Search form

NÚMEROS 21

Israelcuna jatun mandac Aradta atishcamanta

1Neguev llactapi causac Arad llactata jatun mandac Canaán llactamanta runaca Atarimman rina ñanta israelcuna shamucucta uyashpami macanacungapac llucshirca. Shina macanacushpami maijan israelcunataca prezurca. 2Chaimantami israelcunaca Mandac Diostaca: «Chai llactapi causaccunata ñucanchic maquipi churacpica, tucui llactacunatami tucuchishun» nirca. 3Mandac Diosca israelcuna mañashcata uyashpa, cananeocunata paicunapac maquipi churacpimi, tucui chaipi causaccunatapish, llactacunatapish tucuchirca. Chaimantami chai llactaca Horma shuti saquirirca.

Broncemanta culebrata ruhuashcamanta

4Chai quipaca israelcunaca Hor urcumanta llucshishpami, Edom llactata muyungapac Puca Cuchaman rina ñanta rirca. Chashna yallita purishpa, ña mana ashtahuan risha nishpami, 5Mandac Diostapish, Moisestapish rimarishpaca:

«¿Imapactac ñucanchicta Egiptomanta cai shitashca pambapi huañuchun llucchimurcanguichic? Caipica yacupish, micunapish mana tiyanchu. Cai micunataca ña mana micunayanchu» nirca.

6Shina nicpimi, Mandac Diosca israelcunapac chaupiman huañuchic culebracunata cacharca. Chai culebracuna canicpimi, tauca israelcuna huañurca. 7Chaimantami israelcuna Moisespacman rishpaca:

«Ñucanchicca Mandac Diostapish, cantapish rimarishpami juchallishcanchic. Cunanca tucui cai culebracuna ñucanchic chaupimanta anchurichun, Mandac Diosta mañashpa cui» nirca.

Chashna nicpimi, Moisesca tucui israelcunamanta Diosta mañarca. 8Chaimantami Mandac Diosca Moisestaca:

«Huañuchic culebralayata ruhuashpa, banderata huarcuna caspipi churai. Maijanpish culebra canishca cashpa, chai culebrata ricushpaca, mana huañungachu» nirca.

9Shina nicpimi, Moisesca broncemanta culebralayata ruhuashpa bandera huarcuna caspipi churarca. Maijanpish culebra canicpica, chai culebratami ricuc carca. Shina ricushpaca, mana huañucchu carca.

Moab llactata israelcuna muyushcamanta

10Israelcuna chaimanta rishpaca, Obot pushtupimi carpata shayachishpa tiyarirca. 11Obotmanta rishpaca, Moab llacta chimba ladopi cac shitashca pamba Iye-abarimpimi tiyarirca. Chai pambaca inti llucshina ladomanmi carca. 12Chaimanta rishpaca, Zered pambapimi tiyarirca. 13Chaimanta rishpaca, Arnón jatun yacu lado shitashca pambapimi carpata shayachishpa tiyarirca. Chai yacuca amorreocunapac allpamantami llucshicurca. Chai jatun yacumi Moab llactahuan amorreocunapac llactahuan linderoca. 14Chaimantami Mandac Diospac macanacuimanta quillcashca libropica:

«Puca Cuchatapish,

Arnón yacutapish pasarcanchicmi.

15Jatun yacu tandarishpa ricuc

ladopipish ayudarcami.

Chai yacuca Ar llactata rishpami,

Moab llacta linderopi samarin» nicun.

16Chaimantaca Beermanmi rirca. Chaipimi Mandac Diosca Moisestaca: «Yacuta cungapac tucui israelcunata tandachi» nirca. 17Chaipi israelcuna cantashpaca:

«¡Yacu llucshic jundulla,

yacuta cuiyari!

¡Diosta cantaichicyari!

18Mandaccunami varahuan allarca.

Mandashcacunata cuccunami

paicunapac tauna caspihuan allarca» nirca.

