Search form

NÚMEROS 13

Canaán llactata ricuchun cachashcamanta

(Dt 1.19-33)

1Mandac Dios Moisesta rimashpaca: 2«Israelcunaman cugricushca Canaán llactata ricuchun cambac runacunata cachai. Ñaupa taita Israelpac cada aillumanta shuc pushacta cachai» nirca.

3Moisesca Mandac Dios mandashca shinami Parán shitashca pambamanta cada Israelpac aillucunamanta shuc pushacta cacharca. 4Ricungapac riccunaca: Rubenpac aillumantaca Zacurpac churi Samuami rirca. 5Simeonpac aillumantaca Horipac churi Safatmi rirca. 6Judapac aillumantaca Jefonepac churi Calebmi rirca. 7Isacarpac aillumantaca Josepac churi Igalmi rirca. 8Efrainpac aillumantaca Nunpac churi Oseasmi rirca. 9Benjaminpac aillumantaca Rafupac churi Paltimi rirca 10Zabulonpac aillumantaca Sodipac churi Gadielmi rirca. 11Josepac churi Manasespac aillumantaca Susipac churi Gadimi rirca. 12Danpac aillumantaca Gemalipac churi Amielmi rirca. 13Aserpac aillumantaca Micaelpac churi Seturmi rirca. 14Neftalipac aillumantaca Vapsipac churi Nahbimi rirca. 15Gadpac aillumantaca Maquipac churi Geuelmi rirca.

16Chaicunami Moisés llactata ricuchun cachashca runacunapac shuticunaca carca. Moisesca Nunpac churi Oseastaca Josuetami shutichirca. 17Moisés Canaán llactata ricuchun cachacushpaca:

«Caimantaca Neguevman huichai rishpa, urcuman ringuichic. 18Chaiman chayashpaca, imalaya llacta, imalaya gentecuna cashcata, sinchi cashcata, mana sinchi cashcata, achca cashcata, ashalla cashcata, 19paicuna causacushca llactaca alli cashcata, mana alli cashcata, paicuna causacushca llactaca carpa huasicuna cashcata, mana cashpaca muyundita pircashca cashcata, 20chai allpaca grano pucuc cashcata, mana cashpaca mana pucuc cashcata, yuracuna tiyashcata, mana tiyac cashcata ricunguichic. Chai llactapi pucushcata mana manchashpa apamunguichiclla» nirca.

Chai punzhacunaca punta pucushca uvasta pallana punzhacunami carca. 21Paicuna huichai rishpaca, Zin shitashca pambamanta Rehob llactacaman chayashpami Hamat llacta yaicunacaman chayarca. 22Neguevta huichai rishpaca, Anacpac huahua huahua Ahimán, Sesai, Talmai causana Hebronmanmi chayarca. Hebronca Egiptopi cac Zoán llacta manarac tiyacpi, canchis huata ñaupaman ñami tiyashca. 23Chaimantaca Escol yacu huaicu pambacamanmi chayarca. Chaimantami ramandi uvasta pitishpa, shuc caspipi huandushpa apamurca. Shinallatac granadacunatapish, higocunatapish apamurcami. 24Chai yacu pambataca israelcuna uvasta pitimushcamantami Escol nishpa shutichirca.

25Chuscu chunga punzhapimi Canaán llactata ricungapac riccunaca cutimurca. 26Shina cutimushpaca, Paranpi cac Cades shitashca pambapi Moisespish, Aaronpish, tucui israelcunapish cacpimi chayamurca. Chaipimi paicunamanpish, tucui israelcunamanpish ima shina cashcata tucui huillarca. Shinallatac chai llactapi pucushcacunatapish ricuchishpami, 27paicunaca: «Can ricumuchun cachashca llactataca ricumunchicmi. Chai llactapica lechepish, mishquipish yacu shina callpacucmi cashca. Riqui, cai granocunatami chaimanta apamunchic. 28Shina cacpipish, chai llactapi causaccunaca sinchi runacunami. Chai llacta huasicunapish jatun huasicunami, muyundita pircashcami can. Anacpac huahua huahuacunami chaipica causac cashca. 29Neguevpica amalecitacunami causan. Cutin urcucunapica heteocuna, jebuseocuna, amorreocunami causan. Mama cucha pambacunapi, Jordán yacu muyundi pambacunapica cananeocunami causan» nirca.

30Shina nicpimi, Calebca Moisespac ñaupapi tucui israelcunata upallachishpa:

—¡Cunanca, chai llactata quichungapac jacuchic! ¡Ñucanchicmi chai llactapi causaccunata atishpa sinchicuna canchic!— nirca.

31Shina nicpipish, paihuan riccunaca:

—¡Ñucanchicca chai gentecunataca mana ati pudishunchu! ¡Paicunaca ñucanchicta yalli sinchicunami!— nirca.

32Chai runacunaca chai llactata mana alli nishpami israelcunataca:

—Ñucanchic ricungapac rishca llactaca yarcaihuan huañuna allpami cashca. Chaipi causaccunapish yalli jatun gentecunami. 33Chashnallatac Anacpac manchana jatun churicunatapish ricurcanchicmi. Paicunaca yalli jatuncunami. Paicunahuan chimbapuracpica, ñucanchicca shuc curu shinallami carcanchic. Paicunapish ñucanchictaca chashnallatacmi ricurca— nirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index