Search form

NÚMEROS 17

Aaronpac taunamanta

1Mandac Dios Moisesta rimashpaca: 2«Israel huasi ucupurata tucui pushaccunapac taunata apamuchun mandai. Taunacunaca chunga ishcaimi canga. Chai taunacunapica paicunapac quiquin shutita quillcashpa, 3Levipac huasi ucupurata pushacpac taunapica Aaronpac shutita quillcangui. Chaica, huasi ucupurata cada pushaccunapacmi shuc tauna tiyanga. 4Cai taunacunataca ñucahuan tupana huasi ucupi, ari nishca quillcata huacaichina Arca ñaupapi churangui. Chaipimi ñucaca cancunahuan tupasha. 5Ñuca acllashca runapac taunaca pangashpa sisangami. Shina tucucpica, israelcunaca mana ashtahuan cancunataca ñucapac ñaupapi juchanchishpa rimangachu» nirca.

6Moisés chashna mandacpica, tucui Israel huasi ucupurata pushaccunami paicunapac quiquin taunata Moisespacman apamurca. Chaipica chunga ishcai taunami carca. Chaipica Aaronpac taunapishmi carca. 7Moisesca chai taunacunataca Dios-huan tupana huasipimi Mandac Diospac ñaupapi churarca. 8Cayandi Moisesca Dios-huan tupana huasiman yaicucpica, Levipac huasi ucupurata pushac Aaronpac taunaca pangashpa sisashcami cashca carca. Shinallatac almendro murucuna pucushcapishmi carca. 9Chaimantami Moisesca chai taunataca Mandac Diospac ñaupamantaca israelcunapac ñaupaman apamurca. Chashna apamucpimi, cada quiquinpac cashcata ricsishpa japirca.

10Mandac Diosca Moisestaca: «Aaronpac taunataca israelcuna ñucata mana cazushcata yuyarichun, ari nishca quillcata huacaichina Arca ñaupallapitac churai. Chaica ñucata mana cazushpa rimaccunapac shuc señalmi canga. Shinallatac paicunaca ña mana huañungachu» nirca.

11Moisesca Mandac Dios mandashca shinami ruhuarca. 12Chaimantami israelcunaca Moisestaca: «Riqui, ¡ñucanchicca huañugrinchicmi! ¡Chingarishcami canchic! ¡Tucui ñucanchicmi chingarishca canchic! 13Maijanpish Dios-huan tupana huasiman cuchuyashpaca huañungami. ¿Shinaca tucuichu huañushun?» nirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index