Search form

NÚMEROS 12

Mariapish, Aaronpish Moisesta rimarishcamanta

1Moisés Cus llactata huarmihuan cazarashcamantami Mariapish, Aaronpish juchanchishpa rimarirca. 2Paicunaca: «¿Mandac Diosca Moisesllahuanchu rimarca? ¿Manachu ñucanchic-huanpish rimarca?» nirca.

Chaitaca Mandac Diosca uyarcami. 3Moisesca tucui cai pachapi causac runacunamanta yalli humildemi carca. 4Mandac Diosca Moisestapish, Aarontapish, Mariatapish rimashpaca: «Ñucahuan tupana huasiman quimsata shamuichic» nirca.

Shina nicpica, paicunaca rircami. 5Paicuna chaipi cacpimi, Mandac Diosca suniclla puyupi shamushpa, paihuan tupana huasi yaicunapi shayarishpa, Aarontapish, Mariatapish cayarca. Chaipi ishcaita cuchuyacpimi, 6Mandac Diosca: «Cunanca, ñuca rimashcata uyaichic. Cancunapuramanta maijan shuc ñucamanta huillac tiyacpica, muscuipi shina ricurishpami parlasha. 7Shina cacpipish, ñucata servic Moises-huanca mana chashnachu parlani. Paica ñuca huasipi allita servicmi. 8Chaimantami paihuanca ñahui ñahui entendinallata rimani. Mana muscuipi shina ricurishpachu rimani. Paica ñucataca ñahui ñahuimi ricsin. Ñucata servic Moisesta juchanchishpa rimanataca, ¿ima nishpatac mana manchanguichic?» nirca.

9Chashna nishpami Mandac Diosca paicunahuan nina japiric shina piñarishpa, chaimanta rirca. 10Mandac Dios-huan tupana huasi jahuamanta puyu anchuricpica, Mariaca tucui cuerpomi leprahuan rasu shina yuracyashca saquirirca. Aarón tigrarishpa ricucpica, Mariaca leprahuanmi cashca carca. 11Chaita ricushpami, Aaronca Moisestaca: «¡Ñucata mandaclla! Ñucanchicca imata mana yachac shinami cantaca juchanchishpa rimashpa juchallishcanchic. Cai juchamantaca ñucanchictaca ama llaquichichu. 12Mariataca ama huañushca huacharishca shina, chaupi cuerpo ismushcata ruhuaichu» nirca.

13Shina nicpimi Moisesca: «¡Mandac Dioslla, Mariataca cunanllatac allichiyari!» nishpa caparishpa mañarca.

14Shina mañacpimi, Mandac Diosca Moisestaca: «Paipac taita ñahuipi tocacpica, ¿manachu canchis punzhacaman pingaihuan canga? Chaimanta canchis punzhacaman carpa huasicunamanta llucshishpa cachai. Chai quipami israelcunahuan cutin tandanacunga» nirca.

15Shina nicpimi, Mariataca canchis punzhacaman carpa huasicunamanta llucchishpa cacharca. María paicunahuan tandanacungacamanmi israelcunaca maiman mana rirca. 16María cutimucpimi, israelcunaca Hazerot llactamanta rishpa, Parán shitashca pambapi carpacunata shayachishpa tiyarirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index