Search form

NÚMEROS 10

Cullqui trompetamanta

1Mandac Dios Moisesta rimashpaca: 2«Martillohuan huactashpa cullquimanta ishcai trompetata ruhuai. Chaicunaca israelcunata tandachingapac, shinallatac carpa huasicunata shucman apana cashcata huillangapacmi canga. 3Ishcai trompetacuna tocashca uyaricpica, tucui israelcunami ñucahuan tupana huasi yaicunapi canhuan tandanacunga. 4Shuc trompetalla tocashca uyaricpica, Israel aillucunata mandaccunallami canhuanca tandanacunga. 5Cungailla sinchita tocashca uyaricpica, inti llucshina ladopi causac israelcunami puri callaringa. 6Ishcai cutin tocashca sinchita uyaricpica, ura ladopi causac israelcunami puri callaringa. Chashnami puri callarichunca tocanga. 7Ashtahuanpish tucui israelcunata tandachingapacca shuctaclayami tocashca uyaringa. 8Trompetapica Aaronpac churi curacunami tocanga. Cai mandashcacunaca cancunapac huahua huahuacunapish tucui causaipi pactachichun mandashcami.

9Cancunapac allpapi causacushpa, cancunata piñaccunahuan macanacungapac llucshingapacca, macanacuiman llucshina tonota tocanguichic. Chashna ruhuacpimi, ñucaca cancunata yuyarishpa, piñaccunapac maquimanta quishpichisha. 10Cushicuna punzhacunapipish, quilla callari punzhacunapipish, imata yuyarina punzhacunapipish ñucahuan alli tucungapac animalcunata huañuchishpa, ofrendata tucui rupachishpaca trompetacunapi tocanguichic. Shina ruhuacpimi, Mandac Dios ñucaca cancunata yuyarisha. Ñucami cancunata Mandac Dios cani» nirca.

Sinaí urcumanta israelcuna llucshishcamanta

11Egiptomanta israelcuna llucshishca ishcai huata, ishcai quilla, ishcai chunga punzhapimi puyuca ari nishca quillcata huacaichina Arca tiyacuc Dios-huan tupana huasi jahuamanta anchurirca. 12Mandashca shinami, israelcunaca Sinaí shitashca pambamantaca shitashca pamba Paranman rirca. Chai puyuca chai pambapimi shayarirca. 13Israelcunaca Mandac Dios Moisesta mandashca shinami, punta puri callarirca. 14Ñaupataca Judá aillupac soldadocunami banderahuan llucshirca. Paicunataca Aminadabpac churi Naasonmi mandacurca. 15Isacar aillupac soldadocunataca Zuarpac churi Natanaelmi mandacurca. 16Zabulón aillupac soldadocunataca Helonpac churi Eliabmi mandacurca.

17Chai quipaca Gersonpac, Meraripac churicunami Dios-huan tupana huasi pascashcataca apashpa rirca.

18Paicunapac huashataca Rubén aillupac soldadocunami banderahuan rirca. Paicunataca Sedeurpac churi Elisurmi mandacurca. 19Simeón aillupac soldadocunataca Zurisadaipac churi Selumielmi mandacurca. 20Gad aillupac soldadocunataca Deuelpac churi Eliasafmi mandacurca. 21Paicunapac huashataca Coatpac churicunami Dios-huan tupana huasi ucupi imalla tiyashcacunata apashpa rirca. Paicuna chayangacamanca ñami Dios-huan tupana huasitaca shayachishca carca.

22Chai quipataca Efraín aillupac soldadocunami banderahuan rirca. Paicunataca Amihudpac churi Elisamami mandacurca. 23Manasés aillupac soldadocunataca Pedasurpac churi Gamalielmi mandacurca. 24Benjamín aillupac soldadocunataca Gedeonipac churi Abidanmi mandacurca.

25Quipataca Dan aillupac soldadocunami banderahuan cuidashpa rirca. Paicunataca Amisadaipac churi Ahiezermi mandacurca. 26Aser aillupac soldadocunataca Ocranpac churi Paguielmi mandacurca. 27Neftalí aillupac soldadocunataca Enanpac churi Ahirami mandacurca.

28Chashnami Israel soldadocunaca paicuna causacushcamanta shuctac ladoman rina tucucpica, catinacushpa sumacta rirca.

Moisés paipac cuñado Hobabta pushashcamanta

29Moisespac suegroca Madianmanta Reuelmi carca. Paipac churi Hobabtami Moisesca:

—Ñucanchicca Mandac Dios cusha nishca llactamanmi ricunchic. Canpish ñucanchic-huan jacu. Mandac Dios ñucanchic-huan allimi casha nishca shinallatacmi canhuanpish alli cashun— nirca.

30Shina nicpimi Hobabca:

—Mana, ñucaca mana rishachu. Ñucaca, ñuca aillupacman, ñuca llactamanmi cutisha— nirca.

31Shina nicpimi Moisesca:

—Ama shitashpa richu. Cai shitashca pambapi maipi carpacunata shayachinataca canmi yachangui. Maita rinatapish canmi ricsingui. 32Ñucanchic-huan ricpica, Mandac Dios tucui allicunata ñucanchicman cushcatami canmanpish cushun— nirca.

33Mandac Diospac urcumanta israelcuna rishpaca, quimsa punzhatami purirca. Mandac Dios-huan ari nishca quillcata huacaichina Arcahuanca ñaupashpami quimsa punzhata maipi samarinata mashcashpa purirca. 34Israelcuna puri callaricpica, Mandac Diospac puyumi punzhanta jahuata rirca. 35Arcata apashpa, puri callaricpica Moisesca:

«¡Mandac Dioslla jatariyari!

Canta mana ricunayachiccunata

caita chaita cachaiyari.

Canta piñaccunataca cambac ñaupamanta

callpachiyari» nircami.

36Arcata shayachicpica:

«¡Mandac Dioslla,

cai huaranga huaranga israelcunata

tigrarishpa ricuiyari!» nircami.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index