Search form

NÚMEROS 11

Mandac Dios israelcunaman aichata carashcamanta

1Shuc punzhami israelcunaca yarcaihuan cashpa, Mandac Diosta rimarirca. Chaita uyashpami Mandac Diosca nina japiric shina piñarishpa, israelcuna causana carpa huasi muyundita rupachirca. 2Chaimantami israelcunaca Moisesta caparishpa mañarca. Shina mañacpi, Moisés paicunamanta Mandac Diosta mañacpica, ninaca huañurcami. 3Carpa huasicunata Mandac Dios rupachishcamantami chai pambataca Taberata shutichirca.

4Israelcunahuanca micunallata munac tucuilaya gentecunami chapurishca carca. Chai gentecunapac yuyaita japishpami israelcunaca: «¿Pitac aichata cungayari? 5Egiptopica challuatapish yangami micuc carcanchic. Pepinocunatapish, meloncunatapish, puerros nishcacunatapish, cebollatapish, ajostapish ñucanchic munashcatami micuc carcanchic. 6¡Cunanca yarcaihuan huañucunchicmi! ¡Caipica maná shuti micunallami tiyan! ¡Shuctac micunaca mana ricurinchu!» nishpa huacarca.

7Maná shuti granoca culantro muyu shinami carca. Chaica bedelio shina quillumi carca. 8Israelcunaca chai manatac japingapac llucshishpaca cutashpa, mana cashpaca tacashpami yanuccuna, mana cashpaca tandata ruhuashpa cusashpa micuccuna carca. Chai micunaca mushuc aceite shina mishquimi carca. 9Tuta garuashpa pacaricpica, maná shuti tandaca israelcunapac carpa huasi jahuapimi urmashpa pacaric carca.

10Moisesca israelcuna familiandi quiquin carpa huasi pungu pambacunapi huacacuctami uyarca. Mandac Dios chaita uyashpaca, nina japiric shinami piñarirca. Shinallatac Moisespish llaquirishpami, 11Mandac Diostaca:

—Canta servic ñucataca, ¿ima nishpatac cashna llaquichinguiyari? Cai israelcunahuanca llaquita apangapacca, ¿ima mana allitatac cambac ñaupapi ruhuashcaniyari? 12Ñaupa taitacunaman cusha nishca llactaman chayangacamanmi chuchucuc huahuacunata shina apachun ningui. Ñucaca paicunapacca, ¿taita mamachu cani? 13Paicunaca: “Ñucanchicman aichata caraiyari” nishpami huacashpa, mañangapac shamuncuna. Cai tucui israelcunaman carangapacca, ¿maipitac achca aichataca tarishayari? 14Cai tucui gentecunata ñucalla pushanaca achca sinchimi. Ñucalla pushanataca mana pudinichu. 15Ñuca cashna llaquita apana cacpica, ñuca causaita quichuchunmi mañani. Cambac ñaupapi ñuca alli ricurishca cacpica, chaita ruhuailla. Cashna llaquitaca mana ashtahuan apasha ninichu— nirca.

16Shina nicpimi, Mandac Diosca Moisestaca:

—Israelcunata pushac yuyacpuramanta canchis chunga runacunata acllai. Paicunaca israelcunata pushac yuyaccunami cana can. Paicunata ñucahuan tupana huasi yaicunaman pushashpa, chaipi shuyangui. 17Chaipimi ñuca jahuamanta shamushpa, canhuan parlasha. Canpi tiyac Espiritutami paicunaman cusha. Chashna ruhuacpimi, paicunapish canta ayudashpa, cai israelcunataca pushanga. Chaipica ña mana canllachu pushac cangui. 18Israelcunataca: “Cayapac Diospaclla tucuichic. Cayaca aichatami micunguichic. Cancunaca: ‘Egiptopica allimi causarcanchic. Caipica, ¿pitac aichata carangayari?’ nishpami, Mandac Dios uyacta huacacurcanguichic. Chaimantami Mandac Diosca cancunaman aichata caragrin. 19Aichataca mana shuc punzhallata, mana ishcai punzhallata, mana pichca punzhallata, chunga punzhallata ishcai chunga punzhallatachu micugringuichic. 20Ashtahuanpish quilla jundatami amirishpa millanayachingacaman micugringuichic. Cancunapac chaupipi causac Mandac Diosta mana valichishpami cancunaca: ‘¿Imamantatac Egiptomanta llucshimurcanchic?’ nishpa Mandac Diospac ñaupapi huacarcanguichic. Chaimantami cashna micugringuichic” ningui— nirca.

