Search form

NÚMEROS 2

Israelcuna maipi carpacunata shayachinamanta

1Mandac Dios Moisestapish, Aarontapish rimashpaca: 2«Israelcunaca ñucahuan tupana huasi muyundipimi carpacunata shayachishpa, quiquin banderacunahuan, quiquin aillupura tiyarina can.

3Judapac aillumanta soldadocunaca inti llucshina ladopimi carpacunata shayachishpa, quiquin banderahuan tiyaringa. Paicunataca Aminadabpac churi Naasonmi mandanga. 4Shinallatac paicunaca canchis chunga chuscu huaranga sucta patsacmi canga. 5Paicunapac cuchullapica Isacarpac aillumanta soldadocunami carpacunata shayachishpa tiyaringa. Paicunataca Zuarpac churi Natanaelmi mandanga. 6Cutin paicunaca pichca chunga chuscu huaranga chuscu patsacmi canga. 7Paicunapac cuchullapica Zabulonpac aillumanta soldadocunami carpacunata shayachishpa tiyaringa. Paicunataca Helonpac churi Eliabmi mandanga. 8Cutin paicunaca pichca chunga canchis huaranga chuscu patsacmi canga. 9Judapac carpacunamanta soldadocunaca patsac pusac chunga sucta huaranga chuscu patsacmi canga. Paicunami israelcunata ñaupashpa ringa.

10Rubenpac aillumanta soldadocunaca ura ladopimi quiquin banderahuan carpacunata shayachishpa tiyaringa. Paicunataca Sedeurpac churi Elisurmi mandanga. 11Cutin paicunaca chuscu chunga sucta huaranga pichca patsacmi canga. 12Paicunapac cuchullapica Simeonpac aillumanta soldadocunami carpacunata shayachishpa tiyaringa. Paicunataca Zurisadaipac churi Selumielmi mandanga. 13Cutin paicunaca pichca chunga iscun huaranga quimsa patsacmi canga. 14Paicunapac ladopica Gadpac aillumanta soldadocunami tiyaringa. Paicunataca Reuelpac churi Eliasafmi mandanga. 15Cutin paicunaca chuscu chunga pichca huaranga sucta patsac pichca chungami canga. 16Rubenpac carpacunapi tucui yupashca soldadocunaca patsac pichca chunga shuc huaranga chuscu patsac pichca chungami canga. Paicunami puntaniqui soldadocunapac huashata ringacuna.

17Chai quipaca ñucahuan tupana huasitami levitacuna apashpa ringa. Ima shinami carpacunapi cashca shinallatacmi chai soldadocunaca quiquin banderahuan catinacushpa ringacuna.

18Efrainpac aillumanta soldadocunaca inti yaicuna ladopimi quiquin banderahuan carpacunata shayachishpa tiyaringa. Paicunataca Amihudpac churi Elisamami mandanga. 19Cutin paicunaca chuscu chunga huaranga pichca patsacmi canga. 20Paicunapac ladopica Manasespac aillumanta soldadocunami carpacunata shayachishpa tiyaringa. Paicunataca Pedasurpac churi Gamalielmi mandanga. 21Cutin paicunaca quimsa chunga ishcai huaranga ishcai patsacmi canga. 22Paicunapac cuchullapica Benjaminpac aillumanta soldadocunami carpacunata shayachishpa tiyaringa. Paicunataca Gedeonipac churi Abidanmi mandanga. 23Cutin paicunaca quimsa chunga pichca huaranga chuscu patsacmi canga. 24Efrainpac carpacunapi cac soldadocunaca patsac pusac huaranga shuc patsacmi canga. Paicunami ishcainiqui soldadocunapac huashata ringacuna.

25Danpac aillumanta soldadocunaca jahua ladopimi quiquin banderahuan carpacunata shayachishpa tiyaringa. Paicunataca Amisadaipac churi Ahiezermi mandanga. 26Cutin paicunaca sucta chunga ishcai huaranga canchis patsacmi canga. 27Paicunapac ladopica Aserpac aillumanta soldadocunami carpacunata shayachishpa tiyaringa. Paicunataca Ocranpac churi Paguiel mandanga. 28Cutin paicunaca chuscu chunga shuc huaranga pichca patsacmi canga. 29Paicunapac ladopica Neftalipac aillumanta soldadocunami carpacunata shayachishpa tiyaringa. Paicunataca Enanpac churi Ahirami mandanga. 30Cutin paicunaca pichca chunga quimsa huaranga chuscu patsacmi can. 31Danpac carpacunapica patsac pichca chunga canchis huaranga sucta patsac soldadocunami canga. Paicunaca banderacunapac huashatami ringacuna» nirca.

32Huasi ucupurata catishpa, tucui israelcunata yupashcaca sucta patsac quimsa chunga huaranga pichca patsac pichca chunga soldadomi carca. 33Moisesta Mandac Dios mandashca shinallatacmi levitacunataca israelcunahuan mana tandachishpa yuparca.

34Israelcunaca Moisesta Mandac Dios mandashca shinallatacmi tucuita ruhuarca. Paicunaca aillu, huasi ucupura ima shina cashca shinallatacmi bandera ladopi causarca. Chaimanta rina tucucpipish, chashnallatacmi ric carca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index