Search form

NÚMEROS 16

Coré mana cazushcamanta

1Coreca Coatpac huahua huahuamantami carca. Paica Izharpac churimi carca. Coatca Levipac aillumantami carca. Paimi Rubenpac aillumanta cac Datán, Abiram, Eliabpac churicunahuan, Peletpac churi Onhuan tandanacurca. 2Shina tandanacushpami ishcai patsac pichca chunga israelcunahuan tandarishpa, Moisesta llaquichi callarirca. Paicunaca tandanacushca israelcunata pushachun acllashca, shinallatac alli nishca gentecunami carca. 3Tucui cai gentecunami Moisestapish, Aarontapish llaquichishpaca:

—¡Ña mana ashtahuan ñucanchicta mandanachu canguichic! Tucui israelcunami Diospaclla chicanyarishca cancuna. Mandac Diospish ñucanchic chaupipimi causacun. Shina cacpica, ¿ima nishpatac cancunalla tucuita yachaclaya mandashpalla causacunguichic?— nirca.

4Paicuna shina nicta Moisés uyashpaca, pambamanmi cumurirca. 5Chai quipami Coretapish, paita caticcunatapish rimashpaca:

—Cayami Mandac Diosca maijanlla pai acllashca cashcata, paipaclla chicanyachishca cashcata ricushpa, paipacman cuchuyachun saquinga. 6Chaimanta can Corepish, canta caticcunapish caya inciensota rupachinacunata apashpa, 7Mandac Diospac ñaupapi churashpa rupachichic. Maijantami Mandac Dios acllan, chaimi Diospaclla chicanyachishca canga. Levipac huahuacuna ama jatun tucuichicchu— nirca.

8Cutinllatac Moisesca Coretaca:

—Levipac huahuacuna uyaichic. 9¿Israelcunata Mandac Dios israelcunapuramanta cancunata acllashpa, paipac carpa huasipi servichun, paipaclla cachun chicanyachishcaca ashallachu? ¿Tandanacushca israelcunapac ñaupapi servichun cancunata churashcaca ashallachu? 10Mandac Diosmi cantapish, Levipac churicunatapish paipac ñaupapi servichun churarca. ¿Chashna cashca jahuachu cunanca curacuna tucunata munanguichic? 11Canpish, canta caticcunapish mana Aarontachu llaquichishcanguichic, ashtahuanpish Mandac Diostami llaquichishcanguichic. ¿Aaronca pitac canyari?— nirca.

12Cai quipami Moisesca Eliabpac churi Datantapish, Abiramtapish cayac cacharca. Ashtahuanpish paicunaca:

—¡Mana rishun ninchicchu! 13¿Lechepish, mishquipish tiyac llactamanta ñucanchicta llucshimushpa, cai shitashca pambapi yarcaihuan huañuchun saquishcaca ashallachu? ¿Chashna ruhuacushca jahuachu cutin ñucanchicta mandac casha ningui? 14Canca lechepish, mishquipish tiyac llactamanca manarac chayachishcanguichu. Allpatapish, uvas chagratapish manarac cushcanguichu. Ñucanchictaca, ¿ñahuitachu surcusha ningui? ¡Ñucanchicca mana rishunchu!— nirca.

15Chaimantami Moisesca yallita piñarishpa Mandac Diostaca:

—Mandac Dioslla, Ñucaca shuc burrollatapish mana japishcanichu. Paicunapuramanta pitapish mana llaquichishcanichu. Chaimanta paicuna cushca ofrendataca ama chasquichu— nirca.

16Chai quipami Moisesca Coretaca:

—Caya canpish, canta caticcunapish Mandac Diospac ñaupapi shayaringuichic. Aaronpish chaipimi canga. 17Cada shuc inciensota rupachinata japishpa, chaipi inciensota churaichic. Tucui ishcai patsac pichca chunga runacuna inciensota churanata apashpa, Mandac Diospacman cuchuyanguichic. Aaronpish, paipaclla cac inciensota rupachinata japishpa, chaipi inciensota churashpami, Mandac Diospac ñaupaman cuchuyanga— nirca.

18Shina nicpimi, tucui mashna paicunapac incienso churanata apashpa, chaipi ninatapish, inciensotapish churashpa, Moises-huan Aaronhuan Mandac Dios-huan tupana huasi yaicunaman cuchuyarca. 19Coreca Moisestapish, Aarontapish llaquichishpami tucui israelcunata Mandac Dios-huan tupana huasi yaicunaman tandachirca. Shina cacpica, Mandac Diospac sumaimana achicca tucui israelcunapac ñaupapimi ricurirca. 20Chaipi Mandac Dios Moisestapish, Aarontapish rimashpaca:

21—Cai gentecunamanta anchurichic. Paicunataca cai ratomi tucui tucuchigrini— nirca.

22Shina nicpimi, Moisespish, Aaronpish pambacaman cumurishpaca:

—Mandac Dioslla, tucuiman causaita cucmi cangui. ¿Shuclla runalla juchallishcamantachu tucuihuan piñarigringui?— nirca.

23Shina nicpimi, Mandac Diosca Moisestaca:

24—Tucui israelcunata: “Corepac, Datanpac, Abirampac carpa huasi ladomanta anchurichic” nigrichic— nirca.

25Mandac Dios shina nicpimi, Moisesca jatarishcahuan Corepacman, Datanpacman, Abirampacman rirca. Israelcunata pushac yuyaccunapish catishpami rirca. 26Moisés chayashpa, chaipi cac tucui israelcunataca:

—¡Diosta mana manchac gentecunapac chaupimanta anchurichic! Paicunapac ima tiyashcata ama japinguichicchu. Pacta paicunapac juchamanta cancunapish llaquichishca canguichicman— nirca.