21Shina nicpimi Moisesca:

—Ñucahuan chaquillahuan shamuc israelcunaca sucta patsac huarangami. ¿Chai tucui cashca jahuachu canca quillacamanmi aichata caragringui? 22Paicunaman carangapacca, ¿maipitac huañuchishca achca ovejacuna, vacacuna tiyanyari? Mama cuchapi tiyac tucui challuacunata apamushpa caracpipish, ¿maitatac pactangayari?— nirca.

23Shina nicpimi, Mandac Diosca Moisestaca:

—Ñuca imatapish ruhuaipaclla cashcata, ¿manachu yachangui? Ñuca rimashca pactana cashcata, mana pactana cashcataca cunanmi ricungui— nirca.

24Moisés ña llucshishpaca, Mandac Dios imata nishcatami israelcunamanca huillarca. Chai quipaca israelcunata pushac yuyaccunamanta canchis chunga runacunatami Dios-huan tupana huasi muyundipi churarca. 25Chaipimi Mandac Diosca puyupi urai shamushpa, Moises-huan parlanacushpa, paipi tiyac Espirituta canchis chunga pushac yuyaccunapi churarca. Shina churacpica, Diosmanta huillarcami. Shina cashpapish mana ashtahuan huillashpa catircachu.

26Canchis chunga acllashca pushac yuyacmantaca Eldad, Medadmi paicuna carpa huasicunallapitac saquirishca carca. Paicunapacmanpish Diospac Espíritu shamurcami. Paicunaca quillcashcapurapi cashpapish Dios-huan tupana huasimanca mana rircachu. Carpa huasillapimi Diosmanta huillai callarirca. 27Chashna huillacucta shuc moso uyashpami, Moisespacman callpa rishpaca:

—Eldadpish, Medadpish Diosmanta huillaccuna shinami, carpa huasicunapi huillacun— nirca.

28Shina nicpimi, huambramanta pacha Moisesta ayudac Nunpac churi Josueca:

—Ñuca amo Moiseslla, chashna huillaccunata jarcaiyari— nirca.

29Shina nicpimi Moisesca:

—Ama ñucata llaquichichu. Tucui gentecuna Diosmanta huillaccuna cashpaca allimi canman. Paicunapi Mandac Dios paipac Espirituta churashca cacpica, allimi canga— nirca.

30Chai quipaca Moisespish, israelcunata pushac yuyaccunapish paicuna causana carpa huasiman cutircami.

31Shina cacpica, Mandac Dios cachashca huaira shamushpami mama cuchamanta codornizcunata israelcuna causana carpa huasicuna tiyac ñaupaman apamurca. Codornizcunaca tucui carpa huasicuna muyunditami shuc punzha purina shina carucaman, altomanca shuc metro shina altocaman jundarirca. 32Israelcunaca chai tucui punzha, tucui tuta, cayandi punzhapish codornizcunata tandarca. Ashallata japin nishcami chunga montón codornizta tandarca. Chashna japishpaca, carpa huasicuna muyunditami codorniz aichataca tendirca. 33Paicuna aichata manarac cashtucpimi, Mandac Diosca tucui gentecunahuan nina japiric shina piñarishpa, tucuita huañuchi callarirca. 34Micuna yuyaillahuan causac gentecuna huañucpi, chai pambapi enterrashcamantami chai pambataca Kibrot-hataavahta shutichirca.

35Israelcunaca Kibrot-hataavah pushtumanta rishpaca, Hazerotman chayashpami, chaipi saquirirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index