Search form

NÚMEROS 22

Jatun mandac Balac Balamta cachashcamanta

1Chaimanta israelcuna Jericó chimba ladoman rishpa, Jordán yacu pata pambacunapi cac Moab llacta pambapimi carpata shayachishpa tiyarirca.

2Ziporpac churi Balacca israelcuna amorreocunata imata ruhuactami tucuita ricurca. 3Israelcuna achca cashcamantami Moab llactapi causaccunaca yallita manchaihuan carca. 4Chaimantami Moabpi causaccunaca Madián llactata pushac yuyaccunata: «¡Cunanca, cai tucui gentecunaca huagracuna quihuata lambishpa micuc shinachari ñucanchictaca tucuchinga!» nirca.

Chai punzhacunapica Moabpi causaccunataca Ziporpac churi Balacmi mandacurca. 5Chaimantami Balacca Beorpac churi Balaamta cayachun cacharca. Balaamca Eufrates yacu ladopi cac, paipac llactapura causana Petor llactapimi causacurca. Balac cayagriccunata cachacushpaca: «Cai tucui gentecunami Egiptomanta shamushpa, tucui llactacunapi jundashca. Ñami ñuca causana chimba ladopi tiyacuncuna. 6Cai gentecunaca ñucata yalli sinchicunami. Chaimanta paicunata maldiciangapac shamuiyari. Can maldiciacpica, paicunata atishpa, cai llactamanta llucchishpa cachashapishchari. Chaica, can maldiciacpica, chashnami tucun. Cutin can maijanta bendiciacpica, chashnami tucun. Chaitaca allimi yachani» nirca.

7Shina nicpica, Moab llactata, Madián llactata pushac yuyaccunaca pai maldiciashcamanta pagana cullquita apashpami rirca. Paicuna Balaampacman chayashpaca, Balac imata nishcatami huillarca. 8Shina nicpimi Balaamca:

—Cunan tutaca caillapi pacarichic. Ñucaca Mandac Dios imata nishcatami cancunamanca huillasha— nirca.

Shina nicpimi, Moab llactata pushaccunaca Balaampac huasipi pacarirca. 9Chaipimi Mandac Dios Balaampacman shamushpaca:

—¿Caipi canhuan tiyacuc runacunaca picunatac?— nirca.

10Shina tapucpimi Balaamca:

—Paicunaca Moab llactata jatun mandac Ziporpac churi Balac cachashca runacunami. Paicunataca: 11“Cai tucui gentecunami Egiptomanta shamushpa, tucui llactacunapi jundashca. Cunanca paicunata maldiciashpa cuiyari. Chashna maldiciacpi, ñuca paicunata atishpaca, cai llactamanta llucchishpa cachashapishchari” nichunmi cachashca— nirca.

12Shina nicpimi, Mandac Diosca Balaamtaca:

—Chai runacunahuanca ama richu. Chai gentecunatapish ama maldiciaichu. Paicunaca ñuca bendiciashca gentecunami— nirca.

13Cayandi tutamanta Balaam jatarishpa, Balac cachashca pushaccunataca:

—Mandac Diosca ñucataca mana cancunahuan richun munanchu. Chaimanta cancunapac llactaman cutichiclla— nirca.

14Chashna nicpimi, Moab llactata pushaccuna Balacpacman cutishpaca:

—Balaamca mana shamusha ninchu— nirca.

15Balacca cutinllatacmi punta riccunamanta ashtahuan alli, ashtahuan achca pushaccunata cacharca. 16Paicuna Balaampacman chayashpaca:

—Ziporpac churi Balacca: “Ñucapacman shamunataca ama jarcarichuyari. 17Chai shamushca gentecunata ñuca shutipi maldiciashpa cuiyari. Cantaca mai alli nishami, shinallatac can mañashcatami cusha” nicunmi— nirca.

18Shina nicpimi, Balaamca Balacta serviccunataca:

—Mandac Balac mandana huasi junda curita, cullquita cucpipish ñucata Mandac Dios ama ruhuachun nishcataca ashalla cacpipish, achca cacpipish mana ruhuashachu. 19Chaimanta ñucata Mandac Dios ashtahuan ima nishcata uyangapac cunan tutapish caipi pacarichic— nirca.

20Chai tuta Mandac Dios Balaampacman ricurishpaca:

—Chai runacuna canta pushangapac shamushca cacpica, jatarishpa paicunahuan rilla. Shina rishpapish, ñuca nishcallata ruhuangui— nirca.

