Search form

NÚMEROS 4

Levitacuna servinamanta

1Mandac Dios Moisestapish, Aarontapish rimashpaca: 2«Leví aillumanta Cohatpac huahua huahuacunataca ailluta, huasi ucupurata catishpa yupangui. 3Ñucahuan tupana huasipi servic levitacunataca quimsa chunga huatayucmanta pichca chunga huatayuccaman yupangui.

4Cohatpac churicunaca ñucahuan tupana huasipimi ñucapaclla chicanyachishca ucupi servinga. 5Israelcuna shuc llactaman rigricpica, Aaronmi paipac churicunahuan pañota uricuchishpa, mandashcacunata huacaichina Arcata pilluchinga. 6Chai jahuapica delfín carahuan catashpa, morado pañohuan jahuata catachishpami, huanduna varata churanga. 7Tandata churana miza jahuapica azul pañota tendishpa, chai jahuapi platocunata, cucharacunata, tallina vinota, vasocunata, jarrocunata, punzhanta ñucapac ñaupapi churana tandatapish churanga. 8Chai jahuapica sani puca pañohuan catashpa, chai jahuataca delfín carahuan catashpami huanduna varata churanga. 9Chai quipaca azul pañohuan achicyachic candelabrota, mechacunata pitinacunandi, platillocunata, aceiteta churanacunami catanga. 10Tucui chaicunataca delfín carahuan catashpa, huanduna vara jahuapi churanga.

11Curi altartapish azul pañohuan catashpa, chai jahuata delfín carahuan catashpami huanduna varata churanga. 12Ñucahuan tupana huasipi imalla ruhuanacunata azul pañopi churashpa, jahuataca delfín carahuan catashpami huanduna vara jahuapi churanga. 13Rupachina altarmanta uchupata pichashpa, chai jahuataca morado pañohuan tapanga. 14Chashna tapashpa, chai jahuapi altarpi imalla ruhuanacunatami churanga. Nina churanacunatapish, ganchocunatapish, palacunatapish, ima shuccunatapish churashpami, delfín carahuan catashpa, huanduna varata churanga. 15Aarón paipac churicunahuan tucui ñucapaclla chicanyachishcacunata catashpa, shuc llactaman rigricpimi, Cohatpac churicunaca apangapac cuchuyanga. Shina apashpapish, ñucapaclla caccunataca mana tuparinachu can. Tuparishpaca huañungami. Caicunami Cohatpac churicuna ñucahuan tupana huasipi ruhuanaca can.

16Aaronpac churi Eleazarmi achicyachina aceitetapish, mishquilla ashnacuc inciensotapish, punzhanta cushca tandatapish, ñucahuan tupana huasitapish, chaipi tiyac ñucapaclla chicanyachishcatapish cuidanga» nirca.

17Mandac Dios Moisestapish, Aarontapish rimashpaca: 18«Levitapuramanta Cohatpac aillucuna ñucapaclla pushtuman cuchuyashpa huañuchunca, ama saquinguichu. 19Ñucapaclla pushtuman paicuna cuchuyashpa, ama huañuchunca, Aaronta, paipac churicunata chaipi imata ruhuachun mandangui. 20Paicunaca ñucapaclla chicanyachishcataca mana ricunachu can. Chaita ricushpaca huañungami» nirca.

Gersonpac churicuna imata ruhuana cashcamanta

21Mandac Dios Moisesta rimashpaca: 22«Gersonpac churicunataca ailluta, huasi ucupurata catishpa yupangui. 23Ñucahuan tupana huasipi servichunca quimsa chunga huatayucmanta pichca chunga huatayuc runacunacaman yupangui.

24Gersonpac aillucunaca caicunatami ruhuana can: 25Ñucapaclla ucuta jarcachishca pañotapish, ñucahuan tupana huasitapish, jahuata catashcatapish, chai jahuata catashca delfín caratapish, chai carpa huasi jarcachishca pañotapishmi apanga. 26Shinallatac ñucahuan tupana huasi canzha pamba muyundi jarcachishcatapish, chai pungu jarcachishca pañotapish, chaita huarcuna huascatapish, tucui chai ucupi ñucapacta ruhuangapac tiyaccunatapishmi apanga. 27Aarón, paipac churicuna mandacpimi, Gersonpac churicunaca servinga, imata ruhuana cashcatapish ruhuanga. 28Caicunatami Gersonpac churicunapac aillucunaca ñucahuan tupana huasipi ruhuanga. Paicunataca Aaronpac churi Itamarmi mandanga.

Meraripac churicuna servinamanta

29Meraripac churicunataca ailluta, huasi ucupurata catishpa yupangui. 30Ñucahuan tupana huasipi serviccunataca chunga huatayucmanta pichca chunga huatayuc runacaman yupangui. 31Paicunaca caicunatami ñucahuan tupana huasipi ruhuana can: Paicunami ñucahuan tupana huasi tablacunatapish, quingraiman churana caspicunatapish, pilarcunatapish, basacunatapish apanga. 32Shinallatac chai muyundi pamba jarcachishca pilarcunatapish, basacunatapish, ishtacacunatapish, huascacunatapishmi apanga. Tucui minishtishcacunatapish shuc pangapi quillcangui. 33Caicunami Meraripac aillumanta churicunaca ñucahuan tupana huasipi ruhuanaca can. Paicunataca Aaronpac churi Itamarmi mandanga» nirca.

Mashna huatayuc levitacuna servina cashcamanta

34Moisesca Aaronhuan, tandanacushca israelcunata pushaccunahuanmi Cohatpac aillucunataca huasi ucupurata catishpa yuparca. 35Dios-huan tupana huasipi serviccunataca quimsa chunga huatayucmanta pichca chunga huatayuccamanmi yuparca. 36Paicunapac ailluta catishpa yupacpica, ishcai huaranga canchis patsac pichca chungami carca. 37Caicunami Dios-huan tupana huasipi servic Cohatpac churicunamantaca carca. Moisespish, Aaronpish Mandac Dios nishca shinami yuparca.

38Gersonpac ailluta, huasi ucupurata catishpa, 39quimsa chunga huatayucmanta pichca chunga huatayuc runacaman yuparca. Paicunami Dios-huan tupana huasipi servingapac carca. 40Paicunapac ailluta, huasi ucupurata catishpa yupashcaca ishcai huaranga sucta patsac quimsa chungami carca. 41Caicunami Mandac Dios Moisesta, Aaronta nishca shinallatac Dios-huan tupana huasipi servigricuc Gersonpac churicunaca carca.

42Meraripac ailluta, huasi ucupurataca 43quimsa chunga huatayucmanta pichca chunga huatayuc runacamanmi yuparca. Tucui paicunami Dios-huan tupana huasipi servingapac carca. 44Tucui paicunapac ailluta catishpa yupashcaca, quimsa huaranga ishcai patsacmi carca. 45Caicunami Mandac Dios Moisesta, Aaronta yupachun nishca Merari runapac aillumantaca carca.

46Levipac ailluta catishpa, huasi ucupurata catishpa Moises-huan Aaronhuan shinallatac israelcunata pushaccunahuan yuparca. 47Quimsa chunga huatayucmanta pichca chunga huatayuc runacamanmi Dios-huan tupana huasi ucupi servichun, shinallatac apana cacpica apachun yupashca carca. 48Paicunaca pusac huaranga pichca patsac pusac chungami carca. 49Paicunaca Mandac Dios Moisesta mandashca shinami, cada quiquin imata ruhuana cashcata ruhuachun, apana cacpica, apachun yupashca carca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index