27Shina nicpimi, israelcunaca Corepac, Datanpac, Abirampac carpa huasi ladomanta anchurirca. Datanpish, Abirampish paicunapac carpa huasi pungupimi huarmicunandi, huahuacunandi llucshishpa shayarirca. 28Shina cacpimi Moisesca:

—Cunanmi tucui caicunataca mana ñuca munaillamanta ruhuacushcata, ashtahuanpish Mandac Diosllatac ruhuachun cachashcata yachanguichic. 29Cai runacuna, tucui gentecuna huañuc shinallatac huañucpica, Mandac Dios ñucata mana cachashcatami yachanguichic. 30Ashtahuanpish Mandac Dios mushucta ruhuashpa ricuchicpica, cai pamba pascarishpami cai gentecunataca paicunapac tucui charishcacunandi millpunga. Chashnami Seolmanca causac huaicuyanga. Chashna tucucpica, cai gentecuna Mandac Diosta rimashpa llaquichishcatami yachanguichic— nirca.

31Moisés rimashpa tucuchicpica, ñami paicuna shayacushca allpaca pascarirca. 32Chashna pascarishpami chai gentecunataca paicunapac familiandi, Coreta caticcunandi, paicunapac charishcacunandi millpurca. 33Paicunaca tucui imata charishcacunandimi Seolman causac huaicuyarca. Paicunaca allpa cutin huichcaricpimi, tucui israelcunapac chaupimanta chingarirca. 34Paicuna chingarishpa caparinacushcata paicunapac muyundipi cac israelcuna uyashpaca: «Ñucanchictapish allpaca millpungami» nishpami callparca. 35Chai quipaca Mandac Diospac ñaupamanta nina llucshishpami inciensota rupachic ishcai patsac pichca chunga gentecunata tucui rupachirca.

36Mandac Diosca Moisestaca: 37«Aarón curapac churi Eleazartaca: “Inciensota rupachinacunaca ñucapacllami can. Chaimanta rupacuc chaupimanta incienso churanacunata apashpa, uchupata caruman shitagri. 38Chai inciensota rupachinacunaca quiquinllatac juchallishpa huañushcacunapacmi. Cunanca cai inciensota rupachinacuna ñucapaclla cashcamanta altarta quillpangapac yacuyachi. Caicunaca ñucapac ñaupapi inciensota churashpa rupachinacunami carca. Cai shina ruhuashcaca tucui israelcunapac shuc yuyarinami canga” ningui» nirca.

39Shina nicpimi, Eleazar curaca rupachicushpa huañushca runacunapac broncemanta ruhuashca incienso rupachinacunata apamushpa, altarta tapana ruhuarca. 40Israelcuna manapish Aaronpac huahua huahuacuna cashpa, Mandac Diospac ñaupapi inciensota rupachingapac mana chayarina cashcata yuyarichunmi chashnaca ruhuarca. Eleazarca Mandac Diosmi Moisesman huillashca shinami maijanpish manapish Aaronpac huahuacuna cashpa, inciensota rupachingapac cuchuyashpa, Coré shina, paita caticcuna shina huañuchunmi chashna ruhuarca.

41Cayandi punzhaca tucui israelcuna Moisestapish, Aarontapish rimashpaca:

«Cancunaca Mandac Dios acllashca gentecunatami huañuchircanguichic» nishpa rimarirca.

42Tandanacushca israelcuna Moises-huanpish, Aaronhuanpish piñarishpa muyunacucpimi, paicunaca Mandac Dios-huan tupana huasiman cutigrirca. Shina cutigricucpimi, ñapish puyuca chai carpa huasita taparca. Chai shina tucucpica, Mandac Diospac sumaimana achicllami ricurirca. 43Shina ricuricpica, Moisespish, Aaronpish Dios-huan tupana huasi ñaupamanmi shamurca. 44Chaipimi Mandac Diosca Moisestaca:

45«¡Cai gentecunapac chaupimanta anchuri! ¡Paicunataca cai ratomi tucuchigrini!» nirca.

Shina nicpimi, pambacaman cumurirca. 46Chai quipami Moisesca Aarontaca: «Inciensota rupachinata apashpa, altarmanta ninata japishpa, inciensota churai. Shina churashpaca, utca israelcunapacman rishpa, paicunapac juchata pichachun mañai. Mandac Diosca yallita piñarishcami. Gentecunaca huañushpa tucurigrinmi» nirca.

47Shina nicpimi, Aaronca Moisés nishca shinallatac incienso rupachinata japishpa, israelcunapac chaupiman shamurca. Pai chayamucpica, ñami Diosca yallita piñarishpa gentecunata huañuchi callarirca. Aarón inciensota churashpami, israelcunapac juchata pichachun mañarca. 48Chai quipaca huañushcacunapac, manarac huañushcacunapac chaupipimi Aaronca shayarirca. Shina shayaricpimi, chai llaquica ña mana huañuchishpa anchuri callarirca. 49Chai punzhacamanca Diosta mana cazushpa huañushcacunata mana yupashpami chunga chuscu huaranga canchis patsac gentecuna huañurca. 50Chai llaqui ña mana ashtahuan gentecunata huañuchishpa caticpimi, Aaronca Moisespacman rishpa, Dios-huan tupana huasi yaicunaman cutimurca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index