Balaamta ángel jarcashcamanta

21Tutamanta utca Balaam jatarishpaca, paipac burrota sillashpami Moab llactata mandaccunahuan rirca. 22Shina Balaam ricucpimi, Mandac Diosca nina japiric shina piñarirca. Shinallatac Mandac Diospac angelmi ñanta mana pasachisha nishpa jarcarca.

Balaamca paipac burropi montashcami paita serviccunahuan ricurca. 23Burroca Mandac Diospac ángel ñanpi espadata llucchishpa charicucta ricushpami, ladoyai callarirca. Chaimantami Balaamca burrota ñanman cutichingapac macarca.

24Shina cacpipish, angelca ishcai ladota pircashca uvas chagra chaupita rina ñanpimi jarcashpa shayarirca. 25Chaita ricushpami burroca pirca cuchupi Balaampac changata huactachirca. Chaipimi Balaamca cutinllatac burrota macarca.

26Mandac Diospac angelca ashtahuan ñaupaman rishpami, lluqui ladomanpish, alli ladomanpish maita mana ladoyaipac ñanpi shayarirca. 27Chaita ricushpami burroca Balaam montashca cacllapitac siririrca. Shina siriricpimi, Balaamca munai piñarishpa, burrota caspihuan macai callarirca. 28Chaipimi Mandac Diosca burrota rimachishpaca:

—Can quimsa cutin ñucata macachunca, ¿cantaca imatatac ruhuarcaniyari?— nirca.

29Shina nicpimi Balaamca:

—¡Ñucataca yallitami burlata ruhuashcangui! ¡Espadata ñuca maquipi charicuimanlla! ¡Cunanllatami huañuchiman!— nirca.

30Chashna nicpi, burroca Balaamtaca:

—¿Manachu cambac burro cani? ¡Ñucata charishca punzhamanta cunancamanmi montashpa purishcangui! ¿Ñucaca ima horatac cunan shina cantaca mana cazushcani?— nirca.

Shina nicpimi Balaamca:

—Mana— nirca.

31Mandac Dios Balaamta ñahuita pascac shina ruhuacpimi, Balaamca Mandac Diospac ángel espadata maquipi apashpa, ñanpi shayacucta ricurca. Shina ricushpami Balaamca paipac ñaupapi pambaman cumurirca. 32Chaipimi Mandac Diospac ángel Balaamtaca:

—¿Ima nishpatac cambac burrotaca quimsa cutin macarcangui? Riqui, can ñuca ñaupapi mana allita ruhuangapac ricucpimi, jarcangapac shamurcani. 33Burroca quimsa cutinmi ñucata ricushpa, ñucapac ñaupamanta ladoyarca. Burro mana anchuricpica, canta huañuchishpami burrotaca causacta saquiman carcani— nirca.

34Chaimantami Balaamca Mandac Diospac angeltaca:

—Can ñanpi ñucata jarcacushcata mana yachashpami juchallishcani. Ñuca rina mana alli cacpica, cutishpa rishalla— nirca.

35Shina nicpi, Mandac Diospac ángel Balaamtaca:

—Chai runacunahuan rilla. Shina rishpapish ñuca imata nichun nishcallata ningui— nirca.

Shina nicpimi, Balaamca Balac cachashca mandaccunahuan rirca. 36Balacca Balaam shamucucta yachashpami Arnón yacu chimba ladopi cac Moab llactapi cac shuc pueblopi tupangapac rirca. Chai puebloca moabitacunapac llacta tupanacuipimi carca. 37Chashna Balaamhuan tupashpami Balacca:

—¿Manachu cantaca utca shamuchun cayachun cacharcani? ¿Manachu ñucaca canta alli chasquiman carcani?— nirca.

38Shina nicpimi, Balaamca Balactaca:

—Ña cambacman shamucunimi. Shina cashpapish ñucaca, ñuca Dios mana rimachicpica, imata mana rimashachu— nirca.

39Chai quipaca Balacca Balaamhuanmi Quiriat-juzot llactaman rirca. 40Chaipimi Balacca huagracunata, ovejacunata huañuchichishpa Balaammanpish, paita pushangapac ric mandaccunamanpish carachun cacharca.

Balaam israelcunata bendiciashcamanta

41Chai cayandi tutamanta Balacca Balaamta Bamot-baal urcuman pushashpami, israelcunapac carpa huasicunata muyundita ricuchirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index