Search form

NÚMEROS 14

Israelcuna Mandac Dios-huan piñarishcamanta

1Chai tutaca tucui israelcunami tandanacushpa caparishpa huacarca. 2Israelcuna Moisestapish, Aarontapish rimashpaca: «¡Egipto llactallapitac huañushca cashpachari alli canchicman carca! ¡Mana cashpaca cai shitashca pambapi huañushpachari alli canchicman! 3Mandac Diosca, ¿imamantatac ñucanchic huarmicuna, huahuacuna espadahuan piñaccunapac maquipi huañuchishca cachun cai llactamanca apamurca? ¿Manachu Egipto llactallamantac cutina alli canman?» nirca. 4Shina nishpami caishuc chaishuc: «¡Shuc pushacta mashcashpa, Egiptollamantac cutishunchic!» nirca.

5Shina cacpica, Moisespish, Aaronpish tandanacushca israelcunapac ñaupapimi pambacaman cumurirca. 6Chaipica chai llactata ricungapac ricpuramanta Nunpac churi Josuepish, Jefonepac churi Calebpish llaquirishpami churanata lliquirishpa, 7tandanacushca israelcunataca:

—Ñucanchic ricungapac rishca allpaca mai alli llactami. 8Mandac Dios ñucanchicman chai allpata cusha nishpaca paillatac cungallami. Chai llactaca lechepish, mishquipish yacu shina callpacuc llactami. 9Chaimanta Mandac Diosta ama piñachichicchu. Chai llactapi causaccunatapish mana manchanachu canchic. Ñucanchicca paicunataca tandata micuc shinami tucuchishun. Paicunata llaquishpa ayudacpish, mana tiyanchu. Cutin ñucanchicca Mandac Diostami charinchic. ¡Chaimanta ama manchaichicchu!— nirca.

10Ashtahuanpish israelcunaca rumihuan shitanatami munarca. Chaimantami Dios-huan tupana huasipi pai sumaimana achiclla cashcaca tucui israelcunaman ricurirca. 11Chaipimi Mandac Diosca Moisestaca:

—¿Maicamantac cai gentecunaca piñachishpa catigrin? Paicunapac ñaupallapitac ricuchinacunata ruhuashpa ricuchicucpipish, ¿manachu crincuna? 12Huañuchic ungüita cachashpami tucuchisha. Shina cashpapish canmantaca paicunata yalli ashtahuan sinchi, shinallatac achca gentecunatami ruhuasha— nirca.

13Shina nicpipish, Moisesca Mandac Diostaca:

—Mandac Dioslla, canca imatapish ruhuaclla cashcata ricuchishpami, Egiptopi causaccunapac chaupimanta israelcunataca llucchimurcangui. Cashna llaqui tucushcata Egipto llactapi causaccuna yachashpaca, 14Canaán llactapi causaccunaman huillangami. Chai llactapi causaccunaca can Mandac Dios pushacushcata, paicuna canta ñahui ñahui ricucushcatapish, punzhaca puyupi, tutaca ninahuan achicyachishpa pushacushcatami yachancuna. 15Shina cashpapish, shuc runata huañuchic shina, cai tucui gentecunata can huañuchicpica, can imatapish ruhuaclla cashcata yachac gentecunaca: 16“Mandac Diosca, pai cungapac ari nishca llactaman mana yaicuchi pudishpami, shitashca pambapi huañuchishca” ningami. 17Mandac Dioslla, can nishca shinallatac cunanca can imatapish ruhuaclla cashcata ricuchiyari. Canca: 18“Mana utca piñaric, yallita cuyacmi cani. Millaita ruhuaccunatapish, mana cazuccunapish perdonac, shina cashpapish mana allita ruhuashcataca mana saquishpa llaquichicmi cani. Taitacuna millaita ruhuashcamantaca huahuacunatami quimsaniqui, chuscuniqui miraicaman llaquichic cani” nishcanguimi. 19Egipto llactamanta llucshishpa, caiman chayamuncaman perdonac shinallatac cunanpish paicuna mana allita ruhuashcataca cambac jatun cuyaimanta perdonaiyari— nirca.

