Search form

NÚMEROS 3

Levitacuna imata ruhuana cashcamanta

1Mandac Dios Sinaí urcupi Moises-huan parlanacui punzhapi tiyashca Aaronpac, Moisespac churicunaca caicunami. 2Punta churica Nadabmi carca. Quipa churicunaca Abiú, Eleazar, Itamarmi carca. 3Paicunami Aaronpac churicunamantaca Diosta servingapac aceitehuan cahuishca curacuna carca. 4Shina cashpapish, Nadabhuan, Abiuhuanca Sinaí urcupi Mandac Diospac ñaupapi mana alli rupachishcamantami chaillapitac huañurca. Paicunaca mana huahuayucchu carca. Eleazarpish, Itamarpish paicunapac taita Aaronpac ñaupapi curallatacmi catirca.

5Mandac Dios Moisesta rimashpaca: 6«Aarón curata ayudachun Levipac aillucunata pushamui. 7Ñucahuan tupana huasipi Aarón mandashcata, israelcuna ruhuana cashcata ruhuachun churai. 8Ñucahuan tupana huasipi imalla tiyaccunatapish, israelcunaman mingashcatapish paicunami cuidanga. Ñucahuan tupana huasipipish paicunami servinga. 9Levitacunaca israelcunamanta chicanyachishcami. Chaimanta paicunataca Aaronman, paipac churicunaman cungui. 10Curacuna ruhuana cashcataca Aaronman, paipac churicunaman mingangui. Chaiman pipish yaicushpaca huañungami» nirca.

11Mandac Dios Moisesta rimashpaca: 12«Israelcunapuramanta punta churicunata japinapac randica levitacunatami ñucapac cachun acllarcani. Levitacunaca ñucapacmi cana can. 13Egiptopi causaccunapac punta churicunata huañuchicushpami israelcunapac punta churicunataca ñucapac cachun acllashpa, mana huañuchircani. Chaimantami israelcunapac punta churicunatapish, punta animalcunatapish ñucapaclla cachun acllarcani. Ñucaca Mandac Diosmi cani» nirca.

14Mandac Dios Sinaí shitashca pambapi Moisesta rimashpaca: 15«Levitacunata shuc quillata charicmanta callarishpa ailluta, huasi ucupurata catishpa, tucui cari huahuacunata yupangui» nirca. 16Shina nicpica, Moisesca Mandac Dios mandashca shinallatacmi yuparca.

17Levipac churicunapac shuticunaca: Gersón, Cohat, Merarimi carca. 18Gersonmanta mirarishca aillucunaca: Libni, Simeimi carca. 19Cohatmanta mirarishca aillucunaca: Amram, Izhar, Hebrón, Uzielmi carca. 20Merarimanta mirarishca familiacunaca: Mahli, Musimi carca.

Caicunami Levipac familiacunapac aillumanta carca.

21Gersonmanta mirarishca churicunaca: Libni, Simeimi carca. 22Shuc quillata charicmanta huichaiman yupashca tucui caricunaca canchis huaranga pichca patsac caricunami carca. 23Paicunaca Dios-huan tupana huasimanta huasha inti yaicunapimi carpata shayachishpa tiyarirca. 24Gersonmanta mirarishcacunataca Laelpac churi Eliasafmi mandacurca. 25Paicunami Dios-huan tupana huasitapish, chai huasi catatapish, yaicuna pungu jarcachishca pañotapish, 26canzha pamba jarcachishca pañotapish, Dios-huan tupana huasi muyundi jarcachishca pañotapish, altar jarcachishca pañotapish, carpa huatana huascacunatapish ricunga.

