata, shuc cari ovejata apamushpa, paipac ñaupapi huañuchichic. Grano ofrendataca aceitehuan chapushpa apamuichic. Mandac Diosca cunanmi cancunamanca ricurigrin” ningui» nirca.

5Moisés mandashca shinami, Mandac Dios-huan tupana huasi ñaupaman apamurca. Tucui israelcuna Mandac Diospac ñaupapi tandanacushpa shayacucpimi, 6Moisesca: «Caita apamuchunca, Mandac Diosmi mandarca. Mandac Dios sumaimana achic nicucta ricurichunca chashnami ruhuana canguichic» nirca.

7Shinallatac Moisesca Aarontaca: «Mandac Dios mandashca shina altarman cuchuyai. Juchata pichachun Diosman cushcatapish, tucui rupachina animaltapish rupachi. Cambac juchacunatapish, israelcunapac juchacunatapish Dios perdonachu cui. Mandac Dios mandashca shina, israelcuna Diosman cushcatapish rupachi» nirca.

8Aaronca altarman cuchuyashpami, paipac juchacunamanta Diosman cushpa, becita huañuchirca. 9Aaronpac churicunaca chai yahuarta apashpa, dedota yahuarpi satishpami altar gachucunapi cahuirca. Cutin puchu yahuartaca altar chaquipimi tallirca. 10Mandac Dios Moisesta mandashca shinallatacmi juchata pichachun cushca animal huiratapish, riñoncunatapish, yana shungu huiratapish altarpi rupachirca. 11Ashtahuanpish aichataca carandimi carpa huasimanta caruman apashpa rupachirca.

12Aarón tucui rupachina animalta huañuchicpimi paipac churicunaca yahuartaca Aaronman curca. Paica altar muyundipimi chiraparca. 13Chai quipaca Aaronca chai huañushca animalta pitinacushpami umandi Diosman cushpa, tucuita altarpi rupachirca. 14Chunzhullitapish, changacunatapish jahuashpami, tucuita rupachina altarpi rupachirca.

15Chai quipaca Aaronca israelcuna cushca ofrendatapish curcami. Ñaupaman ruhuashca shinallatacmi israelcuna paicunapac juchacunamanta Mandac Diosman cushca chivota huañuchishpa curca. 16Ima shina Diosman cushpa tucui rupachina cashca shinallatacmi rupachirca. 17Chai quipaca tutamanta Diosman cushpa, tucuita rupachishca jahuami maqui junda grano ofrendata japishpa, altarpi rupachirca.

18Shinallatac israelcuna Dios-huan alli tucungapac apamushca huagratapish, cari ovejatapish huañuchishpami, Diosman curca. Chai yahuartaca paipac churicuna apamucpipimi, paica altar muyundipi chiraparca. 19Chashnami huagra huiratapish, cari oveja huiratapish, chupatapish, chunzhulli tapashca huiratapish, riñón huiratapish, yana shungu huiratapish curcami. 20Chaicunataca chai animalpac pecho aicha jahuapimi churarca. Shinami chai huiraca altarpi ruparca. 21Mandac Dios Moisesta mandashca shinallatacmi Aaronca chai pecho aichatapish, alli lado changatapish cuyuchishpa Diosman curca.

22Israelcuna paicunapac juchacunamanta Diosman cushcatapish, tucui rupachina animaltapish, Dios-huan alli tucungapac cushca animaltapish Diosman cushca quipami maquita alzashpa, israelcunata bendiciashpa, altar cuchumanta anchurirca. 23Chai quipaca Dios-huan tupana huasi ucumanmi Moisespish, Aaronpish yaicurca. Chaimanta llucshishpa, israelcunata bendiciacpimi, Mandac Diospac sumaimana achiclla ricurirca. 24Mandac Diospac ñaupamanta nina llucshimushpami, tucui rupachina animal aichatapish, altar jahuapi churashca huiratapish tucui rupachirca. Caita ricushpaca, tucui israelcunami cushicushpa, pambacaman cumurishpa, Mandac Diostaca allimari cangui nirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index