Mandac Dios israelcunata llaquichishcamanta

(Dt 1.34-40)

20Shina nicpimi, Mandac Diosca:

—Can mañashca shinami paicunataca perdonani. 21Ñuca shutipimi nini. Ñuca causacushca shinallatacmi ñucapac sumaimana achicca cai pachapipish jundami can. 22Ñuca poderhuan ricuchishcacunata ricuccunapish, Egipto llactapi, cai shitashca pambapi ruhuashcata ricuccunapish, ñuca nishcata mana cazushpa, chunga cutincaman pandachisha niccunapish 23ñaupa taitacunaman ñuca cushami nishca allpataca pi mana ricungacunachu. Ñucata yangapi churaccunaca mana ricungachu. 24Shina cacpipish, ñucata servic Calebca shuctac yuyaiyuc cashpami ñuca nishcata uyashpa, ñucata catishpa, risha nirca. Chaimantami paitaca ricumushca llactamanca yaicuchisha. Chashnallatac paipac huahua huahuacunami chai allpataca japinga. 25Cunanca amalecitacuna, cananeocunami cancunapac chimbapura pambapica causan. Cayaca cutishpa, shitashca pambata rishpa, Puca Cuchaman ringuichic— nirca.

26Mandac Dios Moisestapish, Aarontapish rimashpaca:

27—¿Maicamantac cai millai israelcuna rimashcata uyacushalla? Ñucata israelcuna rimashcataca ñami uyarcani. 28Chaimanta paicunataca: “Mandac Dios ñucaca: ‘Ñuca shutipimi nini: Israelcuna rimashcata ñuca ringri uyashca shinami paicunataca ruhuagrini. 29Cancunapuramanta ishcai chunga huatayucmanta huichaiman yupashpa quillcashca cai shitashca pambapimi ñucata piñachishcamantaca huañuchigrini. Cai pambapimi paicunapac cuerpoca shitashca saquiringa. 30Cancunaman ñuca maquita alzashpa cushami nishca allpapi causangapacca mana yaicunguichicchu. Shina cacpipish, Jefonepac churi Caleb, shinallatac Nunpac churi Josuellami yaicunga. 31Ashtahuanpish cancunapac huahuacunami, cancuna mana nishca allpataca japinga. Cancunaca: Ñucanchic huahuacunataca ñucanchicta piñaccunami japishpa aparinga nircanguichicmi. Shina cacpipish, paicunami chai llactataca japinga. 32Cancunapac cuerpoca cai shitashca pambapimi shitashca saquiringa. 33Cancunapac huahuacunaca chuscu chunga huatatami cai shitashca pambapica michishpa puringa. Paicunami cancuna millaita ruhuashcamantaca cai shitashca pambapi cancuna huañushpa tucuringacaman llaquita apanga. 34Chuscu chunga punzhapimi Canaán llactata ricushpa purinaca tucurirca. Chai shinallatacmi chuscu chunga punzhata llaquita apanguichic. Cancuna mana allita ruhuashcamantaca cada punzhamanta shuc huatatami llaquita apanguichic. Chaipimi ñucata mana cazuna ima shina cashcataca yachanguichic. 35Mandac Dios ñucami caitaca nini. Cai gentecuna ñucata mana cazushcamantaca chashnatacmi ruhuasha. Cai shitashca pambapimi huañushpa tucuringacuna’ ninmi” nigri— nirca.

36Moisés llactata ricumuchun cachashca runacuna cutishpa, chai llactata mana valichishpa, israelcunaman huillashpa, paita rimachishcamantami 37Mandac Diosca chai runacunataca huañuchic ungüihuan huañuchirca. 38Ashtahuanpish chai llactata ricungapac riccunapuramanta Nunpac churi Josué, shinallatac Jefonepac churi Calebca mana huañurcachu.

Hormapi israelcunata atishpa macashcamanta

(Dt 1.41-46)

39Tucui caicunata Moisés huillacpimi, israelcunaca yallita llaquirirca. 40Chai quipa tutamanta utca jatarishpa, urcu lomaman rishpaca:

—Ñucanchicca juchallishcanchictacmi, cunanca Mandac Dios cusha nishca llactaman ringapacca caipimi canchic— nirca.

41Shina nicpimi Moisesca:

—¿Ima nishpatac Mandac Dios nishcataca mana cazunguichic? Mana chaiman chayai pudinguichicchu. 42Mandac Diosca mana cancunahuanchu, ama richicchu. Chaiman rishpaca, piñaccunapac ñaupapi huañunguichicmi. 43Chaipica amalecitacuna, cananeocunami espadahuan huañuchingapac chapacun. Mandac Diosta catinata saquishcanguichicmi. Chaimantami Mandac Diosca cancunahuanca mana can— nirca.

44Shina nicpipish, mana cazushpami israelcunaca urcu jahuaman rirca. Chashna paicuna ricpipish, Mandac Dios-huan ari nishca quillcata huacaichina Arcatapish mana anchuchircachu. Moisespish carpa huasicuna chaupimantaca mana anchurircachu. 45Chashna ricpica, chai urcupi causac amalecitacunami cananeocunahuan shamushpa macashpa chugrichishpa, Hormacaman catirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index