Search form

NÚMEROS 20

Jatun rumimanta yacu llucshishcamanta

1Tandanacushca israelcunaca callari quillapimi Zin shitashca pambaman chayashpa, Cadespi tiyarirca. Moisespac pani Mariaca chaipimi huañurca. Chashna huañucpica, chaillapitacmi enterrarca.

2Chai llactapi yacu mana tiyashcamantami tucui israelcunaca Moisestapish, Aarontapish rimarirca. 3Israelcunaca Moisestaca:

«¡Mandac Diospac ñaupapi ñucanchic huauquicuna huañui horasllatac huañushca cashpachari alli canchicman carca! 4Cai shitashca pambapi ñucanchicpish, ñucanchic animalcunapish huañuchunca, ¿imapactac Mandac Dios acllashca israelcunataca apamurcangui? 5¿Ima nishpatac ñucanchictaca Egiptomanta cai shitashca manchana pambaman pushamurcangui? Cai allpapica higopish, uvaspish, granadapish mana pucunchu. ¡Yacullapish mana tiyanchu!» nirca.

6Chaimantami Moisespish, Aaronpish paicunapac ñaupamanta anchurishpa, Mandac Dios-huan tupana huasiman rirca. Chaipimi carpa huasi yaicunapi pambacaman cumurirca. Chaipica Mandac Diospac sumaimana achicmi ricurirca. 7Mandac Diosca Moisestaca:

8«Cambac varata japishpa, cambac huauqui Aaronhuan ishcai tucushpa, tucui israelcunata tandachishpa, paicunapac ñaupapi jatun rumita rimai. Shina rimacpica, chai rumimantaca yacumi llucshinga. Chai yacutaca israelcunamanpish, paicunapac animalcunamanpish ubiachingui» nirca.

9Shina nicpica, Moisesca Mandac Dios mandashca shinallatacmi paipac ñaupamanta varata japirca. 10Chaimantaca Moisespish, Aaronpish tucui israelcunata ñaupapi tandachishpaca:

«¡Mana cazuc israelcuna uyaichic! Cancuna ubiachunca cai rumi quingraimantami yacuta llucchigrinchic» nirca.

11Chashna nishpami, Moisesca maquita alzashpa, paipac varahuan ishcai cutin rumi quingraipi huactarca. Chashna huactacpica, achca yacumi llucshirca. Chai yacutami tandanacushca israelcunapish, paicunapac animalcunapish ubiarca. 12Mandac Dios Moisestapish, Aarontapish rimashpaca:

«Cancunaca ñucata mana crircanguichicchu, ñuca jucha illac cashcatapish israelcunaman mana ricuchircanguichicchu. Chaimantami cancunaca ñuca cushca llactamanca tandanacushca israelcunahuanca mana yaicunguichic» nirca.

13Chaipi israelcuna Mandac Dios-huan piñanacushcamantami chai yacutaca Meriba yacu nirca. Chaipimi Mandac Diosca paicunapurapica jucha illac cashcata ricuchirca.

Edomitacuna israelcunata

mana pasachisha nishcamanta

14Cadesmantami Moisesca huillaccunata Edom llactata jatun mandacpacman cacharca. Paicunataca: «Cambac huauqui Israelca: “Ñucanchicta tucui llaquicuna japishcataca yachanguimi. 15Ñucanchic ñaupa taitacunaca Egiptoman rishpa, chaipi tauca huatata causashcata, chai gentecuna ñucanchictapish, ñucanchic taitacunatapish ima shina llaquichishcata yachanguimi. 16Chaimantami ñucanchic Mandac Diostaca caparishpa mañarcanchic. Chashna mañacpica, Mandac Dios uyashpami paipac angelta Egiptomanta llucchichun cacharca. Cunanca cambac llacta lindero cuchulla Cadespimi canchic. 17Chaimanta cambac llactata pasachun saqui. Cambac allpa jahuatapish, uvas chagra jahuatapish mana rishunchu. Junducunamantapish mana yacuta ubiashunchu. Lluquimanpish, allimanpish mana llucshishpami, purina jatun ñanllata pasashun” ninguichic» nirca.

18Shina nicpimi, Edom llactata mandacca:

—Ñuca llactataca mana pasachishachu. Cancuna pasai callaricpica, ñuca soldadocunahuanmi macangapac llucshisha— nirca.

19Shina nicpimi israelcunaca:

—Ñucanchicca jatun ñanllatami rishun. Ñucanchic yacuta ubiashpa, shinallatac ñucanchic animalcuna cambac junducunamanta yacuta ubiacpica pagashunllami. Ashtahuanpish chaquilla pasangapaclla cambac ñanta mañachi— nirca.

20Ashtahuanpish Edom llactata jatun mandacca:

—Ñuca llactataca manatac pasanguichicchu— nirca.

Shina nishpami, Edom llactata jatun mandacca paipac soldadocunahuan allichirishpa, israelcunahuan macanacungapac llucshirca. 21Edom llactata jatun mandac manatac pasachisha nicpimi, israelcunaca shuc ñanta rirca.

Aarón huañushcamanta

22Tandanacushca israelcunaca Cadesmanta llucshishpaca, Hor urcumanmi chayarca. 23Mandac Dios Edom llacta linderopi cac Hor urcupi Moisestapish, Aarontapish rimashpaca: 24«Aaronca huañushpa ñaupa aillucunahuan tandarigrinmi. Paica israelcunaman ñuca cushca llactamanca mana yaicungachu. Meriba yacupi ñuca mandashcata mana cazushcamantami chai llactamanca mana yaicunga. 25Cunanca can Moisesca Aaronta shinallatac paipac churi Eleazarta Hor urcuman pushai. 26Chaiman chayashpaca Aaronpac churanata llucchishpa, paipac churi Eleazarman churachi. Chaipimi Aaronca huañushpa, ñaupa aillucunahuan tandarigringa» nirca.

27Moisesca Mandac Dios mandashca shinallatacmi tucui israelcuna ricucucpimi, Hor urcuman huichai rirca. 28Chaiman chayashpaca, Moisesca Aaronpac churanata llucchishpami paipac churi Eleazarman churachirca. Aaronca chai urcu jahuapimi huañurca. Chai quipaca Moisespish, Eleazarpish chai urcumanta urai shamurcami. 29Tandanacushca israelcuna Aarón ña huañushcata yachashpaca, tucuimi quimsa chunga punzhata duelo carca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index