Search form

NÚMEROS 1

Sinaipi israelcunata yupashcamanta

1Israelcuna Egipto llactamanta llucshishca ishcai huata, ishcai quilla, punta punzhapimi Sinaí shitashca pambapi, paihuan tupana huasipi Mandac Diosca Moisestaca: 2«Tucui israelcuna mashna tiyashcata yachangapacca ailluta, huasi ucupurata catishpa, tucui caricunata yupai. 3Canca Aaronhuan ishcai tucushpa, ishcai chunga huatayucmanta huichaiman macanacuiman ripac caricunata yupai. 4Cada aillumanta huasi ucupurata cancunataca ayudanga. 5Chai ayudaccunaca:

Rubenpac aillumantaca Sedeurpac churi Elisur,

6Simeonpac aillumantaca Zurisadaipac churi Selumielmi canga.

7Judapac aillumantaca Aminadabpac churi Naasón,

8Isacarpac aillumantaca Zuarpac churi Natanaelmi canga.

9Zabulonpac aillumantaca Helonpac churi Eliab,

10Josepac ishcai churicunamantaca Efrainpac aillumanta Amihudpac churi Elisamami canga. Cutin Manasespac aillumantaca Pedasurpac churi Gamaliel,

11Benjaminpac aillumantaca Gedeonipac churi Abidanmi canga.

12Danpac aillumantaca Amisadaipac churi Ahiezer,

13Aserpac aillumantaca Ocranpac churi Paguielmi canga.

14Gadpac aillumantaca Reuelpac churi Eliasaf,

15Neftalipac aillumantaca Enanpac churi Ahirami canga» nirca.

16Chaicunami ñaupa taita Israelpac cada ailluta pushaccuna, huasi ucupurata, shinallatac soldadocunata pushachun nishcacunaca carca.

17Chaicunatami Moisesca Aaronhuan shuticunapi cayashpa yupashpa, 18ishcainiqui quilla punta punzhapi tucui israelcunata tandachirca. Chashnami ailluta, huasi ucupurata catishpa, ishcai chunga huatayucmanta huichaiman 19Mandac Dios nishca shinallatac yuparca. Chashnami Sinaí shitashca pambapi Moisesca israelcunata tandachishpa yuparca.

20Taita Israelmanta mirarishca punta churi Rubenpac ailluta, huasi ucupurata catishpaca, ishcai chunga huatayucmanta callarishpa, macanacuiman ripac caricunatami yuparca. 21Rubenpac aillumantaca chuscu chunga sucta huaranga pichca patsactami yuparca.

22Simeonpac ailluta, huasi ucupurata catishpa, ishcai chunga huatayucmanta callarishpa, macanacuiman ripac caricunataca 23pichca chunga iscun huaranga quimsa patsactami yuparca.

24Gadpac ailluta, huasi ucupurata catishpa, ishcai chunga huatayucmanta callarishpa, macanacuiman ripac caricunataca 25chuscu chunga pichca huaranga sucta patsac pichca chungatami yuparca.

26Judapac ailluta, huasi ucupurata catishpa, ishcai chunga huatayucmanta callarishpa, macanacuiman ripac caricunataca 27canchis chunga chuscu huaranga suctatami yuparca.

28Isacarpac ailluta, huasi ucupurata catishpa, ishcai chunga huatayucmanta callarishpa, macanacuiman ripac caricunataca 29pichca chunga chuscu huaranga chuscu patsactami yuparca.

30Zabulonpac ailluta, huasi ucupurata catishpa, ishcai chunga huatayucmanta callarishpa, macanacuiman ripac caricunataca 31pichca chunga canchis huaranga chuscu patsactami yuparca.

32Josepac churicunapuramantaca Efrainpac churimantaca huasi ucupurata catishpa, ishcai chunga huatayucmanta callarishpa, macanacuiman ripac caricunataca 33chuscu chunga huaranga pichca patsactami yuparca.

34Manasespac ailluta, huasi ucupurata catishpa, ishcai chunga huatamanta callarishpa, macanacuiman ripac caricunataca 35quimsa chunga ishcai huaranga ishcai patsactami yuparca.

36Benjaminpac ailluta, huasi ucupurata catishpa, ishcai chunga huatamanta callarishpa macanacuiman ripac caricunataca 37quimsa chunga pichca huaranga chuscu patsactami yuparca.

38Danpac ailluta, huasi ucupurata catishpa, ishcai chunga huatamanta callarishpa, macanacuiman ripac caricunataca 39sucta chunga ishcai huaranga canchis patsactami yuparca.

40Aserpac ailluta, huasi ucupurata catishpa, ishcai chunga huatamanta callarishpa, macanacuiman ripac caricunataca 41chuscu chunga shuc huaranga pichca patsactami yuparca.

42Neftalipac ailluta, huasi ucupurata catishpa, ishcai chunga huatamanta callarishpa, macanacuiman ripac caricunataca 43pichca chunga quimsa huaranga chuscu patsactami yuparca.

44Cai runacunatami Moises-huan, Aaronhuan shinallatac israelcunata pushac chunga ishcai runacunahuan yuparca. Chai pushaccunaca ñaupa israelcunapac miraimanta shuc shucmi carca. 45Chashnami tucui israelcunataca huasi ucupurata catishpa, ishcai chunga huatayucmanta callarishpa, macanacuiman ripac caricunata yuparca. 46Tucui yupashcaca sucta patsac quimsa huaranga pichca patsac pichca chungami carca.

Levitacuna imata ruhuana cashcamanta

47Ñaupa taita Levipac aillucunataca mana israelcunahuan tandachishpa yuparcachu. 48Mandac Diosca Moisestaca: 49«Levipac aillumantaca ama yupanguichu. Israelpac aillucunata yupacushpaca, ama paicunahuan tandachishpa yupanguichu. 50Chaipac randica mandashcacunata huacaichishca ñucahuan tupana ucutapish, tucui chaipi tiyaccunatapish ricuchun churangui. Paicunami ñucahuan tupana huasitapish, chaipi imalla tiyaccunandi apanga. Chashnami carpa huasipi servishpa, chai muyundipi causanga. 51Paicunami ñucahuan tupana huasita maiman apana cacpica pascanga. Maipi shayachina cacpica shayachinga. Chican gentecuna ñucahuan tupana huasiman chayashpaca huañungami. 52Tucui israelcunami paicunapac soldadocunahuan quiquin bandera ladopi, quiquin carpa huasipi causanga. 53Shina cacpipish, levitacunaca mandashcacunata huacaichishca ñucahuan tupana huasi muyundipimi causanga. Ñucahuan tupana huasita levitacuna cuidacucpimi, israelcunahuanca ñucaca mana piñarisha» nirca.

54Israelcunaca Mandac Dios Moisesta nishca shinallatacmi tucuita ruhuarca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index