Search form

NÚMEROS 15

Diosman ofrendata cunamanta

1Mandac Diosca Moisestaca: 2«Israelcunataca: “Ñuca cusha nishca llactapi causangapac yaicushpa, 3ñucaman mishquilla ashnachun vacatapish, ovejatapish cushpa, tucuita rupachishpa, mana cashpaca cushami nishcamanta cushpa, mana cashpaca quiquin munaimanta cushpa, mana cashpaca fiesta punzhapi cushpaca, 4ishcai kilo alli harinahuan litro aceitehuan chapushpami apamuna can. 5Ñucaman cushpa huañuchishca jahua, tucui rupachishca jahuami cada shuc ovejahuan cungapac shuc litro vinota cuna can.

6Cari ovejata ñucaman cushpa rupachingapacca chuscu kilo alli harinahuan shuc litro yalli aceitehuan chapushpa cunguichic. 7Ñucaman cushca mishquilla ashnachunca shuc litro yalli vinota cunguichic.

8Maijanpish ñucaman cushpa rupachingapac, mana cashpaca ñucahuan alli tucungapac rupachingapac, cushami nishcamanta rupachingapacca shuc becita, 9sucta kilo alli harinahuan, ishcai litro aceitehuan chapushpa cunguichic. 10Ñucaman mishquilla ashnachun rupachingapacca ishcai litro vinota cunguichic. 11Chashnami cada becihuan, mana cashpaca cari ovejahuan mana cashpaca shuc huatayuc ovejahuan, cari chivohuanca cuna canguichic. 12Mashna animalta cushca cashpapish cada animalhuanmi chashna cuna canguichic.

13Tucui israelcunami ñucaman mishquilla ashnachun rupachishpaca, chashna ruhuana canguichic. 14Maijanpish shuctac llactamanta shamushpa, cancunahuan causac runa ñucaman mishquilla ashnachun rupachishpaca, cancuna shinallatacmi ruhuana can. 15Cancunapish, shuctac llactamanta shamushpa, cancunahuan causaccunapish cai mandashcallatatacmi ruhuana canguichic. Cai mandashcaca huiñaitami cancunapacpish, cancunapac huahuacunapacpish canga. Shuctac llactamanta shamushca runapish cancuna shinallatacmi Mandac Dios ñucapac ñaupapi ruhuana can. 16Cai mandashcallatatacmi cancunapish, caru llactamanta shamushpa, cancunahuan causaccunapish pactachina canguichic” ninmi ningui» nirca

17Mandac Diosca Moisestaca: 18«Israelcunataca: “Ñuca cusha nishca llactaman yaicushpa, 19chai llactapi pucushca granota micui callaringapacpish puntaca ñucamanrac alzashpa cunguichic. 20Trillana pambamanta ashata ñucaman cuc shinallatac tandata masashpapish ñucaman shuc tortata cunguichic. 21Tandata ruhuangapac chapushpaca, puntaca ñucamanrac cunguichic. Chaitaca huahua huahuami ruhuana canguichic.

22Ñuca Moisesman huillashca mandashcacunata mana yachashcamanta 23punta punzhamanta pacha cancunapish, cancunapac huahua huahuacunapish mana pactachishpa, 24juchallishcata tandanacushca israelcunapish mana yachacpica, tucui israelcunami ñucaman mishquilla ashnachun shuc becita tucui rupachina can. Mandashca shinallatacmi alli harinatapish, tallina vinotapish cuna can. Cutin juchata pichachunca shuc cari chivotami cuna can. 25Mana yachashpa juchallishcamantaca curami tucui israelcunapac juchacunata perdonachu ñucaman cunga. Chashna cucpica, perdonashcami canga. Paicunaca mana yachashcamanta juchallishcata perdonachunmi Mandac Dios ñucapac ñaupapi rupachinatapish, ofrendatapish apamunga. 26Chaipica tucui israelcunatapish, shuctac llactamanta shamushpa, cancunahuan causaccunatapish mana yachashcamanta juchallishcataca perdonashca canga.

27Maijanpish mana yachashcamanta juchallishpaca shuc huatayuc huarmi chivotami cuna can. 28Chai juchallishcamantaca curami ñucaman cunga. Shina cucpimi, ñucaca perdonasha. 29Mana yachashcamanta juchalliccunaca israelcunapish, shuctac llactamanta shamushpa paicunahuan causaccunapish shuc mandashcallatacmi charincuna.

30Ashtahuanpish israelcuna cashpa, shuctac llactamanta shamushca cashpapish yachashca jahua juchallishpaca, ñucatami llaquichin. Chashna ruhuac runaca israelcunapuramanta anchuchishcami canga. 31Ñuca rimashcata mana chasquishcamanta, mandashcacunata mana cazushcamantami chai runaca anchuchishca canga. Paipac juchamantaca paillatacmi llaquita apanga” ninmi ningui» nirca.

Samana punzhapi mana samaricpi llaquichinamanta

32Israelcuna shitashca pambapi causacushpami samana punzhapi shuc runata yantacucta japirca. 33Chaimantami Moisespac, Aaronpac, israelcunapac ñaupamanmi aparca. 34Shina apashpaca, paita imata ruhuana cashcata manarac yuyarishca cashcamantami carcelpi churarca. 35Chashna cacpimi, Mandac Dios Moisesta rimashpaca: «Carpa huasimanta canzhaman llucchishpa, rumihuan shitashpa huañuchichic» nirca. 36Chashna nicpimi, tandanacushca israelcunaca carpa huasimanta canzhaman apashpa, Mandac Dios Moisesta nishca shinallatac huañungacaman rumihuan shitarca.

Puchca fleco murucunayucta ruhuashcamanta

37Cutinllatac Mandac Diosca Moisestaca: 38«Israelcunataca: “Cancunapac huahua huahuacunacaman churana chaquipi flecosyucta ruhuashpa, chaicunapica morado puchcamanta murucunata ruhuashpa huarcuchinguichic. 39Chai flecoscunapi murucunata huarcuchishcata ricushpaca, ñuca mandashcacunata pactachinata yuyarishpami paicuna ricushpa, shungupi munanamanta jarcaringa. 40Chashna ruhuashpami, ñuca mandashcacunata yuyarishpa, pactachishpa, Mandac Dios ñucapaclla chicanyarishca causanguichic. 41Ñucami cancunata Mandac Dios cani. Ñucami cancunataca cancunapac Dios cangapac Egipto llactamanta llucchimurcani. Ñucaca cancunata Mandac Diosmi cani” ninmi ningui» nirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index