Search form

NÚMEROS 23

1Balaamca Balactaca:

—Caipi canchis altarta shayachishpa, canchis huagrata, canchis cari ovejata huañuchishpa, caipi churai— nirca.

2Balacca Balaam nishca shinallatacmi ruhuarca. Chashnami Balacca Balaamhuan shuc huagrata, shuc cari ovejata cada altarpi churashpa rupachirca. 3Chai quipaca Balaamca Balactaca:

—Ñucaca rigrinimi. Ñuca cutingacaman cambac cushca tucui rupacuc ladopi shuyacui. Mandac Dios ñucahuan tupangapac shamungapishchari. Pai imata nicpica, huillashallami— nirca.

Shina nishpaca shuc shitashca urcumanmi rirca. 4Chai urcupimi Mandac Diosca Balaamhuan tupangapac shamurca. Chaipimi Balaamca:

—Canchis altartami ruhuashcani. Cada altarpimi shuc huagrata, shuc cari ovejata tucui rupachini— nirca.

5Chaipimi Mandac Diosca Balaampac shimipi rimaita churac shina rimashpaca:

—Balacpacman cutishpa cashna nigri— nirca.

6Balaam cutishpaca, Balac Moab llactata mandaccunahuan Diosman cushpa tucui rupacuc ladopi shayacuctami ricurca. 7Chaipimi Balaamca yuyarina rimaicunahuan huillashpaca:

«Inti llucshina ladopi tiyac

Aram llactapi causacucpimi,

Moab llactata mandac Balacca pushamurca.

Jacobopac churi israelcunata

maldiciangapac shamui nirca.

8Shina cacpipish,

Dios mana maldiciacpica,

¿ima shinatac maldiciashayari?

Mandac Dios mana llaquichicpica,

¿ima shinatac llaquichishayari?

9Ñucaca jatun urcu patamantapish,

lomacunamantapish israelcunataca

paicunalla causac cashcatami ricuni.

Paicunaca shuctac llactacunahuanpish

mana chapuriclla gentecunami nini.

10Jacobomanta mirarishca

tiyu shina achca israelcunataca,

¿pitac yachangayari?

Chuscupi chaupishcatapish,

¿pitac yupai pudingayari?

¡Ñucaca cashcata ruhuac shina,

huañushpachari alli caiman!

¡Paicuna shina tucurishpachari

alli caiman!» nirca.

11Shina nicpimi, Balacca Balaamtaca:

—¿Imatatac ruhuacungui? Ñucata piñaccunata maldiciachunmi pushamurcani. Chaipac randica paicunata bendiciashcanguimi— nirca.

12Shina nicpimi Balaamca:

—¿Manachu Mandac Dios rimachun nishcallata rimana cani?— nirca.

13Shina nicpimi Balacca:

—Cunanca, maimantami israelcunata ricunallaman jacu. Chaimantaca mana tucui israelcunata ricunguichu. Ashallatami ricungui. Chaicunata maldiciangui— nirca.

14Shina nishpami Balaamtaca Zofim pambapi tiyac Pisga urcuman pusharca. Chaipimi canchis altarta ruhuashpa, cada altarpi shuc huagrata, shuc cari ovejata tucui rupachirca. 15Chaipimi Balaamca Balactaca:

—Caipi tucui rupachicuc ladopi shuyai. Ñucaca chaipi Mandac Dios-huan tupangapacmi rini— nirca.

16Mandac Dios Balaamhuan tupangapac shamushpa, Balaampac shimipi shuc rimaita churac shina rimashpaca:

—Balacpacman cutishpa, cashna nigri— nirca.

17Balaam cutimushpaca, Balac Moab llactata mandaccunandi tucui rupacuc ladopi shayacuctami ricurca. Chaipimi Balacca:

—Mandac Diosca, ¿imatatac nin?— nirca.

18Chashna tapucpimi, Balaamca yuyarina rimaicunahuan huillashpaca:

«Ziporpac churi Balac jatarishpa,

ñuca nishcata allita uyaiyari.

19Diosca mana aichayuc runa shina

llullacchu.

Paica mana runapac churi shina,

quipata pandarishcanimi nicchu.

Paica imata ruhuasha nishpaca,

¿manachu ruhuangatac?

Imata nishcataca,

¿manachu pactachinga?

20Paimi israelcunataca

bendiciachun nirca.

Pai bendiciashcataca

ñucaca mana tigrachi pudinichu.

21Jacobopac churi israelcunapica

ima juchata mana ricushcanichu.

Ima millaitapish mana ricushcanichu.

Mandac Diosca paicunahuanmi.

Paitaca: “Jatun mandacmi cangui”

nishpami caparincuna nirca.

22Egiptomanta llucchimuc Diosca

huagra shina fuerzasapami.

23Jacobopac churi israelcunataca

ima brujeriatapish,

ima shuctac millaicunatapish

mana ruhuai pudinchu.

Jacobopac churi israelcunataca:

“¡Diosca yalli allitami

ruhuashca!” ningacunami.

24Cai gentecunaca

León huacac shinami jatarin.

Leonca ima animalta japishpa,

yahuarta ubiangacamanmi mana samarin.

Chai shinami cai gentecunaca

jatarin» nirca.

25Chaimantami Balacca Balaamtaca:

—Paicunata mana maldiciai pudishpaca, ¡ama bendiciaichuyari!— nirca.

26Balac shina nicpimi Balaamca:

—¿Manachu ñucaca Mandac Dios imata nishcallata ruhuasha nircani?— nirca.

27Shina nicpimi, Balacca Balaamtaca:

—Cunanca shuctac ladoman jacu, chai ladomanta israelcunata maldiciashcaca, Diospac ñaupapi alli cangapishchari— nirca.

28Shina nishpami Balacca Balaamtaca tucui shitashca pambata ricunalla Peor urcu jahuaman pusharca. 29Chaipimi Balaamca Balactaca:

—Caipi canchis altarcunata ruhuashpa, canchis huagrata, canchis cari ovejatapish allichi— nirca.

30Balacca Balaam nishca shinallatacmi cada altarpi shuc huagrata, shuc cari ovejata rupachirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index