27Cohatmanta mirarishca churicunaca: Amrammanta, Izharimanta, Hebronmanta, Uzielmanta mirarishca churicunami carca. 28Shuc quillata charicmanta huichaiman yupashca caricunaca pusac huaranga sucta patsacmi carca. Paicunaca Dios-huan tupana huasimanta ura ladopi cac carpata huasita ricuccunami carca. 29Paicunaca Dios-huan tupana huasi ura ladopimi carpacunata shayachishpa tiyaringa. 30Cohatpac aillucunataca Elizafanmi mandacurca. 31Paicunami Arcatapish, candelerocunatapish, altarcunatapish, Dios-huan tupana huasi ucupi tucui imalla tiyashcacunatapish, Diospaclla chicanyachishca ucupi imalla ruhuanacunatapish, jarcachishca pañocunatapish, tucui imalla tiyashcacunatapish ricucurca.

32Levitacunata punta mandacca Aarón curapac churi Eleazarmi carca. Paimi Dios-huan tupana huasita cuidaccunacata mandacurca.

33Merarimanta mirarishca churicunaca: mahlitacuna, musitacunami carca. 34Shuc quillata charicmanta huichaiman yupashca caricunaca sucta huaranga ishcai patsacmi carca. 35Merarimanta mirarishca huasi ucupurataca Abihailpac churi Surielmi mandacurca. Paicunaca Dios-huan tupana huasi ladopimi carpacunata shayachishpa tiyacurca. 36Paicunami Dios-huan tupana huasi tablacunatapish, barracunatapish, pilarcunatapish, pilar shayachina basacunatapish, chaipi tucui ima tiyaccunatapish, 37carpa huasi canzha pambapi tiyac muyundi pilarcunatapish, basacunatapish, ishtacacunatapish, huatana huascacunatapish ricucurca.

38Inti llucshina ladopi cac Dios-huan tupana yaicunapimi Moisespish, Aaronpish paipac churicunandi carpacunata shayachishpa tiyaringa. Paicunami Dios-huan tupana huasitaca israelcunapac randi cuidanga. Maijan shuccuna chaiman chayarishpaca huañungami.

39Moisespish, Aaronpish Mandac Dios mandashca shinallatacmi levitacunapac aillucunata catishpa, shuc quillata charicmanta huichaiman tucui caricunata yuparca. Paicunaca ishcai chunga ishcai huarangami carca.

Punta churicunata cacharichinamanta

40Mandac Diosca Moisestaca: «Tucui israelcunapac punta churicunata shuc quillata charicmanta huichaiman yupashpa shuticunata quillcai. 41Israelcunapac punta churicunapac randica levitacunata ñucaman chicanyachingui. Israelcunapac punta animalcunapac randica levitacunapac animalcunata ñucaman chicanyachingui. Ñucaca Mandac Diosmi cani» nirca.

42Moisesca Mandac Dios nishca shinallatacmi tucui israelcunapac punta churicunataca yupashpa quillcarca. 43Tucui israelcunapac punta churicunata shuc quillamanta huichaiman charicta quillcashcaca ishcai chunga ishcai huaranga ishcai patsac canchis chunga quimsami carca.

44Mandac Diosca Moisestaca: 45«Israelcunapac punta churicunapac randica levitacunata ñucapacman apamungui. Punta animalcunapac randica levitacunapac animalcunata apamungui. Levitacunaca ñucapacmi cana can. Ñucaca Mandac Diosmi cani. 46Israelcunapac punta churicunaca levitacunamantaca ishcai patsac canchis chunga quimsahuanmi yalli. 47Chaimanta paicunataca pichca cullquita cada shucmanta chasquingui. Chai cullquica Dios-huan tupana huasipi tiyac cullqui mashna valishca shinallatacmi cana can. 48Chaitami yallishca punta churicunamantaca Aaronman, paipac churicunaman cuna can» nirca.

49Shina nicpimi, Moisesca levitacunamanta yallishca israelcunapac punta churicunamantaca cullquita curca. 50Paicunamantaca huaranga quimsa patsac sucta chunga pichca cullquitami Dios-huan tupana huasipi tiyac cullqui mashna valishca shinallatac tandachirca. 51Chaitaca Mandac Dios nishca shinallatacmi Aaronman, paipac churicunaman curca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index