Shitashca pambamanta Mataná pushtumanmi chayarca. 19Matanamantaca Nahaliel pushtumanmi chayarca. Nahalielmantaca Bamotmanmi chayarca. 20Bamotmantaca Moab llacta pambaman chayashpami, Pisga urcu jahuaman chayarca. Chai urcumantaca shitashca pambata ricunallami carca.

Israelcuna jatun mandac Sehonta atishcamanta

(Dt 2.26-37)

21Israelcunaca amorreocunata jatun mandac Sehonpacmanmi huillaccunata cacharca. Paicunata cachashpaca: 22«Cambac llactata pasachun saqui. Cambac allpa jahuatapish, uvas chagra jahuatapish mana rishunchu. Junducunamantapish mana yacuta ubiashunchu. Lluquimanpish, allimanpish mana ladoyashpami, jatun ñanllata pasashun ningui» nirca.

23Jatun mandac Sehonca israelcunataca paipac llactata mana pasachircachu. Ashtahuanpish tucui gentecunata tandachishpami, Jahazman chayashpa, israelcunahuan macanacurca. 24Shina cacpipish, israelcunaca espadacunahuan macashpami, Arnón yacumanta, Amón llacta Jaboc jatun yacucaman rishpa, allpata japirca. Amón llacta linderoca alli jarcashcami carca. 25Chashnami israelcunaca tucui llactacunata quichushpa, amorreocuna causana tucui pueblocunapi causarca. Hesbón llactatapish, chai muyundi uchilla llactacunatapish quichurcami. 26Hesbón llactaca amorreocunata jatun mandac Sehón causanami carca. Paica Moab llactata jatun mandac-huanmi macanacushpa, tucui allpataca Harnón yacucaman quichushca carca. 27Chaimantami rimaicunata allichiccunaca:

«Jatun mandac Sehonpac causana

Hesbón llactaman shamuichicyari.

Chai llactata allichishpa,

cutin shayachichicyari.

28Hesbón llactamantaca ninami llucshirca.

Jatun mandac Sehonpac llactamanta

cunyacuc nina llucshishpami,

Moab llactapi tiyac Ar llactata tucuchirca.

Arnón yacu jahua ladopi causac

mandaccunatapish tucuchircami.

29¡Aij, Moab llactalla!

Quemos diosta adoraccunaca tucurishcami.

Paipac churicunaca miticushpami callparca.

Paipac ushicunataca

amorreocunata jatun mandac Sehonmi prezurca.

30Cambac huahua huahuacunaca

Hesbón llactamantaca

Dibón llactacamanmi tucurirca.

Nófa pueblomantaca

Medeba llactacamanmi

tucurirca» nishpa cantarca.

Israelcuna Basán llactata jatun mandacta atishcamanta

(Dt 3.1-11)

31Israelcunaca amorreocunapac llactatami japirca. 32Moisesca Jazer llactata ricuchunmi maijan gentecunata cacharca. Chai llactaca muyundi uchilla llactacunandi quichushpami, amorreocunata llucchishpa cacharca.

33Chaimanta cutishpaca, Basán llactaman rina ñantami huichaiman rirca. Paicuna chaita ricucpimi, Basán llactata jatun mandac Ogca tucui paipac gentecunahuan Edreipi macanacungapac llucshirca. 34Chaipimi Mandac Diosca Moisestaca: «Ama manchaichu. Ñucami chai jatun mandactaca paipac tucui gentecunandi, paipac tucui llactacunandi cambac maquipi churarcani. Canca paicunataca Hesbonpi causac amorreocunata jatun mandac Sehonta ruhuashca shinallatacmi ruhuangui» nirca.

35Shina nicpimi, israelcunaca jatun mandac Ogta, paipac churicunandi, paipac gentecunandi shucllatapish mana saquishpa, tucui huañuchirca. Shina huañuchishpami paicunapac llactataca tucui japirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index